ការស្វែងរកយន្តហោះMH៣៧០ ត្រូវការពេលយូរ និងកាន់តែស្មុគស្មាញ
នាវា យន្តហោះ បន្តធ្វើប្រតិបត្តិការ ក្នុងមហាសមុទ្ទឥណ្ឌា ស្វែងរកយកបំណែកយន្តហោះម៉ាឡេស៊ី MH៣៧០ បាត់ខ្លួន តាំងពីថ្ងៃទី ៨មីនា។ បច្ចេកទេសស្វែងរកកាន់តែទំនើប មធ្យោបាយក៏សម្បើម ប៉ុន្តែគេត្រូវការពេលវេលា ច្រើន និងយូរទៀត ទម្រាំបានលទ្ធផល។ ពេលវេលាកាន់យូរ ការបំបោងនិងបំផ្លែងព័ត៌មានក៏អាចមានគ្រប់បែបយ៉ាង។
ចុះផ្សាយនៅថ្ងៃ៖
ស្តាប់ - ០១:៥០
“ស្វែងរកវត្ថុអ្វីមួយ នៅ ជម្រៅ បួនគីឡូម៉ែត្រកន្លះក្រោមទឹក គឺពិតជាកិច្ចការដ៏សម្បើម និងត្រូវប្រើពេលវេលាយូរទៀតណាស់” ! ថ្វីបើយើងមានទំនុកចិត្តខ្លាំងថាសំឡេងចាប់បានទាំងបួនលើក ថាផ្តល់ដោយប្រអប់ខ្មៅរបស់យន្តហោះម៉ាឡេស៊ីក៏ដោយ។ នេះជាប្រសាសន៍របស់លោកនាយករដ្ឋមន្ត្រីអូស្ត្រាលី ក្នុងសន្និសីទកាសែត នាទីក្រុងសៀងហៃ នៅថ្ងៃសៅរ៍នេះ មុននឹងចូលជួបប្រធានាធិបតីស៊ីជិនពីង។
នៅពេលនេះ បរិវេណនៃការស្វែងរកយន្តហោះម៉ាឡេស៊ីMH៣៧០ ត្រូវបានបង្រួញមកត្រឹមជាង៤១០០០គីឡូម៉ែត្រការ៉េ ដោយមានយន្តហោះជាង១០ និងនាវា១៤គ្រឿងកំពុងធ្វើប្រតិបត្តិការក្នុងមហាសាគរ។
ទន្ទឹមនឹងយុទ្ធនាការស្វែងរកនៅក្នុងមហាសមុទ្ទ ក្រុមអ្នកអង្កេតវិញ កំពុងសិក្សាលើគ្រប់សេណារីយូ និងដានទាំងអស់ មានជាអាទិ៍ការបង្វែរទិស ការប៉ុនប៉ងធ្វើភេរវកម្ម សកម្មភាពផ្តេសផ្តាសអស់សង្ឃឹមរបស់អ្នកដំណើរ អ្នកបើកបរ ឬបុគ្គលិកយន្តហោះ ប៉ុន្តែគ្មានចំណុចណាមួយជាអាទិភាពសម្រាប់ដឹកនាំទិសនៃការអង្កេតសោះ។
ភាពស្ងប់ស្ងាត់បានអូសបន្លាយអស់ជាច្រើនថ្ងៃ ស្រាប់តែនៅថ្ងៃសៅរ៍នេះ សារព័ត៌មានម៉ាឡេស៊ីបានទម្លាយព័ត៌មានថា អ្នកបើកបរយន្តហោះវ័យក្មេង បានសាកល្បងប្រើទូរស័ព្ទដៃ ហៅមកដី មុនពេលយន្តហោះបាត់ទាំងស្រុងពីកញ្ចក់រ៉ាដា។ អ្នកអង្កេតដែលសុំមិនបញ្ចេញឈ្មោះ (នេះបើតាមកាសែតម៉ាឡេស៊ីដដែល) បានបញ្ជាក់ថា ទូរស័ព្ទត្រូវកាត់ផ្តាច់ទៅវិញ មិនដឹងជាដោយហេតុយន្តហោះទៅលឿនពេក ងាកផុតពីអង់តែនទូរគមនាគមន៍ឬយ៉ាងណាទេ ហើយក៏មិនដឹងហៅទៅនរណាដែរ។
ប្រភពព័ត៌មានមួយទៀត បានអះអាងថាទូរស័ព្ទដៃរបស់អ្នកបើកយន្តហោះ Fariq Abdul Hamid ត្រូវបានភ្ជាប់ប្រព័ន្ធឡើងវិញ តែមិនប្រាកដថាជាចុចហៅទេ។ បន្ទាប់ពីដំណឹងនេះ ក្រសួងដឹកជញ្ជូនម៉ាឡេស៊ីបានប្រកាសប្រាប់ភ្នាក់ងារសារព័ត៌មានបារាំងថានឹងសិក្សាព័ត៌មាននេះ ហើយនឹងផ្តល់ចម្លើយនៅពេលក្រោយ។ ភាពយឺតយ៉ាវ និងការផ្តល់ព័ត៌មានដ៏រអាក់រអួល បានធ្វើក្រុមគ្រួសារអ្នកដំនើរភាគច្រើនជាជនជាតិចិន ចោទប្រកាន់ម៉ាឡេស៊ីថាបានបិទខ្ទប់ និងលាក់បាំងព័ត៌មាន រហូតធ្វើប៉េកាំងនិងកូឡាឡាំពួរតានតឹងដាក់គ្នាយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ