រុស្ស៊ី-អាមេរិក -

អត្ថបទចុះផ្សាយនៅថ្ងៃ សុក្រ 26 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 26 តុលា 2012

ម៉ូស្គូ និង វ៉ាស៊ីនតោនចោទគ្នាអំពីរឿងផ្តល់រ៉ុកកែតបាញ់យន្តហោះទៅស៊ីរី

រ៉ុកកែត stinger ដែលរុស្ស៊ីបានចោទថា អាមេរិកជាអ្នកផ្តល់ឲ្យក្រុមប្រឆាំងស៊ីរី

ដោយ កែវ ឆាយា

ពេញមួយថ្ងៃ២៥តុលាម្សិលមិញ ម្ខាងៗបានបន្លឺនូវការបកស្រាយរបស់ខ្លួន គឺថា តាមយោបល់ម៉ូស្គូ បើអាមេរិកមិនមែនជាអ្នកផ្តល់ត្រង់ៗនូវរ៉ុកកែតបែបនេះទៅពួកប្រឆាំង នៅស៊ីរីទេ ក៏យ៉ាងហោចណាស់ ក៏ជាអ្នកសម្របសម្រួលដឹកនាំ ការផ្តល់នេះតែម្តង ប៉ុន្តែ អាមេរិក បានច្រានចោលការចោទប្រកាន់នេះ ដោយទាមទារពីរុស្ស៊ី ឲ្យលើកយកភស្តុតាង មកបង្ហាញ។

សេចក្តីរាយការណ៍របស់កែវ ឆាយាពីទីក្រុងម៉ូស្គូ

ស្តាប់ (02:43)

26/10/2012 by កែវ ឆាយា

សាច់រឿង គឺអំពី រ៉ុកកែតអាមេរិកធុន Stinger ដែលចល័ត ងាយយកតាមខ្លួន សម្រាប់ បាញ់បំផ្លាញយន្តហោះ ដែលហោះ នៅកំពស់ទាបៗ មិនហួសពី ៤គ.ម.លើដី។

ដើមហេតុ មកពីមុនដំបូង នាយអគ្គសេនាធិការដ្ឋានកងទ័ពរុស្ស៊ី ឧត្តមសេនីយ Nicolai Makarov បានថ្លែងថា ពួកឧទ្ទាមដែលច្បាំងទល់នឹងកងទ័ពរដ្ឋាភិបាលស៊ីរី ឥឡូវបំពាក់ទៅដោយ រ៉ុកកែត សម្រាប់យកតាមខ្លួនបាន ម៉ាកប្លែកៗ មានទាំងរ៉ុកកែតអាមេរិកាំង ម៉ាក Stinger ទៅផង។

គ្រាន់តែឮដំណឹងនេះភ្លាម ក្រសួងការបរទេសអាមេរិកបានចេញសេចក្តីថ្លែងការណ៍ ដែលថា ទីក្រុងវ៉ាស៊ីនតោនមិនដែលផ្តល់អាវុធ Stinger អ្វីណា ទៅស៊ីរីឡើយ។ អ្នកនាំពាក្យផ្លូវការ របស់ក្រសួងនេះ លោកស្រី Victoria Nuland បានប្រតិកម្មថា រាល់តែរូបភាពវីដេអូជាឯកសារ ស្តីអំពីការប្រើរ៉ុកកែតចល័តប្រឆាំងយន្តហោះក្នុងផ្ទៃមេឃស៊ីរី គឺសឲ្យឃើញថា រ៉ុកកែតទាំងនោះ ជារ៉ុកកែតចាស់ៗ ផលិតតាំងពីជំនាន់អតីតសហភាពសូវៀត។ ជាភាសារុស្ស៊ី វាមានឈ្មោះថា Strela-2 ហើយដែលត្រូវបក្សសម្ព័ន្ធឲ្យឈ្មោះថា AS-7។ ភាគីអាមេរិកមិនដែលឃើញពួកឧទ្ទាម នៅស៊ីរីប្រើរ៉ុកកែតម៉ាក Stinger ឡើយ។

ចំណែកអ្នកនាំពាក្យផ្លូវការនៃក្រសួងការបរទេសរុស្ស៊ី លោក Alexandre Lukashevich ថ្ងៃ២៥ តុលា ដដែល ឆ្លើយទៅវិញថា ៖ “ ភាគីរុស្ស៊ីតែងតាមដានយ៉ាងដិតដល់ អំពីដំណើរវិវឌ្ឍន៍ទៅ នៃ ស្ថានការណ៍ជុំវិញរឿងបញ្ជូន ដោយលួចលាក់ខុសច្បាប់ នូវអាវុធ និងសម្ភារៈយោធា ទៅឲ្យ ពួកឧទ្ទាម និងពួកភេរវជន នៅស៊ីរី។ ហើយអ្វីៗដែលថ្លែងដោយលោកស្រី Victoria Nuland គឺ យើងធ្លាប់ឭទៅហើយ។ ទោះបីអាមេរិកខ្លួនឯង មិនមែន ជាអ្នកផ្តល់ត្រង់ៗ នូវរ៉ុកកែតបែបនេះ ទៅពួកប្រឆាំងនៅស៊ីរីក្តី ក៏តាមការសារភាពទទួលស្គាល់នៃ ពួកអ្នកមុខអ្នកការអាមេរិកហើយដែលត្រូវចុះផ្សាយ ដោយ កាសែតអាមេរិកាំងផ្ទាល់ វ៉ាស៊ីនតោនដើរតួជា អ្នកសម្របសម្រួល ជួយជ្រោមជ្រែងដល់ការដឹកជញ្ជូនអាវុធនោះ ទៅផ្គត់ផ្គង់ដល់ពួកក្រុមប្រដាប់អាវុធខុសច្បាប់ ដែលសព្វថ្ងៃ សកម្ម នៅស៊ីរី ប្រឆាំងនឹងរដ្ឋាភិបាលប្រទេសនេះ”។

អំពីរ៉ុកកែត Stinger ផ្ទាល់ គឺថា វាមានប្រវែង១ម៉ែត្រកន្លះ ស្រួលស្ពាយតាមខ្លួន ទម្ងន់វា គឺ ១០ គីឡូក្រាម ពីក្នុងនោះ ក្បាលរំសេវប្រយុទ្ធរបស់វាមានទម្ងន់ ៣គីឡូក្រាម អាចបាញ់កំទេច យន្តហោះ នៅកំពស់មិនហួសពី ៤គ.ម. លើដី។ វាបានចូលខ្លួនទៅបំពាក់កងទ័ពអាមេរិក ចំនួន ២.២៥០ ដើម គឺ ក្នុងឆ្នាំ ១៩៨១ ហើយតាំងពីពេលនោះមក មានផលិតវាបាន ៧០.០០០ដើម ដែលប្រដាប់នៅនឹងកងទ័ព ៣០ប្រទេស។ រ៉ុកកែតម៉ាកនេះ ចេះកំទេច យន្តហោះអស់ ២៧០គ្រឿងទៅហើយ៕