លោកម៉ឹក ដារ៉ាត្រូវបានតុលាការផ្តន្ទាទោសដាក់ពន្ធនាគារមួយជីវិត
នៅព្រឹកថ្ងៃព្រហស្បតិ៍ ទី៥មករានេះ អតីតឧត្តមសេនីយ៍ផ្កាយបី លោក ម៉ឹក ដារ៉ា អគ្គលេខាធិការអាជ្ញាធរជាតិប្រឆាំងគ្រឿងញៀន និងជាអតីតប្រធានមន្ទីរប៉ូលិសប្រឆាំងគ្រឿងញៀន របស់ក្រសួងមហាផ្ទៃ ត្រូវបានចៅក្រមតុលាការខេត្តបន្ទាយមានជ័យផ្តន្ទាទោសដាក់ពន្ធនាគារមួយជីវិត ព្រមទាំងរឹបអូសទ្រព្យសម្បត្តិជាច្រើន។ ក្នុងសំណុំរឿងពុករលួយ តាមរយៈការបង្ក្រាបគ្រឿងញៀននោះ តុលាការក៏បានផ្តន្ទាទោសដាក់ពន្ធនាគារអស់មួយជីវិតលើលោក ជា ឡេង អតីតប្រធានការិយាល័យ នៅមន្ទីរប្រឆាំងគ្រឿងញៀន របស់ប៉ូលិសក្រសួងមហាផ្ទៃ។ រីឯអតីតមន្ត្រីប៉ូលិស ឈ្មោះ ម៉ន ឌឿន ដែលបានរត់គេចខ្លួន ក៏ត្រូវបានតុលាការសម្រេចផ្តន្ទាទោសកំបាំងមុខ ដាក់ពន្ធនាគារ ២៥ ឆ្នាំ។
ចុះផ្សាយនៅថ្ងៃ៖
ស្តាប់ - ០២:៥៧
លោកចៅក្រម អ៊ិត សម្ផស្ស ប្រធានចៅក្រមជំនុំជម្រះតុលាការខេត្តបន្ទាយមានជ័យ បានប្រកាសសាលក្រមចំពោះមុខលោក ម៉ឹក ដារ៉ា និងលោក ជា ឡេង ដោយសម្រេចផ្តន្ទាទោសអតីតមេប៉ូលិសបង្ក្រាបគ្រឿងញៀនទាំងពីរ ដាក់ពន្ធនាគារអស់មួយជីវិត។ ចំណែកអតីតប៉ូលិសម្នាក់ទៀតឈ្មោះ ម៉ន ឌឿន ដែលកំពុងគេចខ្លួន ត្រូវផ្តន្ទាទោសដាក់ពន្ធនាគារ ២៥ឆ្នាំ។
ក្នុងសាលក្រមដែលបានប្រកាសនៅព្រឹកថ្ងៃទី៥មករានេះ ចៅក្រមក៏បានសម្រេចដកហូតដីមួយកន្លែង នៅក្រុងសួង ខេត្តកំពង់ចាម របស់លោក ម៉ឹក ដារ៉ា ព្រមទាំងដកហូតប្រាក់សរុប ១៨ ម៉ឺនដុល្លារ ក្នុងគណនីធនាគាររបស់លោកម៉ឹកដារ៉ា។ ចំណែកលោក ជា ឡេង អតីតប្រធានការិយាល័យនៃមន្ទីរប្រឆាំងគ្រឿងញៀន ក្រោមបង្គាប់របស់លោកអតីតឧត្តមសេនីយ៍ផ្កាយបី ម៉ឹកដារ៉ា ក៏ត្រូវតុលាការសម្រេចដកហូតដីមួយកន្លែងនៅចោមចៅ និងផ្ទះមួយល្វែង នៅភ្នំពេញ ព្រមទាំងលុយជាង ១០ ម៉ឺនដុល្លារ។ រីឯប៉ូលិសឈ្មោះ ម៉ន ឌឿន ត្រូវបានតុលាការ សម្រេចដកហូតលុយជាង ១០ ម៉ឺនដុល្លារផងដែរ។
លោកចៅក្រម អ៊ិត សម្ផស្ស បានប្រកាសថា លោក ម៉ឹក ដារ៉ា លោកជាឡេង និងលោក ម៉ន ឌឿន ជាអ្នកផ្តើមសមគំនិត និងប្រព្រឹត្តទទួលសំណូកដោយចេតនា និងយកមុខនាទី និងកន្លែងធ្វើការ នៅមន្ទីរប្រឆាំងគ្រឿងញៀន របស់ប៉ូលិសក្រសួងមហាផ្ទៃ ធ្វើជាកន្លែងរកស៊ីគ្រឿងញៀនខុសច្បាប់។ សំណុំរឿងនេះ មាន ៣៨ករណី ចាប់តាំងពីឆ្នាំ២០០៦ ដល់ឆ្នាំ២០១០។
ចំពោះការសម្រេចរបស់តុលាការដូច្នេះ ត្រូវបានលោក រ៉ាយ ប៊ុនធឿន មេធាវីការពារក្តីរបស់លោក ម៉ឹក ដារ៉ា ថ្លែងប្រាប់អ្នកកាសែតថា ជាការសម្រេចដ៏អយុត្តិធម៌ ដោយសារតែតុលាការមិនមានភស្តុតាងគ្រប់គ្រាន់។ ម្យ៉ាងទៀតការកំណត់ដាក់ទោស និងផាកពិន័យលើលោក ម៉ឹកដារ៉ា និងប៉ូលិស២នាក់ទៀតនោះ ជាការដាក់ទោសដ៏ធ្ងន់ធ្ងរ ដែលមិនអាចទទួលយកបានទេ។
ចំណែកលោក ម៉ឹក ដារ៉ា បានថ្លែងទៅកាន់អ្នកកាសែត ដោយលើកយកគុណសម្បត្តិរបស់លោកក្នុងការបង្ក្រាបគ្រឿងញៀននាពេលកន្លងមក។ លោក ម៉ឹក ដារ៉ា ក៏បានសម្តែងការតូចចិត្ត ដោយថា តុលាការមិនគួរដាក់ទោសលោកធ្ងន់ធ្ងរដូច្នេះទេ ព្រោះលោកបានចូលរួមតាក់តែង និងបង្កើតច្បាប់ប្រឆាំងគ្រឿងញៀន តែពេលនេះ បែរជាតុលាការយកច្បាប់គ្រឿងញៀននោះ មកដាក់ទោសលើរូបលោកទៅវិញ។
លោកអតីតឧត្តមសេនីយ៍ឯក ម៉ឹក ដារ៉ា បានបន្ថែមថា ទ្រព្យសម្បត្តិរបស់លោក ដែលតុលាការសម្រេចរឹបអូសនោះ មិនមែនជាប្រាក់សំណូក ដែលលោកទទួលបាន ក្នុងពេលធ្វើជាប្រធានមន្ទីរប៉ូលិសប្រឆាំងគ្រឿងញៀន និងជាអតីតអគ្គលេខាធិការនៃអាជ្ញាធរជាតិប្រឆាំងគ្រឿងញៀនឡើយ។
តុលាការខេត្តបន្ទាយមានជ័យ បានបើកសវនាការកាត់ទោសលោក ម៉ឹក ដារ៉ា និងកូនចៅ២នាក់ អស់រយៈពេល ១២ ថ្ងៃ ចាប់ពីថ្ងៃទី១៧វិច្ឆិកា ឆ្នាំ២០១១ ក្នុងសំណុំរឿងពុករលួយ តាមរយៈការបង្ក្រាបគ្រឿងញៀន។ កាលពីដើមខែវិច្ឆិកា តុលាការខេត្តបន្ទាយមានជ័យ ក៏បានផ្តន្ទាទោសអតីតស្នងការ-ស្នងការរងប៉ូលិសខេត្តបន្ទាយមានជ័យ និងបក្ខពួកជាច្រើននាក់ទៀត ដាក់ពន្ធនាគារ ៤ ឆ្នាំ ក្នុងរឿងស៊ីសំណូក តាមរយៈការបង្ក្រាបគ្រឿងញៀនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ