អូតង់ចង់បង្ហាញវត្តមាននិងសមត្ថភាពប្រយុទ្ធដាក់រុស្ស៊ី
ចុះផ្សាយនៅថ្ងៃ៖
ស្តាប់ - ០៦:២៦
អូតង់មិនលេងសើចនឹងវិបត្តិនៅភាគខាងកើតអ៊ុយក្រែនទេ ! អូតង់គ្រោងពង្រឹងវត្តមានកងទ័ព នៅតាមបណ្តាប្រទេសសមាជិក ដែលមានព្រំដែនជាប់ជាមួយនឹងរុស្ស៊ី ព្រមទាំងគម្រោងបង្កើតកម្លាំងប្រតិកម្មរហ័ស ដើម្បីទប់ទល់នឹងរុស្ស៊ី។ គម្រោងនេះនឹងត្រូវគេលើកយកទៅជជែកគ្នា នៅក្នុងជំនួបកំពូលអូតង់ នៅថ្ងៃព្រហស្បតិ៍ និងថ្ងៃសុក្រឆាប់ៗនេះ។ បើតាមប្រសាសន៍លោក អង់ដ្រេ រ៉ាស្មូសិន អគ្គលេខាធិការអង្គការអូតង់ សម្ព័ន្ធអាត្លង់ទិក នឹងបញ្ជូនកម្លាំងរាប់ពាន់នាក់ទៅដាក់ពង្រាយនៅតាមភាគខាងកើតអឺរ៉ុប ។
នៅក្នុងជំនួបកំពូលពីរថ្ងៃទី ប្រទេសជាសមាជិកអង្គការអូតង់ទាំង២៨ ត្រូវអនុម័តលើផែនការត្រៀមសកម្មភាព ដើម្បីឆ្លើយតបទៅនឹងឥរិយាបថរុស្ស៊ីក្នុងវិបត្តិអ៊ុយក្រែន ដែល ការគំរាមកំហែងផ្ទាល់ដល់ ប្រទេសជាសមាជិកអូតង់មានព្រំដែនជាប់រុស្ស៊ី។ ផែនការសកម្មភាព Nato Response Force ដែលនឹងអនុញ្ញាតឱ្យអូតង់អាចបញ្ចេញនិងពង្រាយទ័ព នៅផ្ទាល់កន្លែងរងការគំរាមកំហែងបានយ៉ាងឆាប់រហ័ស ក្នុងរយៈពេលតែពីរបីថ្ងៃ។ នេះបើតាមការប្រកាសឱ្យដឹងរបស់លោកអគ្គលេខាធិការអង្គការអូតង់។
គ្មានសង្គ្រាម គ្មានអាវុធ
ចំណែកអន្តរាគមន៍យោធា មិនមែនជាជម្រើសនិងជាប្រធានបទដែលអូតង់ត្រូវលើកយកមិនពិភាក្សាវែកញែកគ្នាទេ ! ហើយក៏គ្មានប្រទេសជាសមាជិកអូតង់ណាគាំទ្រគំនិតនេះ និងក៏គ្មានប្រទេសណាសមាជិកណាមួយស្ម័គ្រចិត្តចេញទៅប្រយុទ្ធតែម្នាក់ឯងដែរ។
ម្យ៉ាងវិញទៀត បើតាមច្បាប់ អូតង់គ្មានកាតព្វកិច្ចអ្វីសោះនឹងចេញធ្វើអន្តរាគមន៍យោធានៅអ៊ុយក្រែននោះ ! អ៊ុយក្រែនមិនមែនជាសមាជិកអង្គការអូតង់ ដូច្នេះអ៊ុយក្រែនមិនអាចទទួលប្រយោជន៍ និងការពារអ្វីពីអូតង់ឡើយ ! បើតាមមាត្រា៥របស់អូតង់ សមាជិកទាំងអស់មានភារកិច្ចរួម ចេញប្រយុទ្ធប្រសិនបើមានសមាជិកណាមួយរងការវាយប្រហារពីសត្រូវ។ សម្រាប់ពេលនេះ ប្រទេសជាអតីតសហភាពសូវៀត និងជាសមាជិកអូតង់ មានជាអាទិ៍ក្រុមប្រទេសតំបន់បាល់កង់ ប៉ូឡូញ រ៉ូមានី ឬប៊ុលហ្ការី កំពុងព្រួយបារម្ភខ្លាំងខ្លាចក្រែងរងគ្រោះដូចអ៊ុយក្រែនដែរ ប្រសិនបើអូតង់មិនបញ្ចេញសកម្មភាពអ្វីជាក់ស្តែងម៉ឺងម៉ាត់ពេលនេះ។ ហេតុដូច្នេះហើយបានជាអូតង់ត្រូវសើរើមើលយុទ្ធសាស្ត្រ និងបេសកកម្មរបស់ខ្លួន ដោយងាកមកការពារអឺរ៉ុប។
សូមបញ្ជាក់ថា ក្រោយពេលរបបសហភាពសូវៀត និងជញ្ជាំងប៊ែរឡាំងដួលរលំទៅ អូតង់មានបេសកកម្មបន្តជាប់ឥតដាច់ នៅតំបន់បាល់កង់ នៅសូម៉ាលី ដើម្បីប្រយុទ្ធប្រឆាំងនឹងចោរសមុទ្ទ និងធ្លាយរហូតដល់ប្រទេសអាហ្វហ្កានិស្ថានដើម្បីប្រយុទ្ធប្រឆាំងនឹងអំពើភេរវនិយម ដែលលទ្ធផលដូចជាចម្រូងចម្រាសបន្តិច ឃ្លាតឆ្ងាយពីឬសគល់។ ប៉ុន្តែ ការចាប់យកតំបន់គ្រីមេអ៊ុយក្រែនមកធ្វើជារណបពីសំណាក់រុស្ស៊ីកាលពីខែមីនា និងការគំរាមកំហែងនៅភាគខាងកើតអ៊ុយក្រែន គឺដូចជាទៅជាដាស់អូតង់ឱ្យងាកមកពីគិតគូរអំពីស្ថិរភាពក្នុងតំបន់។
ពង្រឹងវត្តមាននៅភាគខាងកើតអឺរ៉ុប
ទាហានរាប់សិបពាន់នាក់ ជាកងទ័ពអាកាស កងទ័ពថ្មើរជើង និងជើងទឹក សហការជំនួយដោយកងកម្លាំងពិសេស នឹងត្រូវដាក់ពង្រាយនៅភាគខាងកើតអឺរ៉ុប ក្នុងរវាងពីរបីថ្ងៃទៀត និងសម្រាប់រយៈពេលយូរ តាមសភាពការណ៍តម្រូវ ក្នុងទឹកដីរបស់ប្រទេសជាសមាជិកអូតង់ ច្រើនកន្លែង និងអាចធ្វើលំហាត់អនុវត្តមានញយដង។ វត្តមានទ័ពនៅភាគខាងកើតអឺរ៉ុបនេះ មិនតម្រូវឱ្យបង្កើតមូលដ្ឋានទ័ពអចិន្ត្រៃយ៍ឡើយ ព្រោះវាផ្ទុយទៅនឹងការព្រមព្រៀងគ្នារវាងអូតង់និងរុស្ស៊ីកាលពីឆ្នាំ១៩៩៧ គឺមានតែការតាំងទីបញ្ជួនទ័ព អ្នកឯកទេសផ្នែកបញ្ជាការ ចាត់ចែង សម្ភារៈអាវុធយុទ្ធភ័ណ្ឌ បញ្ឈរលើទីតាំងណាមួយរួចជាស្រេចត្រៀមចាំតែប្រយុទ្ធប្រសិនបើសភាពការណ៍តម្រូវ និងចាំបាច់។ ពោលគឺកម្លាំងអូតង់មានវត្តមានខ្លាំងជាងមុននៅអឺរ៉ុបភាគខាងកើត។
សូមបញ្ជាក់ថា វត្តមានកងទ័ពអូតង់នេះ មិនមែនដាក់ពង្រាយនៅភាគខាងកើតអ៊ុយក្រែនទេ។ ព្រោះអូតង់គ្មានអាវុធ គ្មានកម្លាំងទ័ព ដោយផ្ទាល់ជារបស់អង្គការឡើយ។ រាល់កម្លាំងនិងសម្ភារៈជាសេចក្តីត្រូវការរបស់អង្គការ ត្រូវផ្តល់ដោយគឺរដ្ឋជាសមាជិក តាមរយៈគោលការណ៍ព្រមព្រៀមរួម ឬតាមការស្ម័គ្រចិត្ត។ ប្រសិនបើអ៊ុយក្រែនចង់បានអាវុធឬអ្វីផ្សេង មិនមែនត្រូវមកសុំអូតង់ឡើយ។ ក្នុងដំណាក់កាលនេះអ៊ុយក្រែនបានត្រឹមស្នើសុំជំនួយពីក្រុមសម្ព័ន្ធមិត្ត ជាជាងរង់ចាំកិច្ចសហប្រតិបត្តិការទ្វេភាគីផ្ទាល់ជាមួយអូតង់។ បើអ៊ុយក្រែនចង់បានអន្តរាគមន៍ពី អូតង់ទាល់ក្លាយខ្លួនជាសមាជិកអង្គការ ប៉ុន្តែការចរចាត្រូវបានអាក់ខានអស់ជាច្រើនឆ្នាំ ដូច្នេះផ្លូវដើរនៅវែងឆ្ងាយទៀតណាស់។
សម្រាប់វិបត្តិអ៊ុយក្រែន អូតង់នៅតែជ្រើសរើសដំណោះស្រាយនយោបាយ និងសេដ្ឋកិច្ចជាជាងប្រើកម្លាំងយោធា ព្រោះអូតង់ជាអង្គការដែលមានគោលការណ៍ការពារ ! ការពារប្រសើរជាព្យាបាល ព្រោះទំនាក់ទំនងជាមួយរុស្ស៊ីអាចនឹងបន្តអូសបន្លាយតានតឹងយូរ ! នេះបើតាមតំណាងការទូតអូតង់ ដែលទំនងជាចង់ឆ្លើយតបទៅនឹងសេចក្តីអំពាវនាវរបស់លោកបានគីមូន អគ្គលេខាធិការអង្គការសហប្រជាជាតិដែលរំលឹកថាគ្មានដំណោះស្រាយយោធាឱ្យវិបត្តិអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ