សេដ្ឋកិច្ច-ហិរញ្ញវត្ថុ -

អត្ថបទចុះផ្សាយនៅថ្ងៃ អាទិត្យ 15 មករា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 15 មករា 2012

ផ្សារមូលបត្រកម្ពុជានឹងចាប់ផ្តើមជួញដូរជាសាធារណៈក្នុង១ខែឬ២ខែទៀត

ទីផ្សារមូលបត្រកម្ពុជាមានទីតាំងនៅក្នុងអគារកាណាឌីយ៉ា

RFI/Channa Siv

ដោយ គី សុខលីម

ផ្សារមូលបត្រកម្ពុជានឹងចាប់ផ្តើមជួញដូរក្នុង១ខែឬ២ខែទៀត។ ក្រុមហ៊ុនរបស់រដ្ឋចំនួន៣នឹងចូលរួមបោះភាគហ៊ុនលក់នៅលើទីផ្សារមុនគេ។ លោក គាត ឈន់ រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ បានបញ្ជាក់ថាការពន្យារពេលវេលាជួញដូរនៅក្នុងក្រុមហ៊ុនផ្សារមូលបត្រកម្ពុជាមិនត្រូវចាត់ទុកជាការខាតបង់ពេលវេលាទេ។ តែ ការពន្យារពេលនេះបានធ្វើអោយមានការគិតគូរពីក្របខណ្ឌគតិយុត្តិប្រសើរជាងមុន។

សេចក្តីរាយការណ៍របស់ គីសុខលីម ពីភ្នំពេញ

ស្តាប់ (02:21)

15/01/2012 by គី សុខលីម

បន្ទាប់ពីទន្ទឹងរង់ចាំអស់រយៈពេលជាច្រើនឆ្នាំមកហើយនោះ មន្ត្រីក្រុមហ៊ុនផ្សារមូលបត្រកម្ពុជាដែលសុំមិនអោយបញ្ចេញឈ្មោះបានបញ្ជាក់ប្រាប់នៅថ្ងៃអាទិត្យនេះថា ទីផ្សារមូលបត្រកម្ពុជានឹងដាក់អោយដំណើរការជួញដូរជាផ្លូវការនៅក្នុង១ខែឬ២ខែទៀតខាងមុខនេះ។

ការប្រកាសម្តងនេះទំនងជារឿងពិតពីព្រោះក្របខ័ណ្ឌគតិយុត្តិមួយចំនួនបានរៀបចំអស់ហើយ។

បើយោងតាមប្រភពដដែល ក្រុមហ៊ុនរដ្ឋចំនួន៣គ្រោងនឹងដាក់អោយជួញដូរមូលបត្ររបស់ខ្លួនជាសាធារណៈ។ ក្រុមហ៊ុនទាំងនោះជារួមមាន៖រដ្ឋាករទឹកស្វយ័តភ្នំពេញ ទូរគមនាគមន៍កម្ពុជានិងកំពង់ផែស្វយ័តកំពង់សោម។

លោក គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មការមូលបត្រកម្ពុជាបានបញ្ជាក់កាលពីប៉ុន្មានថ្ងៃមុននេះថា ការយឺតយ៉ាវក្នុងការបង្កើតទីផ្សារមូលបត្រនាពេលកន្លងមកគឺមិនមែនកើតឡើងដោយសារអសមត្ថភាពឬដោយខ្វះការប្តេជ្ញាចិត្តរបស់រាជរដ្ឋាភិបាលនោះទេ ប៉ុន្តែវាបង្កឡើងដោយកត្តាសត្យានុម័តមួយចំនួនក្នុងនោះមានការរៀបចំច្បាប់នានាជាដើម។

ការពន្យារពេលជាច្រើនលើកច្រើនសា របស់រដ្ឋាភិបាលកម្ពុជាក្នុងការបង្កើតផ្សារមូលបត្រនេះញ៉ាំងអោយមានការរិះគន់ជាច្រើនពីសំណាក់មជ្ឈដ្ឋាននានានៅក្នុងប្រទេសកម្ពុជា។ ប៉ុន្តែលោក គាត ឈន់ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានពន្យល់បកស្រាយវិញថា ការពន្យារពេលវេលាជួញដូរនៅក្នុងក្រុមហ៊ុនផ្សារមូលបត្រកម្ពុជាមិនត្រូវចាត់ទុកជាការខាតបង់ពេលវេលាទេ ។

ផ្ទុយទៅវិញ ការពន្យារពេលនេះ វាបានផ្តល់នូវពេលវេលាបន្ថែមទៀតដល់ភាគីពាក់ព័ន្ធទាំងឡាយដូចជា គណៈកម្មការមូលបត្រកម្ពុជា ក្នុងការគិតគូរអោយបានល្អិតល្អន់អំពីក្របខ័ណ្ឌគតិយុត្តិនិងក៏ដូចជាយុទ្ធនាការទាក់ទាញវិនិយោគិនក្នុងស្រុកនិងក្រៅស្រុក ដើម្បីចូលរួមនៅក្នុងទីផ្សារនេះ ។ លោក គាត ឈន់ បានសង្កត់ធ្ងន់ថា៖”យើងមិនចង់ដើរទៅមុខ១ជំហាន ហើយដើរថយក្រោយ២ជំហាននោះទេ”។

កាលពីប៉ុន្មានថ្ងៃមុននេះ ក្រុមហ៊ុនផ្សារមូលបត្រកូរ៉េដែលជាដៃគូរវិនិយោគជាមួយក្រុមហ៊ុនមូលបត្រកម្ពុជានោះទើបផ្តល់ជំនួយអេក្រង់ ទូរទស្សន៍ទំហំធំ ៦ម៉ែត្រ គុណ ៨ ម៉ែត្រដាក់តាំងនៅលើសួនច្បារផ្លូវភ្លោះខាងត្បូងវិមានកាណាឌីយ៉ាដើម្បីធ្វើការផ្សព្វផ្សាយព័ត៌មានរបស់ក្រុមហ៊ុនផ្សារមូលបត្រកម្ពុជា។

គួរកត់សម្គាល់ថា ផ្សារមូលបត្រកម្ពុជាគ្រោងនឹងដាក់អោយជួញដូរនៅក្នុងពេលឆាប់ៗខាងមុខនេះហើយប៉ុន្តែសាធារណជនសាមញ្ញនិងអ្នកជំនាញមួយចំនួនធំនៅកម្ពុជានៅមិនទាន់យល់ដឹងច្រើនពីប្រតិបត្តិការផ្សារភាគហ៊ុននៅឡើយទេ៕