ជប៉ុនចែករំលែកទុក្ខសោក ជាមួយកូរ៉េខាងត្បូងក្នុងគ្រោះលិចសាឡាង
ក្រុមសង្គ្រោះកំពុងបង្កើនការខិតខំប្រឹងប្រែងមួយទ្វេជាពីរ ក្រែងអាចរកអ្នកនៅមានជីវិត ពីការលិចសាឡាងម្សិលមិញ។ ប្រទេសកូរ៉េខាងត្បូងទាំងមូលកំពុងស្ថិតក្នុងស្ថានភាពតក់ស្លុតខ្លាំង ដ្បិតជនរងគ្រោះភាគច្រើនជាក្មេងសិស្សសាលា។ នាយករដ្ឋមន្ត្រីជប៉ុនដែលធ្លាប់រងការចោទប្រកាន់ថាជាអ្នកជាតិនិយម និងយោធានិយម បានថ្លែងសារបង្ហញពីសមានចិត្តចែករំលែកទុក្ខព្រួយដល់គ្រួសារជនរងគ្រោះទាំងអស់។
ចុះផ្សាយនៅថ្ងៃ៖
គឺនៅក្នុងសន្និសីទព្រឹកមិញ ពីទីក្រុងតូក្យូ ដែលលោកនាយករដ្ឋមន្ត្រីជប៉ុនលោក ស៊ីនហ្សូ អាបេ ល្បីខាងជាតិនិយមនិងយោធានិយមប្រឆាំងប្រទេសជិតខាងចិននិងកូរ៉េខាងត្បូង បានសម្តែងសមានចិត្តអស់ពីបេះដូង ចែករំលែកទុក្ខសោកជាមួយនឹងគ្រួសារជនរងគ្រោះកូរ៉េខាងត្បូង ក្នុងហេតុការណ៍លិចសាឡាង។ លោកនាយករដ្ឋមន្ត្រីកូរ៉េខាងត្បូងវិញ បានអញ្ជើញទៅដល់ផ្ទាល់កន្លែងដែលទទួលគ្រួសាររងគ្រោះ ដើម្បីលើកទឹកចិត្ត តែត្រូវបានស្វាគមន៍ដោយសម្រែកយំ ខឹង។ ឯចំណែកលោកស្រីប្រធានាធិបតី ប៉ាក់ គុនហេ វិញបានផ្ញើសារចែករំលែកការទុក្ខសោក និងស្នើឱ្យក្រុមសង្គ្រោះធ្វើការរហូតដល់នាទីចុងក្រោយ។
គ្រោះថ្នាក់លិចសាឡាងនេះ មានទំហំធំធេងនិងឃោរឃៅខ្លាំងណាស់ ព្រោះជនរងគ្រោះភាគច្រើន ជាក្មេងសិស្សសាលា ! សាឡាងចម្លង មានច្រើនជាន់ ទម្ងន់ ៦៨២៥តោន ដែលបានលិច ក្នុងសមុទ្ទចម្ងាយប្រមាណ២០គីឡូម៉ែត្រពីឆ្នេរ។ នាវាសន្ទូចយក្សបីបាន បានបញ្ជូនទៅកន្លែងកើតហេតុដើម្បីសាកល្បងបង្ហើបសាឡាង ឱ្យផុតពីទឹក។
ក្រុមអ្នកសង្គ្រោះ បានធ្វើការធ្វើមួយយប់ និងបន្តរហូតមកទល់នឹងម៉ោងនេះទៀត ទោះបីជាមានទឹកហូរខ្លាំង និងគ្មានពន្លឺពិបាកធ្វើការយ៉ាងណាក៏ដោយ ព្រោះពេលវេលាកាន់តែបន្ទាន់ណាស់ សំណាងរកឃើញអ្នកដែលអាចមានជីវិតមានតែ២៤ម៉ោងក្រោយការលិចលង់ប៉ុណ្ណោះ។ ជនរងគ្រោះបាត់ខ្លួន ២៨៧នាក់ដែលភាគច្រើនជាសិស្សសាលា ទំនងជាត្រូវជាប់កុនក្នុងបន្ទប់សាឡាងចេញមិនរួច ពេលទឹកចូលសាឡាង។ សិស្សរួចពីស្លាប់ម្នាក់បានអះអាងថាប្រសិនបើពួកគេអាចចេញពីបន្ទប់ស្នាក់ក្នុងសាឡាងបាន នោះសិស្សច្រើនគ្នានឹងអាចលោតទឹកដើម្បីរក្សាជីវិតបាន។ ប៉ុន្តែនៅកូរ៉េខាងត្បូង សិស្សមានវិន័យណាស់ ស្តាប់បញ្ជាមិនហ៊ានល្មើសទេ ជាពិសេសបញ្ជាសុវត្ថិភាពដែលឱ្យសិស្សនៅអង្គុយស្ងៀម មិនរើ។
កាពីទែន អ្នកបើកសាឡាងដែលបានរួចជីវិត ត្រូវបានឆ្មាំសមុទ្ទសួរចម្លើយដើម្បីរកហេតុផង ដែលនាំដល់ការលិចនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ