គ.ជ.ប ចេញលិខិតស្របតាមការស្នើសុំរបស់គណបក្សសង្គ្រោះជាតិ
អគ្គលេខាធិការគណៈកម្មាធិការជាតិរៀបចំការបោះឆ្នោត គ.ជ.ប លោក ទេព នីថា ថ្លែងថាគ.ជ.ប បានចេញលិខិតមួយកាលពីម្សិលមិញ ទៅកាន់អភិបាល និងគណបញ្ជាការឯកភាពរាជធានី ខេត្ត បង្កលក្ខណៈសមស្រប ដល់គណបក្សនយោបាយនិងបេក្ខជនក្នុងការធ្វើសកម្មភាពឃោសនាបោះឆ្នោតក្រុមប្រឹក្សារាជធានី ខេត្ត ស្រុក ខណ្ឌ។ ការប្រកាសរបស់គ.ជ.ប នាពេលនេះ គឺធ្វើឡើងបន្ទាប់ពីមានការស្នើសុំដោយអាជ្ញាធរ ឲ្យស្ថាប័នរៀបចំការបោះឆ្នោតជាតិនេះ កុំអនុញ្ញាតរាល់ការហែរក្បួន ឬជួបជុំនៅទីកន្លែងសាធារណៈ ក៏ប៉ុន្តែគណបក្សប្រឆាំងក៏បានស្នើឲ្យគ.ជ.ប ចាត់វិធានការលើការរំខានការឃោសនារបស់ពួកគេផងដែរ ដោយចាត់ទុកថាជាការរំលោភលើច្បាប់បោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
គណៈកម្មាធិការរៀបចំការបោះឆ្នោត(គ.ជ.ប) កាលពីថ្ងៃអង្គារម្សិលមិញបានចេញលិខិតមួយទៅកាន់អភិបាល និងគណៈបញ្ជាការគ្រប់ខេត្ត រាជធានីដើម្បីសម្រួលដល់ការការឃោសនារបស់គណបក្សនយោបាយនានានៅក្នុងឱកាសនៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលប្រព្រឹត្តិទៅពីថ្ងៃទី០២ដល់ថ្ងៃទី១៦ខែឧសភា។
លោក ទេព នីថា អគ្គលេខាធិការ គ.ជ.ប បានថ្លែងប្រាប់វិទ្យុបារាំងអន្តរជាតិ RFI នៅថ្ងៃពុធនេះថា ការចេញលិខិតនេះគឺធ្វើឡើងបន្ទាប់ពីការស្នើសុំពីគណបក្សសង្គ្រោះជាតិនិងមានការពិគ្រោះយោបល់ជាមួយគណៈបញ្ជាការសន្តិសុខអចិន្ត្រៃយ៍នៃការបោះឆ្នោតស្តីពីស្ថានភាពសន្តិសុខជាក់ស្តែងនៅតាមបណ្តាខេត្ត រាជធានី។
សូមរំលឹកថាសាលារាជធានីភ្នំពេញ កាលពីការចាប់ផ្តើមយុទ្ធនាការបោះឆ្នោតបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ធ្លាប់បានផ្ញើរលិខិតទៅកាន់គណៈកម្មាធិការ រៀបចំការបោះឆ្នោតរាជធានី ដោយស្នើសុំកុំអនុញ្ញាតឲ្យគណបក្សនយោបាយហែរក្បួនឃោសនា តាមដងផ្លូវ តែអាចជួបជុំធ្វើការឃោសនាតាមទីស្នាក់ការឬកន្លែងឯកជន។ការលើកឡើងដូច្នេះរបស់អាជ្ញាធរក្រុងភ្នំពេញគឺ ដោយយោងទៅលើហេតុផលសន្តិសុខ សណ្តាប់ធ្នាប់សាធារណៈ។
លោក យ៉ែម បុញ្ញរិទ្ធិ អ្នកនាំពាក្យគណបក្សសង្គ្រោះជាតិនៅថ្ងៃនេះដែរមិនបានសាទរចំពោះចំណាត់ការរបស់គ.ជ.បទេ។ លោកថ្លែងថា សូមឲ្យគ.ជ.ប ធ្វើអ្វីទៅតាមច្បាប់ដែលបានកំណត់។
សូមរំលឹកផងដែរថា កាលពីថ្ងៃទី៣០ ខែមេសា ប្រធានគណបក្សសង្គ្រោះជាតិលោក សម រង្សី បានសរសេរ លិខិតមួយទៅកាន់ លោក អ៊ឹម សួស្តី ប្រធានគ.ជ.ប ស្នើចាត់វិធានការជាបន្ទាន់ចំពោះអាជ្ញាធរដែលបានរំលោភច្បាប់ បទបញ្ជា និងនីតិវិធី ដោយរារាំងសិទ្ធិបេក្ខជន និងគណបក្សសង្គ្រោះជាតិ ក្នុងការធ្វើយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុកខណ្ឌ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ