កម្ពុជា - 
អត្ថបទចុះ​ផ្សាយ​នៅ​ថ្ងៃ ព្រហស្បតិ៍ 24 ឧសភា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ព្រហស្បតិ៍ 24 ឧសភា 2012

គណបក្ស​រាជា​និយម​រួម​គ្នា​វិញ​ក្រោម​អន្តរាគមន៍​ពី​លោក ​ហ៊ុន ​សែន​

លោក ញឹក ប៊ុនឆៃ​ប្រធាន​ប្រតិបត្តិ​គណប​ក្ស​ហ្វ៊ុន​ស៊ិន​ប៉ិច​ ចុះ​ហត្ថាលេខា​ជាមួយ​សម្តេច​ក្រុម​ព្រះ​នរោតមរាប្​ទ្ឋិ​
លោក ញឹក ប៊ុនឆៃ​ប្រធាន​ប្រតិបត្តិ​គណប​ក្ស​ហ្វ៊ុន​ស៊ិន​ប៉ិច​ ចុះ​ហត្ថាលេខា​ជាមួយ​សម្តេច​ក្រុម​ព្រះ​នរោតមរាប្​ទ្ឋិ​
RFI/Siv Channa

ដោយ ប៉ែន បូណា

គណបក្ស​ហ្វ៊ុនស៊ិនប៉ិច និង​គណបក្ស នរោត្តម រណ​ឬ​ទ្ធិ បាន​យល់ព្រម​រួបរួមគ្នា​ឡើ​ងវិញ​ហើយ​នៅពេលនេះ​ក្រោម​ការសម្របសម្រួល​ពី​លោកនាយក​រដ្ឋមន្ត្រី ហ៊ុន សែន។ ពិធី​ចុះហត្ថលេខា​លើ​សេចក្តីប្រកាស​រួម​រវាង​គណបក្ស​រាជានិយម​ទាំងពីរ​បានធ្វើ​ឡើង​នៅ​ព្រឹក​ថ្ងៃ​ព្រហស្បតិ៍​នេះ​នៅឯ​វិមាន​សន្តិភាព ទីស្តីការគណៈរដ្ឋមន្ត្រី​ទីក្រុង​ភ្នំពេញ។ ការ​យល់​ព្រម​​រួបរួមគ្នា​របស់​គណបក្ស​អតីត​បងប្អូន​គូសត្រូវ​ទាំងពីរ​បានធ្វើ​ឡើង​ចំពេល​​ឃោសនា​បោះ​ឆ្នោត​​ក្រុម​ប្រឹក្សា​ឃុំ​សង្កាត់។​

សេចក្តីរាយ​ការណ៍​របស់​​ ប៉ែន បូណា
 

24/05/2012

បន្ទាប់ពី​បែកបាក់​គ្នា​អស់​រយៈពេល​ជាច្រើន​ឆ្នាំ គណបក្ស​រាជានិយម​ទាំងពីរ​គឺ ហ្វ៊ុនស៊ិនប៉ិច និង​គណបក្ស នរោត្តម រណ​ឬ​ទ្ធិ បាន​ស្រុះស្រួល​គ្នា​ដើម្បី​បង្រួបបង្រួម​គណបក្ស​រាជានិយម​ឡើងវិញ​ហើយ។ ព្រះអង្គម្ចាស់ នរោត្តម រណ​ឬ​ទ្ធិ ប្រធាន​គណបក្ស​នរោត្តម រណ​ឬ​ទ្ធិ និង​លោក ញ៉ឹក ប៊ុនឆៃ ប្រធាន​ប្រតិបត្តិ​គណបក្ស​ហ្វ៊ុនស៊ិនប៉ិច បាន​ចុះហត្ថលេខា​លើ​សេចក្តី​ប្រកាស​រួមគ្នា​មួយ​នៅ​ព្រឹក​ថ្ងៃ​ព្រហស្បតិ៍​នេះ​ដើម្បី​បញ្ជាក់​ពី​ការរួបរួម​គ្នា​ឡើងវិញ។
 
សេចក្តីប្រកាស​រួម​រវាង​គណបក្ស​ទាំងពីរ​មាន​ខ្លឹមសារ​សំខាន់​ពីរ​យ៉ាង​គឺ ទី១៖
គណបក្ស​ហ្វ៊ុនស៊ិនប៉ិច និង​គណបក្ស នរោត្តម រណ​ឬ​ទ្ធិ យល់ព្រម​សហការគ្នា​និង​ជួយ​គ្នា​ទៅ​វិញ​ទៅមក​ក្នុងពេល​បោះឆ្នោតក្រុមប្រឹក្សា​ឃុំ​សង្កាត់​នៅ​ថ្ងៃទី៣មិថុនា​ខាងមុខនេះ។
និង​ទី២៖បន្ទាប់ពី​ការបោះឆ្នោត​រួចគណបក្ស​ទាំងពីរ​នឹង​រួបរួមគ្នា​នៅក្នុង​គណបក្ស​ហ្វ៊ុនស៊ិនប៉ិច​​តែមួយ​ឡើងវិញ​ដើម្បី​ចូលរួម​បោះឆ្នោត​តំណាងរាស្ត្រ​នៅ​ខែកក្កដា​ឆ្នាំ២០១៣។ បើ​យោងតាម​បន្ទូល​របស់​ព្រះអង្គម្ចាស់នរោត្ត រណ​ឬ​ទ្ធិ ព្រះអង្គ​នឹង​យាង​ទៅធ្វើជា​ប្រធាន​គណបក្ស ហ៊្វុនស៊ិនប៉ិច ឡើងវិញដោយមាន​ លោក​ញ៉ឹក ប៊ុនឆៃ ជា​អនុប្រធាន។
 
គួរ​កត់​ស​ម្គា​ល់​ថា ការបង្រួបបង្រួម​គ្នា​រវាង​គណបក្ស​អតីត​បងប្អូន​គូសត្រូវ​ទាំងពីរ​បានធ្វើ​ឡើង​ក្រោម​កិច្ចសម្របសម្រួល​ពី​សំណាក់​លោកនាយក​រដ្ឋមន្ត្រី ហ៊ុន សែន។ ពិធី​ចុះហត្ថលេខា​នៅ​ព្រឹក​មិញ​បាន​ធ្វើឡើង​នៅក្រោម​ដំបូល​វិមាន​សន្តិ​ភា​ពនៃ​ទីស្តីការគណៈរដ្ឋមន្ត្រី។
 
ការប្រើប្រាស់​វិមាន​រដ្ឋាភិបាល​ដើម្បី​ពិធី​ចុះហត្ថលេខា​របស់​គណបក្ស​នយោបាយ​ទាំងពីរ​ត្រូវ​បាន​​ព្រះអង្គម្ចាស់​នរោត្តម រណ​ឬ​ទ្ធិ ពន្យល់ថា គឺ​ដោយសារតែ​ហ្វ៊ុនស៊ិនប៉ិច​គឺជា​ដៃគូ​ក្នុង​រដ្ឋាភិបាលចម្រុះ។
 
មានបន្ទូល​ទៅកាន់​ក្រុមអ្នកកាសែត ព្រះអង្គម្ចាស់ នរោត្តម រណ​ឬ​ទ្ធិ បាន​ហៅ​លោកនាយក​រដ្ឋមន្ត្រី ហ៊ុន សែន ថា​ជា​អ្នករាជានិយមនិង​សីហនុ​និយម​ម្នាក់​ដែល​បាន​ដើរតួនាទី​សម្រប សម្រួល​ជា​ប្រវត្តិសាស្ត្រ​ឲ្យ​គណបក្ស​រាជានិយម​រួបរួមគ្នា​ឡើងវិញ។ ព្រះអង្គ​សង្ឃឹមថា ការរួប រួម​គ្នា​ឡើងវិញ​នឹង​ផ្តល់​សន្ទុះ​ថ្មី​ដល់​គណបក្ស ហ្វ៊ុនស៊ិនប៉ិច ដែល​បាន​បែកបាក់​គ្នា​ចុងក្រោយ​និង​ខ្លាំងក្លា​បំផុត​កាលពី​ខែតុលា​ឆ្នាំ២០០៦។
 
ទីបំផុត នៅពេលដែល គណបក្ស​រាជានិយម នីមួយៗនៅសល់តែ២កៅអី​ប៉ុណ្ណោះ​នៅក្នុង​រដ្ឋសភា ពួកគេ​ក៏​វិល​រក​ផ្លូវ​រួបរួមគ្នា​វិញ​ដោយមាន​ការជួយជ្រោមជ្រែង​ពី​លោកនាយក​រដ្ឋមន្ត្រី​ហ៊ុន សែន អនុប្រធាន​គណបក្ស​ប្រជាជន​កម្ពុជា នៅក្នុង​បរិបទ​ដែល​កម្ពុជា​កំពុងដំណើរការ​ឃោសនា​បោះឆ្នោត​ក្រុមប្រឹក្សាឃុំ​សង្កាត់៕

tags: កម្ពុជា - គណបក្សនយោបាយ
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close