ចិន -

អត្ថបទចុះផ្សាយនៅថ្ងៃ សុក្រ 26 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 27 តុលា 2012

បក្សកុម្មុយនិស្តចិននៅតែញំាញីដោយរឿងអាស្រូវ

លោកវេន ជាប៉ាវ នាយករដ្ឋមន្រ្តី ចិន

©REUTERS/Petar Kujundzic

ដោយ អៀង សុខម៉ិញ

នៅប្រទេសចិន បក្សកុម្មុយនិស្តកំពុងជួបរឿងដ៏ទើសទាល់ខ្លាំងមួយទៀត ព្រោះបើតាមការអង្កេតរបស់កាសែតអាមេរិក New York Times គ្រួសាររបស់លោកនាយករដ្ឋមន្ត្រីចិន វេន ជាវប៉ាវ មានទ្រព្យធន សរុបមិនតិចជាង២ពាន់៧រយលានដុល្លារអាមេរិក ! គឺវាខុសស្រលះពីអ្វីដែលលោកវេនធ្លាប់បង្ហាញថា ជាគ្រួសារសាមញ្ញ និងជានាយករដ្ឋមន្ត្រីស្និទ្ធនឹងប្រជាពលរដ្ឋ។

បើតាមរបាយការណ៍លម្អិតរបស់ ញូវយ៉កថែមស៍ ទ្រព្យរបស់ម្តាយ បងប្អូនបង្កើត កូន និងប្រពន្ធរបស់លោក វេនជាវប៉ាវ បានកើនឡើងខ្លាំងគិតចាប់តាំងពីលោកបានឡើងកាន់តំណែងជាប្រមុខរដ្ឋាភិបាលចិនមក ពោលគឺតាំងពី បានឡើងធ្វើជាឧបនាយករដ្ឋមន្ត្រីនៅឆ្នាំ១៩៩៨ និងនាយករដ្ឋមន្ត្រីតាំងពីឆ្នាំ២០០៣មក រហូតដល់ថ្ងៃទី៨វិច្ឆិកាខាងមុខនេះ។ គ្រាន់តែ កាសែត ឌឹញូវយ៉កថែមស៍ចុះផ្សាយដំណឹងនេះភា្លម (តាំងពីព្រលឹមថ្ងៃសុក្រនេះមក) អាជ្ញាធរចិនបានបិទខ្ទប់ភ្លាម ទាំងជាភាសាចិន ភាសាអង់គ្លេស លើប្រព័ន្ធអ៊ីនធឺណែត មិនឱ្យបណ្តាជនចិនអាចរកឃើញព័ត៌មានអ្វីទាក់ទងនឹងក្រុមគ្រួសារលោកវេន ជាប៉ាវឡើយ។

សូមបញ្ជាក់ថាតាំងពីខែមិថុនាមក វេបសាយBloomberg ក៏ត្រូវបានបិទខ្ទប់ដែរព្រោះ វេបសាយនេះបានសរសេរលម្អិតអំពីទ្រព្យសម្បត្តិរបស់លោក ស៊ី ជីនពីង អនាគតប្រធានាធិបតីចិនថ្មី ថា មានធនធានវិនិយោគតម្លៃប្រមាណ៣៧៥លានដុល្លារអាមេរិក និងចំណែកហ៊ុនមិនផ្ទាល់មួយទៀត មានប្រមាណ១៧០០លានដុល្លារ។

កាសែត ឌឹញូវយ៉កថែមស៍បានស្នើសុំប្រតិកម្មពីគ្រួសារ និងពីរដ្ឋាភិបាលចិន ប៉ុន្តែគ្មាននរណាយល់ព្រមបញ្ចេញសោះឡើយនៅពេលនេះ ម៉ោងនេះ។ ជាទូទៅ ព័ត៌មានលម្អិតទាក់ទងនឹងជីវិតឯកជន និងទ្រព្យធនរបស់ថ្នាក់ដឹកនាំកំពូលៗ ជារឿងសំងាត់របស់រដ្ឋ។

ការបរិហារគឺធ្វើឡើងដោយកម្របំផុត លើកលែងតែករណី លោក ប៉ូ ស៊ីឡៃ អតីតអគ្គលេខាធិការបក្សកុម្មុយនិស្តចិនប្រចាំខេត្តចុងឈីង និងជាឥស្សរជននយោបាយដ៏មានប្រជាប្រិយភាព ប៉ុន្តែ បានបង្កឱ្យផ្ទុះរឿងអាស្រូវដ៏ធំបំផុតនៅក្នុងជួរបក្សកុម្មុយនិស្តចិន។

លោកប៉ូ ស៊ីឡៃ នៅក្នុងសភា (រូបថតបណ្ណសា)

©Reuters

ស្តីអំពីសំណុំរឿងលោកប៉ូស៊ីឡៃនេះ បន្ទាប់ពីបណ្តេញពីបក្ស កាលពីខែមុន នៅថ្ងៃសុក្រទៀត លោកប៉ូស៊ីឡៃ ត្រូវបានគេដកចេញពីសមាជិកភាពសភា ជាផ្លូវការ។ មានន័យថា លោកប៉ូ ស៊ីឡៃ លែងមានអភ័យឯកសិទ្ធិសមាជិកសភា ដូច្នេះលោកនឹងត្រូវប្រឈមមុខនឹងតុលាការស៊ីវិល ចំពោះការចោទប្រកាន់ទាំងឡាយមានជាអាទិ៍ការពុករលួយទ្រង់ទ្រាយធំ និងឃុបឃិតធ្វើឃាតលើជនជាតិអង់គ្លេស។

ប្រសាសន៍របស់មេធាវី លោកប៉ូស៊ីឡៃ

ស្តាប់ (01:21)