ម្ចាស់ពានរង្វាន់អន្តរជាតិផ្នែកសិទ្ធិមនុស្ស ដាក់ញត្តិ សុំការឃ្លាំមើលពេលតុលាការកាត់ទោស
ដូចការគ្រោងទុក នៅព្រឹកថ្ងៃអង្គារទី១៨វិច្ឆិការនេះ ព្រះតេជគុណ លួន សុវ៉ាត ម្ចាស់ពានរង្វាន់អន្តរជាតិផ្នែកការពារសិទ្ធិមនុស្សឆ្នាំ២០១២ពីទីក្រុងសឺណែវប្រទេសស្វីស បាននិមន្តយកញត្តិទៅដាក់នៅតាមបណ្តាស្ថានទូតប្រទេសមហាអំណាចនានានៅក្នុងទីក្រុងភ្នំពេញ។ ព្រះអង្គត្រូវបានតុលាការក្រុងភ្នំពេញចោទប្រកាន់ពីបទក្បត់ជាតិ។
ចុះផ្សាយនៅថ្ងៃ៖
ស្តាប់ - ០២:០០
ផ្តើមចេញពីស្ថានទូតសហរដ្ឋអាមេរិក នៅប្រមាណជាម៉ោង៨ព្រឹក ព្រះតេជគុណ លួន សុវ៉ាត ដែលអមដំណើរដោយព្រះសង្ឃ និងសកម្មជនដីធ្លីមកពីសហគមន៍បឹងកក់ បូរីកីឡា និងសហគមន៍រងគ្រោះជាច្រើនទៀត បានយកញត្តិទៅដាក់នៅស្ថានទូតអាមេរិក បន្ទាប់មកគឺស្ថានទូតអង់គ្លេស បារាំង កូរ៉េខាងត្បូង សហភាពអឺរ៉ុប អង្គការសហប្រជាជាតិ ជប៉ុន និងស្ថានទូតថៃប្រចាំនៅកម្ពុជាជាដើម។ គោលបំណងនៃការដាក់ញត្តិនៅថ្ងៃនេះ គឺដើម្បីស្នើសុំអោយមន្ត្រីស្ថានទូតប្រទេសមហាអំណាចទាំងអស់នេះ ចូលរួមតាមដានស្តាប់ និងឃ្លាំមើលអង្គសវនាការកាត់ទោសលើព្រះអង្គ ដែលនឹងធ្វើឡើងដោយតុលាការសាលាដំបូងរាជធានីភ្នំពេញ នៅវេលាម៉ោង៨ព្រឹក ថ្ងៃទី២៥ខែវិច្ឆិការខាងមុខនេះ។
ព្រះអង្គ លួន សុវ៉ាត គឺជាសកម្មជនព្រះសង្ឃអ្នកការពារសិទ្ធិមនុស្ស និងក៍ជាម្ចាស់ពានរង្វាន់អន្តរជាតិផ្នែកការពារសិទ្ធិមនុស្សពីទីក្រុងសឺណែវប្រទេសស្វីសកាលពីឆ្នាំ២០១២ ត្រូវបានតុលាការក្រុងភ្នំពេញ ចោទប្រកាន់ពីបទក្បត់ជាតិ និងញុះញង់ឲ្យប្រព្រឹត្តបទឧក្រិដ្ឋ ទាំងនៅក្នុងប្រទេស និងក្រៅប្រទេស។ ប៉ុន្តែព្រះតេជគុណ លួន សុវ៉ាត បានហៅការចោទប្រកាន់នេះថា ប្រៀបបាននឹងការប្រើដាវអាជ្ញាសឹកមកប្រហារ ដោយចោទប្រកាន់ និងកាត់ទោសលើព្រះអង្គ ដោយរំលោភលើច្បាប់ព្រះពុទ្ធសាសនា និង ច្បាប់រដ្ឋធម្មនុញ្ញនៃព្រះរាជាណាចក្រកម្ពុជា។
អ្វីជាការកត់សំគាល់ នៅក្នុងការនិមន្តនិងដើរដាក់ញត្តិកាលពីព្រឹកម៉ិញ មិនមានការរារាំងពីអាជ្ញាធរទីក្រុងភ្នំពេញនោះទេ តែសកម្មភាពនេះ ក៍ស្ថិតនៅក្រោមក្រសែភ្នែករបស់អាជ្ញាធរ និងកំលាំងសន្តិសុខខណ្ឌ ដែលល្បីល្បាញខាងការបង្ក្រាប់ឥតសំចៃដៃផងដែរ។ ជាមួយនឹងការដើរដង្ហែរញត្តិ នៅថ្ងៃនេះ អ្នកចូលរួម មានសកម្មជនដីធ្លីប្រមាណជាង១០០នាក់ហើយនិងព្រះសង្ឃផងនោះ ក៍បានស្រែកទាមទារអោយអាជ្ញាធរដោះលែងសកម្មជនដីធ្លី ព្រះសង្ឃ និងអ្នកនយោបាយ ដែលកំពុងជាប់ឃុំនៅក្នុងពន្ធនាគាព្រៃសរផងដែរ។ ចាប់តាំងពីមានការចាប់ខ្លួនឡើងវិញ កាលពីថ្ងៃចន្ទទី១០ខែវិច្ឆិកាមក មានសកម្មជនដីធ្លី ព្រះសង្ឃ និងសកម្មជនបក្សនយោបាយសរុប១៧នាក់ហើយ ដែលត្រូវបានចាប់ឃុំខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ