ភូមា -

អត្ថបទចុះផ្សាយនៅថ្ងៃ អាទិត្យ 14 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 14 តុលា 2012

គណបក្សកាន់អំណាចភូមាបើកធ្វើសមាជដើម្បីកំណត់យុទ្ធសាស្រ្តថ្មី

រូបសញ្ញារបស់គណបក្ស USDP ដែលកំពុងកាន់អំណាចនៅភូមា

wikipedia

ដោយ សេង ឌីណា

នៅថ្ងៃអាទិត្យនេះ គណបក្សដែលកំពុងកាន់អំណាចនៅភូមា បានចាប់ផ្តើមបើកធ្វើសមាជរបស់ខ្លួន ជាលើកដំបូង ដើម្បីកំណត់យុទ្ធសាស្រ្តបក្ស សម្រាប់ការបោះឆ្នោតជាតិ នៅឆ្នាំ២០១៥។ គណបក្សក៏ត្រូវបោះឆ្នោតរើសប្រធានថ្មីផងដែរ ដើម្បីជំនួសលោក ថេន សេន ដែលបានលាឈប់ ដើម្បីទៅកាន់តំណែងជាប្រធានាធិបតី។

សេចក្តីរាយការណ៍របស់ សេង ឌីណា

ស្តាប់ (02:41)

14/10/2012

គណបក្សសាមគ្គី និងអភិវឌ្ឍសហភាព (ហៅកាត់តាមភាសាអង់គ្លេសថា USDP) ត្រូវបានបង្កើតឡើងដោយអតីតមេដឹកនាំរបបសឹកភូមា កាលពីខែមិថុនា ឆ្នាំ២០១០ ដើម្បីត្រៀមប្រែក្លាយរបបដឹកនាំភូមា ពីរបបសឹក ទៅជារបបនយោបាយស៊ីវិល។

គណបក្ស USDP ដែលមានលោក ថេន សេន ជាប្រធាន បានទទួលជោគជ័យ នៅក្នុងការបោះឆ្នោតជាតិ ឆ្នាំ២០១០ ដោយទទួលបានសំឡេងភាគច្រើន ទាំងនៅក្នុងរដ្ឋសភា និងព្រឹទ្ធសភា។ ក៏ប៉ុន្តែ ការបោះឆ្នោតនោះត្រូវបានសហគមន៍អន្តរជាតិរិះគន់ថា មិនបានប្រព្រឹត្តទៅដោយសេរី និងយុត្តិធម៌ ដោយសារតែមានការលួចបន្លំសន្លឹកឆ្នោតផង និងការរារាំងមិនឲ្យលោកស្រីអ៊ុង សានស៊ូជី ចូលរួមផង។

នៅខែកុម្ភៈ ឆ្នាំ២០១១ លោក ថេន សេន បានលាលែងពីតំណែងជាប្រធានបក្ស ដើម្បីទៅកាន់តំណែងជាប្រធានាធិបតី ហើយតំណែងប្រធានគណបក្ស USDP ក៏នៅទំនេរចាប់ពីពេលនោះមក ដែលគេគ្រោងនឹងបោះឆ្នោតជ្រើសរើសប្រធានបក្សថ្មី នៅក្នុងសមាជ ដែលបើកធ្វើ នៅថ្ងៃអាទិត្យនេះ។ ជាទូទៅ គេនាំគ្នាប្រមើលមើលថា លោក ស្វេ ម៉ាន់ (Shwe Mann) ដែលបច្ចុប្បន្នជាអនុប្រធានបក្ស និងជាប្រធានរដ្ឋសភា ទំនងជានឹងត្រូវជាប់ឆ្នោតជាប្រធានបក្សថ្មីនេះ។

នៅក្នុងសុន្ទរកថាបើកសមាជបក្ស នៅថ្ងៃអាទិត្យនេះ លោកស្វេ ម៉ាន់ បានថ្លែងអំពាវនាវដល់សមាជិកបក្សទាំងអស់ឲ្យចូលរួមយ៉ាងសកម្ម នៅក្នុងដំណើរការប្រជាធិបតេយ្យ ដើម្បីផលប្រយោជន៍រួមរបស់ប្រជាជន និងទៅតាមនយោបាយកំណែទម្រង់របស់រដ្ឋាភិបាល។ លោកក៏បានថ្លែងផងដែរ សមាជនៅពេលនេះ គឺជាឱកាសមួយ ដើម្បីឲ្យគណបក្ស USDP រៀបចំធ្វើកំណែទម្រង់ កំណត់យុទ្ធសាស្រ្តថ្មី សម្រាប់ការបោះឆ្នោតនៅពេលខាងមុខ។

អ្នកសង្កេតការណ៍នយោបាយភូមាជាច្រើនយល់ថា គណបក្ស USDP កំពុងតែបារម្ភចំពោះការបោះឆ្នោតជាតិ នៅឆ្នាំ២០១៥ខាងមុខ គឺបារម្ភនឹងប្រជាប្រិយភាពរបស់គណបក្ស NLD របស់លោកស្រី អ៊ុង សានស៊ូជី។ ហើយគេគិតថា ក្រោយពីបានធ្វើកំណែទម្រង់នយោបាយយ៉ាងច្រើនសន្ធឹកសន្ធាប់ រហូតបានស្តារមុខមាត់ នាំភូមាចេញពីភាពឯកោក្នុងឆាកអន្តរជាតិដូចសព្វថ្ងៃនេះ គណបក្ស USDP ទំនងជាមិនចង់ ឬមិនអាច ត្រឡប់ទៅប្រើយុទ្ធសាស្រ្តចាស់ គឺការគំរាមកំហែង និងការលួចបន្លំសន្លឹកឆ្នោត ដូចពីមុនទៀតទេ។ ដូច្នេះហើយបានជាលោក ស្វេ ម៉ាន់ លើកឡើងពីការធ្វើកំណែទម្រង់បក្ស និងកំណត់យុទ្ធសាស្រ្តថ្មី នៅក្នុងសមាជបក្សពេលនេះ។

កាលពីពេលថ្មីៗនេះ អគ្គលេខាគណបក្ស USDP បានប្រាប់ទីភ្នាក់ងារសារព័ត៌មានបារាំង AFP ថា គណបក្ស NLD របស់លោកស្រីអ៊ុង សានស៊ូជី មានប្រជាប្រិយភាព គឺប្រហែលជាមកពីប្រជាជនភូមាគិតថា គណបក្សនេះអាចធ្វើការបានល្អជាង ក្នុងការបម្រើប្រជាជន។ ដូច្នេះ ដើម្បីយកឈ្នះគណបក្ស NLD សមាជិកបក្ស USDP ចាំបាច់ត្រូវតែខិតខំធ្វើការតាមមូលដ្ឋាន ដើម្បីបង្ហាញឲ្យប្រជាជនឃើញដោយផ្ទាល់នឹងភ្នែកថាតើអ្នកណាសម្រេចបានសមិទ្ធផលជាក់ស្តែងច្រើនជាង?

ប្រសិនបើគណបក្សកាន់អំណាចពិតជាជ្រើសរើសយកយុទ្ធសាស្រ្តបែបនេះពិតប្រាកដមែន វាគឺជារឿងល្អមួយសម្រាប់ភូមា ពីព្រោះថា គណបក្សដែលបង្កើតឡើងដោយអតីតមេដឹកនាំរបបសឹក កំពុងតែចាប់យកគោលការណ៍នៃលទ្ធិប្រជាធិបតេយ្យ៕

tags: ភូមា