កម្ពុជាបេ្តជ្ញាយកឲ្យបានមេដាយយ៉ាងហោចមួយនៅក្នុងព្រឹត្តិការណ៍កីឡាអាស៊ីហ្គេម
កីឡាករ-កីឡាការនីកម្ពុជា ចំនួន២០នាក់ រួមទាំងគណប្រតិភូកីឡាចំនួន១៦នាក់ បានទៅដល់ប្រទេសកូរ៉េខាងត្បូងហើយ នៅព្រឹកថ្ងៃអង្គារនេះ។ កីឡាករ-កីឡាការនីខ្មែរទាំងនោះ នឹងត្រូវចូលរួមប្រកួត នៅក្នុងព្រឹត្តិការណ៍កីឡាប្រចាំទ្វីបអាស៊ី ដែលមានឈ្មោះថា អាស៊ីហ្គេម ដែលក្រុង Incheon ប្រទេសកូរ៉េខាងត្បូង ធ្វើជាម្ចាស់ផ្ទះ។ រដ្ឋាភិបាលកម្ពុជា និងក្រសួងអប់រំយុវជន និងកីឡា ប្តេជ្ញាចង់ឲ្យកម្ពុជា ទទួលបានមេដាយយ៉ាងហោចមួយ ពីព្រឹត្តិការណ៍កីឡានេះ។
ចុះផ្សាយនៅថ្ងៃ៖
ស្តាប់ - ០១:៣៨
ទោះជាមេដាយអ្វីក៏ដោយ កម្ពុជា ពិតជាចង់បង្កើតប្រវត្តិសាស្ត្រជាលើកដំបូង ដោយអាចទទួលបានមេដាយមួយ ពីព្រឹត្តិការណ៍កីឡាប្រចាំទ្វីប «អាស៊ីហ្គេម»នេះ ចាប់តាំងពីឆ្នាំ ១៩៧០មក។ នេះបើតាមការលើកឡើង របស់លោក វ៉ាត់ ចំរើន អគ្គលេខាធិការគណកម្មាធិការជាតិអូឡាំពិកកម្ពុជា។
លោក វ៉ាត់ ចំរើន បញ្ជាក់ថា ព្រឹត្តិការណ៍កីឡានេះ ជាព្រឹត្តិការណ៍ធំ ដូច្នេះវាប្រាកដ ជាផ្តល់ផលវិបាកដល់កីឡាករ-ការនីកម្ពុជា។ ប៉ុន្តែលោកនៅតែសង្ឃឹមថា ប្រភេទកីឡាតៃក្វាន់ដូ និងចំបាប់ នឹងអាចរកមេដាយឲ្យកម្ពុជាបាន ព្រោះថាកីឡាទាំងពីរនេះ បានទទួលមេដាយច្រើនពីព្រឹត្តិការណ៍កីឡាប្រចាំតំបន់ «ស៊ីហ្គេម» នាពេលកន្លងមក។
ជាការលើកទឹកចិត្ត មុនពេលចេញដំណើរ កីឡាករ-កីឡាការនីកម្ពុជា បានទទួលប្រាក់ឧបត្ថម្ភម្នាក់៤០០ដុល្លារពីរដ្ឋាភិបាល និងក្រសួងអប់រំ យុវជន និងកីឡា។ រដ្ឋាភិបាលកម្ពុជា បានបញ្ជាក់ថា សម្រាប់កីឡាករ ដែលទទួលបានមេដាយមាស ពីព្រឹត្តិការណ៍កីឡាអាស៊ីហ្គេមនេះ នឹងផ្តល់ប្រាក់រង្វាន់លើកទឹកចិត្តចំនួន២ម៉ឺនដុល្លារ មេដាយប្រាក់ ទទួលបាន១ម៉ឺនដុល្លារ និងមេដាយសំរិទ្ធ ទទួលបាន៦ពាន់ដុល្លារ។
កម្ពុជាបានបញ្ជូនគណៈប្រតិភូ និងកីឡាករ-កីឡាការនី ចំនួន៣៦នាក់ ដោយមាន៧ប្រភេទកីឡា ដើម្បីទៅចូលរួមប្រកួតនៅក្នុងព្រឹត្តិការណ៍កីឡាអាស៊ីហ្គេមលើកទី១៧ នៅក្រុង Incheon ប្រទេសកូរ៉េខាងត្បូងនេះ។ កីឡាទាំង៧ប្រភេទនោះ រួមមាន ចំបាប់ តៃក្វាន់ដូ យូដូ វាយកូនបាល់ បាល់ទះលើឆ្នេរខ្សាច់ ហែលទឹក និងអត្តពលកម្ម។
សូមបញ្ជាក់ថា ព្រឹត្តិការណ៍កីឡា៤ឆ្នាំម្តងប្រចាំតំបន់អាស៊ីនេះ នឹងចាប់ផ្តើមពីថ្ងៃទី១៩កញ្ញា រហូតដល់ថ្ងៃទី៤តុលា ដោយមានប្រទេសចំនួន៤៥ចូលរួម និងមាន៣៦ប្រភេទកីឡា ដែលចែកចេញជា៤៣៩ វិញ្ញាសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ