កូរ៉េខាងត្បូង៖កាពីទែនត្រូវបានចាប់ខ្លួន ក្តីសង្ឃឹមស្វែងរកអ្នករស់រានមានជីវិតកាន់តែស្តួចស្តើង
ចុះផ្សាយនៅថ្ងៃ៖
ស្តាប់ - ០៦:០២
នៅក្នុងប្រទេសកូរ៉េខាងត្បូង ៣ថ្ងៃ ក្រោយពីគ្រោះថ្នាក់លិចសាឡាងមក ក្រុមអ្នកជួយសង្រ្គោះបាន និងកំពុងបន្តការងាររបស់ខ្លួនយ៉ាងសកម្មដើម្បីស្វែងរកអ្នករស់រានមានជីវិត។ តុល្យការបណ្តោះអាសន្នចុងក្រោយឲ្យដឹងថា មានអ្នករួចជីវិតចំនួន ១៧៤នាក់ អ្នកស្លាប់ចំនួន ២៩នាក់ និងនៅបាត់ខ្លួនចំនួន ២៧៣នាក់ផ្សេងទៀត។ គួររម្លឹកជូនឡើងវិញថា នៅពេលមានគ្រោះថ្នាក់ សាឡាងកំពុងដឹកអ្នកដំណើរចំនួន ៤៧៥នាក់ ក្នុងនោះមានសិស្សសាលា ៣៥២នាក់។ ពេលវេលាកាន់តែរំកិលទៅមុខ ក្តីសង្ឃឹមថានឹងរកឃើញអ្នកនៅរស់រានមានជីវិតក៏កាន់តិចទៅៗដែរ។ ទន្ទឹមគ្នានេះ លោកកាពីទែន លី យ៉ុនសឺក (Lee Joon-Seok) ដែលបើកសាឡាងនោះទើបត្រូវបានប៉ូលិសចាប់ខ្លួននៅរាត្រីយប់ថ្ងៃសុក្រ ទី១៨ មេសា។
ក្រៅពីចាប់ខ្លួនរូបលោកកាពីទែន លី យ៉ុនសឺក ប៉ូលិសក៏បានឃាត់ខ្លួនបុគ្គលិក ២នាក់ផ្សេងទៀតដែលជាដៃស្តំារបស់លោកកាពីទែន។ មានអាយុ ៦៩ឆ្នំា លោកកាពីទែន លី យ៉ុនសឺកបានជាប់ចោទចំនួន ៥ករណី ពិសេសពីបទធ្វេសប្រហែស និងការរំលោភបំពានច្បាប់សមុទ្រដោយរត់ចោលសាឡាង។ សូមជម្រាបជូនថា នៅពេលដែលសាឡាងកំពុងជួបគ្រោះថ្នាក់ លោកកាទែនលី យ៉ុនសឺកមិនបាននៅនឹងចង្កូតសាឡាងទេ គឺកំពុងស្ថិតនៅកន្ទុយសាឡាងដោយទុកឲ្យដៃស្តំារបស់លោកជាអ្នកបើកបរជំនួស។ មួយវិញទៀត នៅពេលដែលដឹងថា សាឡាងនោះត្រូវលិចចូលសមុទ្រហើយ លោកកាពីទែនបែរជាបានអំពាវនាវឲ្យអ្នកដំណើរកុំជ្រួលច្របល់ ព្រមទំាងរារំាងមិនឲ្យអ្នកដំណើរងើបពីកៅអីចេញពីបន្ទប់មកខាងក្រៅទៅវិញ។
លោកកាពីទែនបានហាមឃាត់គេឯងមិនឲ្យជ្រួលច្របល់ តែរូបលោក និងបុគ្គលិកមួយចំនួនដែលបម្រើការនៅក្នុងសាឡាងនោះបែរជាបាននំាគ្នារត់យករួចខ្លួនទៅវិញ។ អ៊ីចឹងសួរថា បើមេកើយ និងអ្នកចាត់ចែងនំាគ្នារត់យកតែព្រះអាយូសអស់ហើយនោះ តើមានអ្នកណាជាអ្នកមើលការខុសត្រូវជួយរំដោះកូនចៅ?។ ក្រុមហ៊ុនសាឡាងនោះបានបញ្ជាក់ថា លោក លី យ៉ុនសឺក ជាកាពីទែនដែលមានបទពិសោធន៍អស់ជាច្រើនឆ្នំាមកហើយ និងដែលលោកបានបើកសាឡាងឆ្លងពីកោះអ៊ីនឆុន ទៅកោះយីយូតំាងពី ៨ឆ្នំាកន្លងមក។ តែអ្វីដែលគ្រប់គ្នាកំពុងទម្លាក់កំហុសលើលោកកាពីទែនពេលនេះ មិនមែនបទពិសោធន៍ទុំជោររបស់គាត់ទេ តែរឿងដែលគាត់មិនបានស្ថិតជាប់នឹងចង្កូតសាឡាង និងមិនបានចេញមុខចាត់ចែងនៅពេលមានគ្រោះថ្នាក់។
ឆ្លើយនឹងសំណួរអ្នកកាសែតដែលសួរថា តើលោកមានបានចេញបញ្ជាឲ្យរំដោះអ្នកដំណើរចេញពីសាឡាង ពិសេសចេញពីបន្ទប់ក្នុងសាឡាងនោះដែរឬទេ?, លោកកាពីទែនបានឆ្លើយថា មាន និងថែមទំាងបានធ្វើការសុំទោសក្រុមគ្រួសារជនរងគ្រោះ។
អាថ៌កំបំាងនៅបន្តមានជុំវិញគ្រោះថ្នាក់លិចសាឡាង
ការស៊ើបអង្កេតកំពុងបន្តធ្វើដែលរហូតមកដល់ម៉ោងនេះ គេនៅមិនទាន់ដឹងពីមូលហេតុច្បាស់លាស់ទេ។ បើយោងតាមសាក្សីដែលជិះនៅក្នុងសាឡាងនោះ និងដែលបានរួចជីវិតឲ្យដឹងថា មុននឹងសាឡាងនោះឈប់នឹងថ្កល់មួយកន្លែង ពួកគេបានឮសូរសម្លេងបុកទង្គិចយ៉ាងខ្លំាង។ តាមរយៈសម្មតិកម្មនេះនំាឲ្យគេសន្និដ្ឋានថា ប្រហែលជាសាឡាងនោះបានបើកបុកនឹងថ្ម ឬមួយក៏វត្ថុអ្វីមួយដែលលិចក្នុងទឹក។ តែនៅមានសម្មតិកម្មមួយចំនួនទៀតត្រូវបានលើកឡើងដោយក្រុមអ្នកស៊ើបអង្កេត ទី១ អាចមកពីកំហុសរបស់អ្នកបើកបរ ទី២ អាចមកពីបញ្ហានៃការរៀបចំផ្ទុកអីវ៉ាន់មិនបានត្រឹមត្រូវ និងទី៣ អាចមកពីរចនាសម្ព័ន្ធ និងបញ្ហាបច្ចេកទេសរបស់សាឡាងដែលមានអាយុ ២០ផ្លាយឆ្នំាមកហើយ។
ការលើកឡើងពីការរៀបចំផ្ទុកអីវ៉ាន់មិនបានត្រឹមត្រូវនៅក្នុងសាឡាងត្រូវបានគេផ្តោតសំខាន់លើចំនួនរថយន្តទំាង ១៥០គ្រឿងដែលមាននៅក្នុងសាឡាងនោះ ពិសេសគឺរថយន្តទំាងនោះប្រហែលជាបានរអិលទៅតែម្ខាងដែលនំាឲ្យសាឡាងបាត់លំនឹង រួចក៏ផ្អៀងលិចចូលក្នុងសមុទ្រតែម្តង។ យ៉ាងណាក៏ដោយ គេត្រូវរង់ចំានៅពេលខាងមុខ ទើបអាចដឹងពីមូលហេតុច្បាស់លាស់។
ប្រតិបត្តិការជួយសង្រ្គោះកំពុងបន្តដោយគ្មានសង្ឃឹមនឹងរកឃើញអ្នកនៅជីវិត
ប្រតិបត្តិការជួយសង្រ្គោះកំពុងបន្តធ្វើយ៉ាងសកម្ម ដោយរដ្ឋអំណាចបានប្រើគ្រប់មធ្យោបាយទំាងអស់ ពិសេសក្រុមអ្នកជួយសង្រ្គោះមុជទឹក។ ក្រុមអ្នកជួយសង្រ្គោះមុជទឹកបាន និងកំពុងព្យាយាមស្វែងរកអ្នករស់រានមានជីវិតដែលកំពុងជាប់គំាងនៅក្នុងបន្ទប់សាឡាង។ សូមជម្រាបជូនថា នៅពេលសាឡាងកំពុងលិចចូលក្នុងសមុទ្រ អ្នកដំណើរនៅក្នុងបន្ទប់សាឡាងមិនត្រូវបានគេអនុញ្ញាតឲ្យងើបចាកចេញពីបន្ទប់ទេ។ ក្រុមអ្នកជួយសង្រ្គោះសង្ឃឹមថា ទឹកមិនអាចជ្រាបចូលដោយគំហុកទៅក្នុងបន្ទប់ទំាងនោះ និងប្រហែលជាមានអ្នកខ្លះកំពុងមានដង្ហើមនៅឡើយ។ នៅថ្ងៃសុក្រ ទី១៨ មេសាម្សិលមិញ ក្រុមអ្នកជួយសង្រ្គោះថែមទំាងបានបាញ់បញ្ចូលខ្យល់អុកស៊ីសែនទៅក្នុងបន្ទប់មួយចំនួន។
តែនៅព្រឹកថ្ងៃសៅរ៍ ទី១៩ មេសានេះ ក្រុមអ្នកជួយសង្រ្គោះមុជទឹកបានប្រាប់ឲ្យដឹងថា ពួកគេបានប្រទះឃើញតាមបង្អូចសាឡាងនូវសាកសពចំនួន ៣នាក់កំពុងអណ្តែតនៅខាងក្នុងសាឡាងនោះ។ ទន្ទឹមគ្នានេះ ក្រុមអ្នកជួយសង្រ្គោះក៏បានបញ្ជាក់ពីការលំបាកបង្កឡើងដោយអាកាសធាតុ និងការមើលមិនច្បាស់នៅពេលដែលគេទៅដល់តួសាឡាងនោះ។ យ៉ាងណាក៏ដោយ ពេលវេលាកាន់តែខិតទៅមុខ សាឡាងនោះក៏កាន់តែបន្តធ្លាក់ខ្លួនដោយសន្សឹមៗទៅបាតសមុទ្រ នោះបើទោះបីជាគេបានប្រើពោងចងដើម្បីទប់វាក៏ដោយ។ ពេលវេលាកាន់តែរំកិលទៅមុខ ក្តីសង្ឃឹមស្វែងរកអ្នកនៅមានជីវិតក៏កាន់តែស្តួចស្តើងទៅៗ។
ទន្ទឹមគ្នានេះ កំហឹងក្តៅក្រហាយ លាយឡំនឹងក្តីទុក្ខសោកក៏បាន និងកំពុងផ្ទុះចេញកាន់តែខ្លំាងឡើងពីសំណាក់ក្រុមគ្រួសារជនរងគ្រោះ។ កំហឹងប្រឆំាងនឹងរដ្ឋាភិបាលពីការភូតភរ និងភាពយឺតយ៉ាវក្នុងការជួយសង្រ្គោះ។ សម្រាប់ប្រជាជនកូរ៉េខាត្បូងទំាងអស់ នេះពិតជាមហាសោកនាដកម្មមួយដែលពួកគេមិននឹកស្មានថាអាចកើតមាននៅក្នុងសម័យនេះទេ។ ប៉ុន្មានថ្ងៃជាប់ៗគ្នានេះ គ្រប់មធ្យោបាយឃោសនាមហាជននៅកូរ៉េខាងត្បូងបានផ្លាស់ប្តូរកម្មវិធីរបស់ខ្លួនដោយនំាគ្នាផ្តោតសំខាន់លើតែព្រឹត្តិការណ៍មួយនេះ និងដែលជាទូទៅ មិនមានដំណឹងល្អទេសម្រាប់ក្រុមគ្រួសារជនរងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ