កម្ពុជា -

អត្ថបទចុះផ្សាយនៅថ្ងៃ អង្គារ 18 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 18 កញ្ញា 2012

ក្រសួងមហាផ្ទៃជួបបក្សប្រឆាំងដើម្បីជជែកអំពីសមាសភាពគជប

លោក ស ខេង ឧបនាយករដ្ឋមន្រ្តី និងរដ្ឋមន្រ្តីក្រសួងមហាផ្ទៃកម្ពុជា

ដោយ លាង ដឺលុច

ក្រសួងមហាផ្ទៃបានយល់ព្រមហើយលើសំណើរបស់គណបក្សសម រង្ស៊ី និងគណបក្សសិទ្ធិមនុស្សដែលស្នើជួបពិភាក្សាអំពីសមាសភាពរបស់គណៈកម្មាធិការជាតិរៀបចំការបោះឆ្នោត។ ការពិភាក្សានេះត្រូវប្រព្រឹត្តិទៅនៅថ្ងៃទី២០កញ្ញាសប្តាហ៍នេះ រវាងលោកព្រុំ សុខា រដ្ឋលេខាធិការក្រសួងមហាផ្ទៃ និងតំណាងគណបក្សប្រឆាំងទាំងពីរ។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:41)

18/09/2012 by លាង ដឺលុច

នៅថ្ងៃព្រហស្បតិ៍ទី២០ កញ្ញាសប្តាហ៍នេះ វេលាម៉ោង៩ព្រឹក ក្រសួងមហាផ្ទៃនឹងជួបជាមួយតំណាងគណបក្សសម រង្ស៊ី និង គណបក្សសិទ្ធិមនុស្សដើម្បីពិភាក្សាអំពីសមាសភាពនៃគណៈកម្មាធិការជាតិរៀបចំការបោះឆ្នោត។ លិខិតរបស់ក្រសួងមហាផ្ទៃចុះថ្ងៃទី១៨ កញ្ញានេះដោយរដ្ឋលេខាធិការក្រសួងមហាផ្ទៃ លោកនុត សាអាន បានសរសេរបញ្ជាក់ថា លោកព្រុំ សុខា ដែលជារដ្ឋលេខាធិការមួយរូបទៀតនោះ គឺជាអ្នកដែលត្រូវជួបជាមួយតំណាងគណបក្សប្រឆាំងទាំងពីរនៅព្រឹកថ្ងៃព្រហស្បតិ៍នោះ។ តាមពិត សេចក្តីសម្រេចរបស់ក្រសួងមហាផ្ទៃនេះ គឺជាការឆ្លើយតបទៅនឹងសំណើរបស់គណបក្សប្រឆាំងទាំងពីរ គឺគណបក្សសម រង្ស៊ី និងគណបក្សសិទ្ធិមនុស្ស ដែលកាលពីថ្ងៃទី១៣ កញ្ញាបានស្នើសុំជួបរដ្ឋមន្ត្រីក្រសួងមហាផ្ទៃ ឬអ្នកតំណាងក្រសួងដើម្បីនិយាយអំពីបញ្ហាសមាសភាពគណៈកម្មាធិការជាតិរៀបចំការបោះឆ្នោតនេះ ដែលគណបក្សទាំងពីរនេះបានទាមទារជាច្រើនឆ្នាំមកហើយ។

កាលពីថ្ងៃទី៣០សីហា គណបក្សទាំងពីរបានស្នើរូបមន្តនៃសមាសភាពគជប ថ្នាក់ជាតិ និងថ្នាក់ក្រោមជាតិម្តងហើយ។ ប៉ុន្តែសំណើរូបមន្តនោះត្រូវបានបដិសេធដោយក្រសួងមហាផ្ទៃ។ គណបក្សប្រឆាំងទាំង២ បានទទូចស្នើជួបថ្នាក់ដឹកនាំក្រសួងមហាផ្ទៃម្តងទៀតកាលពីថ្ងៃទី១៣កញ្ញានេះ ដើម្បីពន្យល់ផ្ទាល់មាត់អំពីសំណើរបស់ពួកគេ។ អ្នកនាំពាក្យរបស់គណបក្សសម រង្ស៊ី លោកយឹម សុវណ្ណបានអត្ថាធិប្បាយស្វាគមន៍ការឆ្លើយតបជាវិជ្ជមានរបស់ក្រសួងមហាផ្ទៃនៅពេលនេះ។ លោកថា វប្បធម៌នៃការជួបពិភាក្សាគ្នាគឺជាសញ្ញាល្អដើម្បីចៀសវាងទំនាស់។ សម្រាប់មន្ត្រីនាំពាក្យគណបក្សសម រង្ស៊ីដដែល ការធានាសិទ្ធិពលរដ្ឋគ្រប់រូបអោយបានបោះឆ្នោតគ្រប់គ្នា និងឯករាជ្យភាព និងប្រសិទ្ធិភាពរបស់គណៈកម្មាធិការជាតិរៀបចំការបោះឆ្នោតក៏ជាការចង់បានរបស់អង្គការសហប្រជាជាតិដែរ៕