ភូមា -

អត្ថបទចុះផ្សាយនៅថ្ងៃ អង្គារ 11 តុលា 2011 - ព័ត៌មានទើបកែប្រើលើកចុងក្រោយ ថ្ងៃ អង្គារ 11 តុលា 2011

រដ្ឋាភិបាលលើកលែងទោសដល់ទណ្ឌិតជាង ៦៣០០នាក់

រដ្ឋាភិបាលស៊ីវិលភូមា ដឹកនាំដោយប្រធានាធិបតីថេន សេន

REUTERS/Myanmar News Agency/Handout

ដោយ ឈាង បុប្ផា

រដ្ឋាភិបាលស៊ីវិលភូមាបានបោះមួយជំហានទៅមុខជាវិជ្ជមាន ដើម្បីបំពេញចិត្តសហគមន៍អន្តរជាតិ។ នៅថ្ងៃអង្គារនេះ នៅប៉ុន្មានម៉ោងក្រោយសំណើសុំរបស់ក្រុមប្រឹក្សាជាតិសិទ្ធិមនុស្សភូមា ដែលជាស្ថាប័នបង្កើតដោយរដ្ឋាភិបាល ទូរទស្សន៍រដ្ឋភូមាបានប្រកាស ពីការដោះលែងអ្នកទោស ជាង ៦៣០០នាក់ ដោយមិនបានបញ្ជាក់ថា តើអ្នកទោសនយោបាយ នឹងស្ថិតនៅក្នុងចំណោមអ្នកទោសដែលត្រូវដោះលែងដែរឬទេ។

សេចក្តីរាយការណ៍របស់ឈាង បុប្ផា

ស្តាប់ (02:10)

11/10/2011 by ឈាង បុប្ផា

វគ្គដោះលែងអ្នកទោសលើកទីមួយ នឹងធ្វើនៅថ្ងៃពុធស្អែក។ ប៉ុន្តែ គេមិនបានដឹងថា តើក្នុងចំនោមនោះ នឹងមានអ្នកទោសនយោបាយដែលសហគមន៍អន្តរជាតិ និងគណបក្សប្រឆាំងធ្លាប់ទាមទារឲ្យដោះលែងដែរឬទេ។ យ៉ាងណាក៏ដោយ កាលពីថ្ងៃចន្ទម្សិលមិញ មន្រ្តីរដ្ឋាភិបាលភូមាបាននិយាយប្រាប់ទីភ្នាក់ងារព័ត៌មានបារាំងថា គេនឹងដោះលែងអ្នកទោសនយោបាយ នៅប៉ុន្មានថ្ងៃខាងមុខនេះ។ នេះជាលើកទីមួយដែលស្ថាប័នរដ្ឋភូមាប្រើពាក្យអ្នកទោសនយោបាយ ព្រោះកន្លងមក ភូមាក្រោមការគ្រប់គ្រងរបស់របបសឹក តែងតែបដិសេធថា គ្មានអ្នកទោសនយោបាយនៅក្នុងពន្ធនាគារទេ។

នៅក្នុងសំបុត្រសាធារណៈផ្ញើទៅប្រធានាធិបតី គណៈកម្មាការជាតិដើម្បីសិទ្ធិមនុស្សភូមាដែលទើបបង្កើតឡើង កាលពីខែមុន ដោយរដ្ឋាភិបាលលោកថេន សេន បានសរសេរសុំទៅរដ្ឋាភិបាលឲ្យដោះលែងអ្នកទោសមនសិការ ទៅតាមការអំពាវនាវរបស់អគ្គលេខាធិការអង្គការសហប្រជាជាតិ និងប្រទេសមួយចំនួន។

គួររំលឹកជូនថា អាមេរិក សហភាពអឺរ៉ុប និងគណបក្សប្រឆាំងរបស់លោកស្រីអ៊ុងសាន ស៊ូជីនៅតែទាមទារឲ្យរដ្ឋាភិបាលដោះលែងអ្នកទោសនយោបាយ ទាំងជាង២០០០នាក់ ដែល អ្នកទាំងនោះគឺជាសកម្មជនគណបក្សប្រឆាំង សិល្បករ អ្នកកាសែត មេធាវី និងនិស្សិត

តាមរយៈ ការប្រកាសការលើកលែងទោសដល់អ្នកទោសនយោបាយ រដ្ឋាភិបាលភូមាចង់បង្ហាញថា ខ្លួនកំពុងធ្វើកំណែទម្រង់ស៊ីជម្រៅ ទៅតាមការចង់បានរបស់សហគមន៍អន្តរជាតិហើយ។ មន្រ្តីការបរទេសអាមេរិកទទួលបន្ទុកកិច្ចការអាស៊ីប៉ាស៊ីហ្វិកទទួលស្គាល់ថា គេពិតជាបានឃើញការវិវឌ្ឍជាវិជ្ជមាន នៅក្នុងប្រទេសភូមា។

អ្នកកាសែតត្រូវគេអនុញ្ញាតឲ្យចូលយកព័ត៌មាននៅក្នុងកិច្ចប្រជុំសភា ហើយការត្រួតពិនិត្យខ្លឹមសារអត្ថបទក៏លែងសូវមាន។ រដ្ឋាភិបាលរបស់លោកថេន សេននៅបានផ្តើមចរចានយោបាយ មួយលើក ជាពីរលើក ជាមួយមេដឹកនាំប្រឆាំង ដែលរបបសឹកទើបដោះលែង កាលពីចុងឆ្នាំ ២០១០។ ភូមាធ្លាប់បានដោះលែងអ្នកទោស ជាង ១ម៉ឺននាក់កន្លងមកហើយ ប៉ុន្តែ មិនត្រូវចិត្តសហគមន៍អន្តរជាតិ ដោយសារមិនមានអ្នកទោសនយោបាយក្នុងចំណោមអ្នកទោសដែលរដ្ឋាភិបាលដោះលែង។

រដ្ឋាភិបាលភូមាបច្ចុប្បន្នចរចា និងធ្វើការងារជាមួយគណបក្សប្រឆាំង ដែល របបសឹក ក្នុងអតីតកាលបដិសេធ ដាច់អហង្កាមិនធ្វើកន្លងមក។ ការផ្លាស់ប្តូរនយោបាយភូមាសឹង ១៨០អង្សារ មានឡើង ក៏មកពីភូមាត្រូវការគាំទ្រពីសហគមន៍អន្តរជាតិ ដើម្បីបានកៅអីប្រធានអាស៊ាន ឆ្នាំ ២០១៤។ ម្យ៉ាងទៀត ភូមាដែលរស់ឯកោ ដោយសារទណ្ឌកម្មសេដ្ឋកិច្ចពីអាមេរិក និងអឺរ៉ុប ក៏ត្រូវការជំនួយអន្តរជាតិដើម្បីចាកចេញពីភាពក្រីក្រ និងឯករាជ្យ លែងពឹងអាស្រ័យតែទៅលើប្រទេសចិនកុម្មុយនិស្ត។