កម្ពុជា-អាស៊ាន -

អត្ថបទចុះផ្សាយនៅថ្ងៃ ចន្ទ 27 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 27 សីហា 2012

រដ្ឋមន្ត្រីសេដ្ឋកិច្ចអាស៊ាន ជួបប្រជុំនៅខេត្តសៀមរាប

ដោយ លី ម៉េងហួរ

កិច្ចប្រជុំរដ្ឋមន្ត្រីសេដ្ឋកិច្ចអាស៊ានបានចាប់ផ្តើម នៅព្រឹកថ្ងៃចន្ទ ទី២៦ ខែសីហានេះ នៅខេត្តសៀមរាប។ ក្នុងពិធីបើកកិច្ចប្រជុំថ្នាក់តំបន់ នៅព្រឹកមិញ លោកនាយករដ្ឋមន្ត្រី ហ៊ុនសែន បានជំរុញអោយរដ្ឋមន្ត្រីសេដ្ឋកិច្ចអាស៊ាន ធ្វើយ៉ាងណា សម្រេចអោយបាននូវការបង្កើតសហគមន៍សេដ្ឋកិច្ចអាស៊ាន នៅឆ្នាំ២០១៥។ ក្នុងនោះ រដ្ឋមន្ត្រីសេដ្ឋកិច្ចអាស៊ាន ក៏ត្រូវរិះរកវិធីកាត់បន្ថយគម្លាតអភិវឌ្ឍន៍រវាងប្រទេសទាំង ១០ ជាសមាជិកអាស៊ានផងដែរ។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (02:14)

27/08/2012 by លី ម៉េងហួរ

កិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ បានបើកធ្វើឡើង កាលពីព្រឹកថ្ងៃចន្ទ ទី២៧សីហានេះ នៅសណ្ឋាគារ អប្សរាអង្គរ ក្នុងទីរួមខេត្តសៀមរាប។ លោកនាយករដ្ឋមន្ត្រី ហ៊ុនសែន បានអានសន្ទរកថា បើកកិច្ចប្រជុំរដ្ឋមន្ត្រីសេដ្ឋកិច្ចអាស៊ាន មុននឹងកិច្ចប្រជុំរដ្ឋមន្ត្រី និងកិច្ចប្រជុំពាក់ព័ន្ធជាច្រើនផ្សេងទៀត បានធ្វើឡើងជាបន្តបន្ទាប់ រយៈពេលពេញមួយសប្តាហ៍នេះ។

កិច្ចប្រជុំរដ្ឋមន្ត្រីសេដ្ឋកិច្ចអាស៊ាន នៅខេត្តសៀមរាប ដែលបន្តរហូតដល់ថ្ងៃទី៣១សីហា ផ្តោតសំខាន់លើការជំរុញបង្កើតសហគមន៍សេដ្ឋកិច្ចអាស៊ាន នៅឆ្នាំ២០១៥។

ក្នុងសុន្ទរកថាបើកកិច្ចប្រជុំរដ្ឋមន្ត្រីសេដ្ឋកិច្ចអាស៊ាន នៅព្រឹកមិញ លោកនាយករដ្ឋមន្ត្រី ហ៊ុនសែន បានលើកឡើងថា ការអភិវឌ្ឍន៍សេដ្ឋកិច្ច របស់ប្រទេសសមាជិកថ្មី ៤ ប្រទេសរបស់អាស៊ាន រួមមាន៖ កម្ពុជា ភូមា ឡាវ និងវៀតណាម នៅមានភាពផុយស្រួយនៅឡើយ។ លោកប្រមុខរដ្ឋាភិបាលកម្ពុជា និងជាប្រមុខដឹកនាំអាស៊ាន នៅឆ្នាំ២០១២នេះ បានជំរុញអោយកិច្ចប្រជុំរដ្ឋមន្ត្រីអាស៊ាន ធ្វើយ៉ាងណា កាត់បន្ថយគម្លាតសេដ្ឋកិច្ចនៅក្នុងតំបន់អាស៊ាន។

តាមលោកនាយករដ្ឋមន្ត្រី គម្លាតអភិវឌ្ឍន៍នៅក្នុងអាស៊ាន នៅមានទំហំធំនៅឡើយ ទោះបីជាគម្លាតនេះ បានកាត់បន្ថយគួរអោយកត់សម្គាល់ក្តី។ កាលពីថ្ងៃអាទិត្យ រដ្ឋមន្ត្រីសេដ្ឋកិច្ចមកពីប្រទេស កម្ពុជា ឡាវ ភូមា និងវៀតណាម បានជួបប្រជុំគ្នា ក្នុងនាមជាសមាជិកអាស៊ានថ្មី នៃសមាជិកអាស៊ានសរុប ១០ ប្រទេស។

លោក ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម ដែលតំណាងឲ្យភាគីកម្ពុជា ជាប្រធាននៃកិច្ចប្រជុំរដ្ឋមន្ត្រីសេដ្ឋកិច្ចអាស៊ាន បានឲ្យដឹងថា កិច្ចប្រជុំនោះ គឺពិនិត្យមើលគម្រោង ដើម្បីស្វែងរកជំនួយ សម្រាប់ប្រទេសទាំងបួន ដែលជាសមាជិកថ្មី នៅក្នុងអាស៊ានក្នុងបំណងអោយមានការជួយជ្រោមជ្រែង ធ្វើយ៉ាងណា កុំអោយមានគម្លាតខ្លាំងពេក នៅក្នុងសហគមន៍សេដ្ឋកិច្ចអាស៊ាន ដែលនឹងបង្កើតឡើង នៅឆ្នាំ២០១៥។ នៅថ្ងៃទី៣០ និងថ្ងៃទី៣១ ខែសីហានេះ ក៏នឹងមានវត្តមានមន្ត្រីជាន់ខ្ពស់ផ្នែកសេដ្ឋកិច្ច តំណាងឲ្យលោក អូបាម៉ា របស់សហរដ្ឋអាមេរិក ចូលរួមក្នុងកិច្ចប្រជុំជាមួយរដ្ឋមន្ត្រីសេដ្ឋកិច្ចអាស៊ាន នៅខេត្តសៀមរាបផងដែរ៕