ទស្សនកិច្ចជាប្រវត្តិសាស្ត្ររបស់ប្រធានាធិបតីភូមានៅអាមេរិក
ប្រធានាធិបតីភូមាលោក ថេនសេននឹងត្រូវអញ្ជើញទៅបំពេញទស្សនកិច្ចនៅទីក្រុងវ៉ាស៊ីនតោនសហរដ្ឋអាមេរិកនៅអំឡុងខែឧសភានេះ។ ដំណើរទស្សនកិច្ចនេះ ជាសញ្ញាគាំទ្រមួយរបស់សហរដ្ឋអាមេរិកចំពោះលោកប្រធានាធិបតីថេនសេនក្នុងការបន្តធ្វើកំណែទម្រង់នានានៅក្នុងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
លោកថេនសេន ជាប្រមុខដឹកនាំភូមាទីមួយដែលនឹងត្រូវអញ្ជើញទៅបំពេញទស្សនកិច្ចនៅសហរដ្ឋអាមេរិកចាប់តាំងពីជាងកន្លះសតវត្សរ៍មកហើយ។ លោកថេនសេននឹងអញ្ជើញទៅដល់ទីក្រុងវ៉ាស៊ីនតោននៅថ្ងៃទី២០ឬ២១ឧសភាខាងមុខ-នេះបើយោងតាមប្រភពសភាអាមេរិកដោយសុំមិនបញ្ចេញឈ្មោះ។
ក្នុងអំឡុងដំណើរទស្សនកិច្ចនេះ លោកប្រធានាធិបតីភូមានឹងត្រូវជួបសន្ទនាជាមួយលោកបារ៉ាកអូបាម៉ានៅសេតវិមាន។ សេតវិមានដែលពុំចង់ធ្វើអត្ថាធិប្បាយនៅជុំវិញដំណើរទស្សនកិច្ចរបស់ប្រធានាធិបតីភូមាទេ ដោយ គ្រាន់តែគូសបញ្ជាក់នាពេលថ្មីៗនេះ ថាខ្លួនបានសិក្សារួចហើយពីបញ្ហានេះ។
ជាដំណើរទស្សនកិច្ចលើកដំបូងបង្អស់របស់ប្រមុខដឹកនាំភូមាម្នាក់នៅទីក្រុងវ៉ាស៊ីនតោន ចាប់តាំងពីជំនាន់លោកប្រធានាធិបតី Ne Win ដែលបានអញ្ជើញមកកាន់សហរដ្ឋអាមេរិកនៅឆ្នាំ ១៩៦៦ តាមការអញ្ជើញរបស់លោកប្រធានាធិបតី Lyndon Johnson មក។
លោកប្រធានាធិបតី អូបាម៉ាវិញ ធ្លាប់បានអញ្ជើញទៅប្រទេសភូមានៅខែវិច្ឆិកាមុនគឺក្រោយពីលោកជាប់ឆ្នោតជាប្រធានាធិបតីអាណត្តិថ្មី។ នៅឱកាសនោះ លោកអូបាម៉ា បានសំដែងការអបអរសាទរចំពោះនយោបាយអន្តរកាលមួយដែលរបបភូមាថ្មី បានចាប់ផ្តើមអនុវត្តនៅក្នុងប្រទេស។ ប៉ុន្តែលោកអូបាម៉ា បានអំពាវនាវសុំ ភូមាបន្តធ្វើកំណែទម្រង់បន្ថែមទៀត ជាអាទិ៍នៅលើសំណុំរឿងជនជាតិភាគតិច។
លោកថេនសេនវិញ ក៏ធ្លាប់បានអញ្ជើញមកកាន់សហរដ្ឋអាមេរិកដែរ តែក្នុងក្របខណ្ឌមហាសន្និបាតអ.ស.ប. នៅទីក្រុង ញូវយកតែប៉ុណ្ណោះ។
គម្រោងទស្សនកិច្ចរបស់ប្រធានាធិបតីភូមានៅអាមេរិកនៅរក្សាទុកដូចតាមការសន្យា ទោះបីជាមានការជំទាស់ប្រឆាំងយ៉ាងច្រើនក៏ដោយ ក្រោយពីមានអំពើហិង្សាប្រឆាំងទៅលើជនជាតិភាគតិច Rohinghas ដែលជាអ្នកកាន់សាសនាអ៊ីស្លាម។
ថ្មីៗនេះ អង្គការការពារសិទ្ធិមនុស្សអន្តរជាតិ Human Right Wacth ដែលមានទីស្នាក់ការនៅញូវយក បានចោទភូមាថា បាន”ដឹកនាំយុទ្ធនាការបោសសំអាតជនជាតិភាគតិចមួយ” ដែលបានបណ្តាល ឲ្យជនជាតិភាគតិច Rohinghas ស្លាប់យ៉ាងហោចចំនួន២១១ នាក់ ចាប់តាំងពីខែមិថុនាឆ្នាំ២០១២។មិនតែប៉ុណ្ណោះ ពួកគេរាប់សិបពាន់នាក់ផ្សេងទៀត ត្រូវបានអាជ្ញាធរភូមា បណ្តេញចេញទាំងបង្ខំ ពីលំនៅឋានរបស់ពួកគេទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ