លោកស្រី មួរ សុខហួរនៅតែបរាជ័យដើម្បីចូលទៅកាន់ទីលានប្រជាធិបតេយ្យ
តំណាងរាស្ត្រជាប់ឆ្នោតមណ្ឌលបាត់ដំបងរបស់គណបក្សសង្គ្រោះជាតិ លោក ស្រី មួរ សុខហួរ បានព្យាយាមចូលទៅកាន់ទីលានប្រជាធិបតេយ្យសាជាថ្មី នៅព្រឹកថ្ងៃអាទិត្យទី២០មេសានេះ។ តំណាងរាស្ត្រជាស្ត្រីរូបនេះត្រូវបានក្រុមកងសន្តិសុខសាលាខណ្ឌដូនពេញ និង អាជ្ញាធរជាច្រើននាក់ផ្សេងទៀតបានរារាំងមិនអោយចូល។គោលបំណងដែលលោកស្រី មួរ សុខហួរ ធ្វើដំណើរទៅកាន់ទីលានប្រជាធិបតេយ្យនៅថ្ងៃនេះ គឺដើម្បីថ្លែងទាមទាររកយុត្តិធម៌ និងអោយមានការដំឡើងប្រាក់បៀរវត្សដល់កម្មករ។ ប៉ុន្តែអាជ្ញាធរលើកឡើងថា ទង្វើរបស់អ្នកតំណាងរាស្ត្ររូបនេះគ្រាន់តែជាឆាកសម្តែងប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៨
នេះជាបរាជ័យលើកទី៥ហើយរបស់លោកស្រី មួរ សុខហួរ ដែលបានព្យាយាមធ្វើដំណើរចូលទៅកាន់ទីលានប្រជាធិបតេយ្យ។ តំណាងរាស្ត្រជាស្ត្រីរបស់គណបក្សសង្គ្រោះជាតិរូបនេះ បានព្យាយាមជាច្រើនលើកច្រើនសា ដើម្បីចូលទៅកាន់ទីលានបញ្ចេញមតិមួយនេះ ក៏ប៉ុន្តែនៅតែមិនអាចចូលទៅបាន ដោយសារកងសន្តិសុខជាច្រើននាក់បានរារាំង និងរុញច្រានមកវិញ។ កុំថាឡើយតែជាន់នៅលើទីលានប្រជាធិបតេយ្យ សូម្បីតែនៅជិតទីនោះក៏អាជ្ញាធរហាមឃាត់ផងដែរ។ មិនសំដៅតែទៅលើតំណាងរាស្ត្រនោះទេ សូម្បីអ្នករត់ម៉ូតូឌុប និង អ្នកកាសែតដែលចុះទៅយកព័ត៌មាន ក៏អាជ្ញាធរដេញចេញពីទីលានប្រជាធិបតេយ្យ និងមិនឲ្យមានការជួបជុំទៀតផង។
លោកស្រី មួរ សុខហួរ ក្នុងសំលៀកបំពាក់អាវយឺតពណ៌ខៀវ រំលេចដោយរូបភាពកម្មកររងគ្រោះដោយការបង្ក្រាបនៅផ្នែកខាងមុខ និងកម្មករទាមទារដំឡើងប្រាក់ឈ្នួល១៦០ ដុល្លារនៅផ្នែកខាងក្រោយផងនោះ បានថ្លែងថា លោកស្រីមកទីនេះដើម្បីថ្លែងទាមទាររកយុត្តិធម៌ និងដំឡើងប្រាក់ឈ្នួល១៦០ ដុល្លារដល់កម្មករ។ ប្រឈមមុខនឹងកងសន្តិសុខដែលកំពុងរារាំងយ៉ាងច្រើននោះ តំណាងរាស្ត្រជាប់ឆ្នោតមណ្ឌលបាត់ដំបងរូបនេះបានចោទសួរថា លោកស្រីខុសច្បាប់ត្រង់ណា ហើយជម្រុញឲ្យកងសន្តិសុខទាំងនោះចាប់ខ្លួនលោកស្រី។ ប៉ុន្តែបើមិនខុសច្បាប់ទេ ឲ្យលោកស្រីចូលទៅទីលានប្រជាធិបតេយ្យ។
មិនមានអាជ្ញាធរមានសមត្ថកិច្ចណា ចេញមកបកស្រាយពីមូលហេតុដែលហាមឃាត់មិនឲ្យតំណាងរាស្ត្រគណបក្សសង្គ្រោះជាតិ ចូលទៅកាន់ទីលានប្រជាធិបតេយ្យនោះទេ។ ប៉ុន្តែមន្ត្រីសាលាខណ្ឌដូនពេញមួយរូប ដែលបដិសេធមិនប្រាប់ឈ្មោះ និងមិនព្រមផ្តល់សម្ភាសន៍ដល់អ្នកកាសែត បានលើកហេតុផលថា ដើម្បីរក្សាសន្តិសុខសណ្តាប់ធ្នាប់។ តាមរយៈឧគ្ឃោសនស័ព្ទ មន្ត្រីរូបនេះបានលើកឡើងថា សកម្មភាពរបស់លោកស្រី មួរ សុខហួរ ជាការសម្តែងឆាកល្ខោន និងជម្រុញឲ្យលោកស្រីចូលសភា។
នៅថ្ងៃនេះ ក៏មានការចួលរួមផងដែរពី លោកលោក រៀល ខេមរិន្ទ និង លោក ឡុង ប៊ុតា ដែលជាតំណាងរាស្ត្រជាប់ឆ្នោតរបស់គណបក្សសង្គ្រោះជាតិ តែសុទ្ធតែត្រូវអាជ្ញាធររារាំងដូចគ្នា។ លោកស្រី មួរ សុខហួរ នៅតែអះអាងថា លោកស្រីនឹងនៅតែមកកាន់ទីលានប្រជាធិបតេយ្យនេះជារៀងរាល់ថ្ងៃ រហូតអាជ្ញាធរអនុញ្ញាតឲ្យលោកស្រីចូលបានដោយសេរី។
គួររម្លឹកថា ក្រោយពីមានការប៉ះទង្គិចគ្នារវាងក្រុមបាតុករជាកម្មករ និងអាជ្ញាធរមានសមត្ថកិច្ចកាលពីដើមខែមករាកន្លងទៅ អាជ្ញាធរបានដាក់ទីលានប្រជាធិបតេយ្យស្ថិតក្នុងការស៊ើបអង្កេតដោយមិនឲ្យមានការជួនជុំ ឬរៀបពិធីអ្វីនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ