រដ្ឋាភិបាល សហជីព និង សមាគមរោងចក្រ កំពុងស្វែងរកចំនុចសមូលប្រាក់ឈ្នួលកម្មករជាថ្មីម្តងទៀត
ក្នុងវេទិកាពិភាក្សាត្រីភាគីរយៈពេលពីរថ្ងៃចាប់ពីថ្ងៃទី២៤មេសានេះ រដ្ឋាភិបាល សហជីព និងសមាគមរោងចក្រកាត់ដេរ បានលើកយកបញ្ហាប្រាក់ឈ្នួលអប្បបរមារបស់កម្មករដ៏ចម្រូងចម្រាស មកពិភាក្សាគ្នាសាជាថ្មីម្តងទៀត។ ជាការពិភាក្សាដើម្បីស្វែងរកចំណុចសម្រួលដើម្បីកំណត់ប្រាក់ឈ្នួលអប្បបរមា នាពេលបច្ចុប្បន្ន និងការកំណត់ប្រាក់ឈ្នួលនាពេលខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
បញ្ហាប្រាក់ឈ្នួលអប្បបរមាដ៏ចម្រូងចម្រាស់របស់កម្មកររោងចក្រវាយនភណ្ឌទាំងអស់ត្រូវបានពិភាក្សាសាជាថ្មីម្តងទៀតហើយនៅថ្ងៃព្រហស្បតិ៍នេះ។ ជាការពភិក្សាដែលមានសមាសភាពត្រីភាគីចូលរួមគឺក្រសួងការ សហជីព និងសមាគមរោងចក្រកាន់ដេរ ដោយមានជំនួយពីអង្គការអន្តរជាតិខាងការងារ ILO។ គោលបំណងនៃវេទិកាត្រីភាគីពីថ្ងៃទី២៤ដល់ថ្ងៃទី២៥មេសានេះ គឺដើម្បីកសាងមតិរួមស្តីពីការកំណត់ប្រាក់ខែរបស់កម្មករ ដោយផ្អែកលើការសិក្សាស្រាវជ្រាវដោយពិតប្រាកដ។
រដ្ឋមន្ត្រីក្រសួងការងារលោក អ៊ិត សំហេង ដែលបានចូលរួមបើកវេទិកានេះ បានបញ្ជាក់ថាតាមរយៈនៃការពិភាក្សាត្រីភាគីនេះ កម្ពុជានឹងអាចកំណត់បាននៅយន្តការផ្តល់ប្រាក់ឈ្នួលអប្បរមាដល់កម្មករបានយ៉ាងសមស្រប។ ជាការផ្តល់ដើម្បីបញ្ចៀសបានរាល់នូវទម្រង់បាតុកម្ម និងការមិនពេញចិត្តទាំងឡាយណាដែលធ្លាប់បានកើតឡើងនាពេលកន្លងមក។ ប៉ុន្តែលោករដ្ឋមន្ត្រី បានបញ្ជាក់ថា ការដំឡើងប្រាក់ឈ្នួល១០០ដុល្លាររបស់រដ្ឋាភិបាលកន្លងមក គឺបានពិភាក្សាយ៉ាងល្អិតល្អន់ដើម្បីធានាបានការប្រកួតប្រជែងនៃទីផ្សារក្នុងតំបន់ផងដែរ។
ជាតំណាងរបស់សហជីពទូទាំងប្រទេសកម្ពុជាក្នុងកិច្ចពិភាក្សា លោក អាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា បានអះអាងប្រាក់ឈ្នួលគោលអប្បរមារបស់កម្មករចំនួន១០០ដុល្លារនាពេលបច្ចុប្បន្ននេះគឺមិនទាន់បានឆ្លើយតប១០០%ដល់ការរស់នៅរបស់កម្មករនៅឡើយនោះទេ។ប្រធានសហជីពរូបនេះ ក៏បានបង្ហាញជំហរថាការទាមទារប្រាក់ឈ្នួល១៦០ដុល្លាររបស់ខ្លួននោះ គឺមិនមែនជាជំហររឹងត្អឹងនោះទេ។ លោកបញ្ជាក់យ៉ាងខ្លីថា បើមិនអាចឱ្យ១៦០ដុល្លារបាន តើអាចផ្តល់បានប៉ុន្មាន។ ប៉ុន្តែយ៉ាងណាក៏ដោយ លោកអាត់ ធន់ បន្ថែមថា រាល់ការកំណត់ណាមួយនោះ គឺត្រូវផ្អែកមូលដ្ឋានសិក្សាស្រាវជ្រាវច្បាស់លាស់ និងសេដ្ឋកិច្ច។
សូមរំលឹកថាដោយសារបញ្ហាប្រាក់ឈ្នួលអប្បរមាដែលមិនមានចំនុចយល់ព្រមរួមគ្នានេះ បានបញ្ឆេះកំហឹងកម្មករឱ្យផ្ទុះអំពើហិង្សាបង្ហូរឈាមកាលពីដើមខែមករាកន្លងមក ដែលបណ្តាលឱ្យមនុស្សយ៉ាងហោចណាស់៥នាក់បានស្លាប់និងជាង២០នាក់ផ្សេងទៀតនៅបន្តជាប់ឃុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ