តើអង្គការសហប្រជាជាតិអាចធ្វើអ្វីបានខ្លះ ប្រឈមនឹងការប្រើអាវុធគីមី នៅស៊ីរី ?
ចុះផ្សាយនៅថ្ងៃ៖
ស្តាប់ - ០៥:០៩
អាវុធគីមី ទំនងជាត្រូវបានប្រើប្រាស់ជាថ្មីទៀត នៅថ្ងៃពុធទី ២១ សីហា ម្សិលមិញ ! នេះបើគេជឿតាមការអះអាងរបស់ក្រុមប្រឹក្សាសម្ព័ន្ធបក្សប្រឆាំងស៊ីរី ដោយមានវីដេអូបង្ហាញពេញពិភពលោក និងដោយបានចោទប្រកាន់ថាជាស្នាដៃរបស់រដ្ឋាភិបាលក្រុងដាម៉ាស។ បណ្តាជនស៊ីរីស៊ីវិល ប្រមាណពី ៥០០ ទៅ ១៣០០នាក់បានស្លាប់ ប៉ុន្តែរបបលោកបាស្ហា អាល់អាសាទ បានបដិសេធបានច្រានចោលការចោទប្រកាន់នេះ។ ក្រុមប្រឹក្សាសន្តិសុខអង្គការសហប្រជាជាតិ បានបើកជំនួបប្រជុំបន្ទាន់នៅយប់មិញ ព្រោះ អ.ស.ប. ចាំបាច់ ត្រូវដឹងពីហេតុការណ៍ពិត។
ក្រុមប្រឹក្សាសន្តិសុខអង្គការសហប្រជាជាតិ បានបើកជំនួបប្រជុំពិសេសបន្ទាន់ នៅទីក្រុងញូវយ៉ក នៅយប់មិញ ប៉ុន្តែមិនបានរកឃើញការព្រមព្រៀងគ្នាណាមួយ ឈានដល់ការបើកអង្កេតភ្លាម ជុំវិញការប្រើប្រាស់អាវុធគីមី សម្លាប់មនុស្សកាលពីយប់ថ្ងៃអង្គារឆ្លងចូលថ្ងៃពុធ នៅជាយក្រុងដាម៉ាស ប្រទេសស៊ីរីនោះទេ។ សមាជិកក្រុមប្រឹក្សា ទំនងជានៅប្រទាញប្រទង់គ្នាលើគោលការណ៍-មធ្យោបាយនៃការអង្កេត។
សូមបញ្ជាក់ថា ការចោទប្រកាន់ថាមានការប្រើប្រាស់អាវុធគីមីនេះ បានមកពីក្រុមគណៈកម្មាធិការបក្សប្រឆាំងស៊ីរី នៅផ្ទាល់នឹងកន្លែង។ សម្រាប់តំណាងសម្ព័ន្ធបក្សប្រឆាំងស៊ីរី វាគ្មានអ្វីគួរឱ្យសង្ស័យទេដែលថាសោកនាដកម្ម ថ្ងៃពុធទី ២១សីហា គឺជាទង្វើឧក្រិដ្ឋកម្មប្រចាំសតវត្សរ៍ របស់រដ្ឋាភិបាលលោកបាស្ហា អាល់ អាសាទ មកលើជនស៊ីវិលនោះ។ បើតាមរូបភាពវីដេអូ ដែលមានផ្សព្វផ្សាយពេញពិភពលោក តាំងពីថ្ងៃម្សិលមិញ មក គេបានឃើញមនុស្សប្រុសស្រី ក្មេងចាស់ ដេកស្លាប់ តំរៀបគ្នា បែកពពុះមាត់ស្គុលដោយគ្មានស្នាមរបួសអ្វីសោះ។
សមាជិកភាគច្រើននៃក្រុមប្រឹក្សាសន្តិសុខអង្គការសហប្រជាជាតិ មានអាទិ៍ប្រទេសបារាំង និងសហរដ្ឋអាមេរិក បានស្នើសុំឱ្យក្រុមអ្នកឯកទេសអង្គការសហប្រជាជាតិ ដែលមានវត្តមានស្រាប់ទៅហើយ នៅទីក្រុងដាម៉ាស អាចចុះទៅត្រួតពិនិត្យ ធ្វើអង្កេតភ្លាមដើម្បីផ្ទៀងផ្ទាត់ ការចោទ ប្រកាន់ដែលក្រុមប្រឆាំងបានលើកឡើង។
ក្រុមអធិការអង្គការសហប្រជាជាតិ ស្ថិតនៅតែប្រមាណពីរបីគីឡូម៉ែត្រពីកន្លែងកើតហេតុ កន្លែងប្រើប្រាស់អាវុធគីមីដ៏ធ្ងន់ធ្ងរដូចការអះអាងរបស់ក្រុមប្រឆាំងក៏ពិតមែន ប៉ុន្តែជាចម្ងាយផ្លូវដែលមិនអាចធ្វើឆ្លងកាត់បានឡើយ នៅថ្ងៃព្រហស្បតិ៍នេះ។ តំបន់ជាយក្រុងដាម៉ាស ដែលជាកន្លែងកើតហេតុ កាន់កាប់ដោយពួកឧទ្ទាម បានរងការវាយប្រហារយ៉ាងខ្លាំង មានទាំងការបាញ់ផ្លោង កាំភ្លើងត្បាល់ ជញ្ជ្រុំឥតឈប់ កងកម្លាំងរដ្ឋាភិបាលហាក់ចង់វាយផ្តាច់ដណ្តើមយកតំបន់នេះមកវិញផង។ ក្នុងលក្ខខណ្ឌដូច្នេះ ក្រុមអធិការអង្គការសហប្រជាជាតិ ពិតជាមិនអាចចុះទៅធ្វើអង្កេតបានឡើយ។ បទឈប់បាញ់ គឺជាការចាំបាច់ ហេតុដូច្នេះហើយបានជាក្រុមប្រឹក្សាសន្តិសុខ នៅយប់មិញ ក៏បានអំពាវនាវ និងដាក់គំនាបឱ្យមានការឈប់បាញ់។
ម្យ៉ាងវិញ ក្រុមសម្ព័ន្ធមិត្តរបបក្រុងដាម៉ាស រុស្ស៊ី និងចិន បានចេញសេចក្តីថ្លែងការណ៍ផ្លូវការនៅល្ងាចមិញ ប្រឆាំង ដូចដែលធ្លាប់បានធ្វើតាំងពីមានផ្ទុះវិបត្តិនៅស៊ីរីដំបូងមក។ សម្រាប់ម៉ូស្គូ ការចោទប្រកាន់មានប្រើអាវុធគីមី គឺជាការប្រឌិតបង្កហេតុ របស់ក្រុមបក្សប្រឆាំងស៊ីរីប៉ុណ្ណោះ។
បេសកកម្មរបស់ក្រុមអ្នកឯកទេសអង្កេតដែលកំពុងមានវត្តមាននៅក្នុងប្រទេសស៊ីរីនេះ មានព្រំដែនកំណត់ដោយច្បាប់ និងដោយការព្រមព្រៀងពីដើមទី។ ដូច្នេះមិនប្រាកដថាពួកគេអាចធ្វើអ្វីសេ្រចតែចិត្តដោយភ្លាមៗបានឡើយ ! ហើយបើគ្មានរបាយការណ៍ពីក្រុមអ្នកឯកទេសនេះទេ អង្គការសហប្រជាជាតិពិតជាមិនអាចអះអាង ពោលវាចាថាជាការវាយប្រហារដោយប្រើអាវុធគីមីបានឡើយ។ ក្រុមប្រឹក្សាបានត្រឹមព្រមព្រៀងគ្នាថាជាការចាំបាច់ ដែលត្រូវធ្វើអង្កេតស៊ីជម្រៅ និងលឿនរហ័ស ព្រោះរាល់ការប្រើប្រាស់អាវុធគីមី ដោយភាគីណាក៏ដោយ ក្នុងក្របខ័ណ្ឌ ឬកាលៈទេសៈណាក៏ដោយ សុទ្ធតែរំលោភច្បាប់អន្តរជាតិទាំងអស់។ ប៉ុន្តែក្រុមប្រឹក្សាសន្តិសុខមិនចង់បង្ហើបអ្វីទាក់ទងនឹងផលវិបាកការទូតប្រសិនបើស៊ីរីពិតជាបានប្រើអាវុធប្រភេទនេះទេ។
រដ្ឋាភិបាលអាមេរិក អាចនឹងទើសទាល់យ៉ាងខ្លាំង ប្រសិនបើការអង្កេតរកឃើញថាមានប្រើអាវុធគីមី។ តែយ៉ាងណាក៏ដោយ ក៏អាមេរិក ក៏ដូចជាសម្ព័ន្ធមិត្តលោកខាងលិច ចង់ចៀសវាង មិនលូកដៃចូលក្នុងភ្លើងសង្គ្រាមនៅស៊ីរីនេះទេ ព្រោះមានហេតុផលបីយ៉ាង ៖ ទីមួយអាមេរិក បន្ទាប់ពីបរាជ័យនៅអ៊ីរ៉ាក់ និងនៅអាហ្វហ្កានិស្ថាន មិនចង់ផុងខ្លួនម្តងទៀតនៅស៊ីរីទេ ទីពីរមកពីក្រុមប្រឆាំងឬក្រុមឧទ្ទាមស៊ីរី មិនប្រាកដអាចរាប់អានបានឡើយ (ខ្លះជាពួកអ៊ីស្លាមជ្រុលនិយមដ៏គួរព្រឺខ្លាច) ហើយចុងក្រោយ រាល់អន្តរាគមន៍យោធារបស់បស្ចឹមលោក នឹងជំរុញឱ្យមានអន្តរាគមន៍ពីរុស្ស៊ី ដែលជាសម្ព័ន្ធមិត្តមិនអាចកាត់ថ្លៃបានរបស់ដាម៉ាស។ រុស្ស៊ីមានជំហរ មិនអាចកាច់បាន ការពារជានិច្ចរដ្ឋាភិបាលលោក បាស្ហា អាល់អាសាទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ