តើពួកអ៊ីស្លាមនិយមពិតជាអ្នកឈ្នះនៅក្នុងបដិវត្តន៍អារ៉ាប់ឬ?
គណបក្សអ៊ីស្លាមនិយម Ennahda បានទទួលសំឡេងឆ្នោតគាំទ្រច្រើនជាងគេនៅក្នុងការបោះឆ្នោតនៅពេលថ្មីៗកន្លងទៅនេះនៅប្រទេសទុយនីស៊ី។ ក្រោយពីមានសេចក្តីសង្ឃឹមដែលបានបំផុសឡើងដោយនិទាឃរដូវអារ៉ាប់ ក្តីបារម្ភក៏បានចាប់កើតមានឥឡូវនេះនៅប្រទេសអេហ្ស៊ីបនិងនៅប្រទេសលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៩
ក្រោយពីនិទាឃរដូវអារ៉ាប់ ឥឡូវនេះដល់វេនសរទរដូវអារ៉ាប់វិញម្តង។ ថាមពល “ប្រជាធិបតេយ្យ”ដ៏វិជ្ជមានបានផ្ទុះពុះកញ្ជ្រោល ផ្តួលរំលំរបបគ្រប់គ្រងផ្តាច់ការអារ៉ាប់ដែលមាននៅជុំវិញសមុទ្រមេឌីទែរ៉ាណេ មានដូចជាប្រទេសទុយនីស៊ី ប្រទេសអេហ្ស៊ីបនិងប្រទេសលីប៊ី។ ឥឡូវនេះ បដិវត្តន៍ប្រជាជនបានសាងផ្ទេរតួនាទីរបស់ខ្លួន ឲ្យទៅការរៀបចំបោះឆ្នោតជ្រើសតាំងសមាជិកសភាតាមបែបបទប្រជាធិបតេយ្យ។
ការបោះឆ្នោតជ្រើសតាំងសមាជិកសភានៅប្រទេសទុយនីស៊ីនៅពេលថ្មីៗកន្លងទៅនេះបានបង្ហាញឲ្យឃើញថា គណបក្សអ៊ីស្លាមនិយម Ennahda ជាអ្នកឈ្នះឆ្នោតដោយបានទទួលសំឡេងគាំទ្រច្រើនជាងគេពោលគឺប្រមាណ៤០%ពីសំណាក់ប្រជាពលរដ្ឋទុយនីស៊ី។ គណបក្សអ៊ីស្លាមនិយមទុយនីស៊ី Ennahda ឋិតនៅក្រោមការដឹកនាំរបស់លោកប្រធានបក្ស Rached Ghannouchi ដែលតែងប្រកាសប្រាប់គេឯងថា គណបក្សអ៊ីស្លាមនិយម Ennahda ជាគណបក្សនយោបាយមាននិន្នាការ “អ៊ីស្លាមមិនជ្រុលនិយម” ហើយយកតម្រាប់តាមគណបក្សអ៊ីស្លាមនិយមតួកគី AKP ដែលជាគណបក្សនយោបាយមាននិន្នាការ “អ៊ីស្លាមមិនជ្រុលនិយម”ដែលបានឡើងមកកាន់កាប់អំណាចតាំងពីឆ្នាំ២០០២នៅប្រទេសតួកគី។ ក៏ប៉ុន្តែសេចក្តីប្រកាស លោក Rached Ghannouchi នេះ ពុំបានធ្វើឲ្យគេទុកចិត្តប៉ុន្មានទេ ដោយគេបារម្ភខ្លាចគណបក្សអ៊ីស្លាមនិយម Ennahda លេងស្នៀតកាំបិទមុខពីរ។
នៅប្រទេសលីប៊ីឯណោះ ក្រោយពីបានផ្តួលរំលំរបបគ្រប់គ្រងផ្តាច់ការរបស់មូអាម៉ារកាដាហ្វ៊ីរួចមក នាឱកាសថ្លែងសុន្ទរកថា ប្រកាសរំដោះប្រទេសលីប៊ីនៅថ្ងៃអាទិត្យកន្លងទៅ លោក Moustapha Abdeljalil បានប្រកាសថា គេនឹងចាប់អនុវត្តដោយគ្មានបង្អង់ “ច្បាប់អ៊ីស្លាម”ហៅ “Charia” ។ ទាំងនេះបានបណ្តាលឲ្យសហគមន៍អន្តរជាតិកើតមានក្តីបារម្ភពុំតិចទេ។
ក្រុមប្រឹក្សាជាតិអន្តរកាលលីប៊ី CNT បានបញ្ជាក់ទៀតថា ច្បាប់លីប៊ីថ្មីនឹងធ្វើការហាមឃាត់ពុំអនុញ្ញាតឲ្យមានប្រពន្ធច្រើន ហើយនិងពុំអនុញ្ញាតឲ្យមានការលែងលះគ្នា ចំណែកឯច្បាប់ដែលបន្សល់ទុកឲ្យដោយរបបកាដាហ្វ៊ីពាក់ព័ន្ធនឹងបញ្ហាទាំងនេះនឹងទុកជាមោឃៈ។
គ្រាន់តែឮពាក្យថា “ច្បាប់អ៊ីស្លាម” ឬ “Charia” ចេញពីរង្វង់ក្រុមប្រឹក្សាជាតិអន្តរកាលលីប៊ី CNT អ្នកដឹកនាំនៃប្រទេសលោកខាងលិចកើតមានក្តីបារម្ភ ទោះបីជាអ្នកដឹកនាំនៃក្រុមប្រឹក្សាជាតិអន្តរកាលលីប៊ី CNT ថ្លែងអះអាងប្រាប់ថា ពួកគេពុំមែនជាអ្នកអ៊ីស្លាមជ្រុលនិយមក៏ដោយ។ មូលហេតុអស់ទាំងនេះហើយដែលបាននាំឲ្យប្រទេសបារាំងនិងសហភាពអឺរ៉ុបថ្លែងថា គេនឹងតាមដានឃ្លាំមើលយ៉ាងមធ្យ័តបំផុត ការគោរពសិទ្ធិមនុស្សនិងការគោរពគោលការណ៍ប្រជាធិបតេយ្យនៅប្រទេសលីប៊ី។ ប្រទេសបារាំងដែលជាប្រទេសបានទទួលស្គាល់ក្រុមប្រឹក្សាជាតិអន្តរកាលលីប៊ី CNT មុនគេមុនឯង ហើយនិងបានចូលប្រឡូកធ្វើអន្តរាគមន៍យោធានៅប្រទេសលីប៊ីដើម្បីផ្តួលរំលំរបបគ្រប់គ្រងផ្តាច់ការរបស់មូអាម៉ារកាដាហ្វ៊ី ពុំចង់ឃើញឡើយប្រទេសលីប៊ីរំដោះថ្មីធ្លាក់ទៅក្នុងកណ្តាប់ដៃរបស់ពួកអ៊ីស្លាមជ្រុលនិយម។
សូមបញ្ជាក់ថា នៅពេលដែលគេនិយាយពីអ៊ីស្លាមនិយម គេគួរដឹងថា ពួកអ៊ីស្លាមនិយមពុំមែនចេញពីសាលាតែមួយឬមានមនោគមវិជ្ជាដូចគ្នាៗនោះឡើយ។ គេកត់សម្គាល់ឃើញមាន ពួកតាលីបង់នៅប្រទេសអាហ្វហ្កានីស្ថាននិងនៅប្រទេសប៉ាគីស្ថាន ពួកវ៉ាហាប៊ីត ពួកសាឡាហ្វ៊ីស ហើយនិងអ៊ីស្លាមនិយមតួកគីដូចជាពួកអាកាប៉េដែលគ្មានទំនាស់ឡើយជាមួយលទ្ធិប្រជាធិបតេយ្យ។
រីឯប្រធានគណបក្សអ៊ីស្លាមនិយមទុយនីស៊ី Ennahda លោក Rached Ghannouchi វិញដែលធ្លាប់រស់នៅនិរទេសខ្លួននៅទីក្រុងឡុងដ្រឹ៍នៃប្រទេសអង់គ្លេសអស់រយៈកាលជាង២០ឆ្នាំ ពុំមែនរស់នៅទីក្រុងកាប៊ូលនៃប្រទេសអាហ្វហ្កានីស្ថានឬនៅទីក្រុង La Mecque នៃប្រទេសអារ៉ាប៊ីសាអ៊ូឌីតឡើយ ដូច្នេះ លោក Rached Ghannouchi ពុំមែនជាអ្នកអ៊ីស្លាមជ្រុលនិយមល្ងិតល្ងង់ចូលត្រឡោកឡើយ។
ក្នុងនាមនៃការប្រយុទ្ធប្រឆាំងនឹងមនោគមវិជ្ជាអ៊ីស្លាមជ្រុលនិយម គេពុំអាចបណ្តោយខ្លួនទៅចូលឃុបឃិតជាមួយនឹងរបបគ្រប់គ្រងយោធាផ្តាច់ការដូចជា របបគ្រប់គ្រងរបស់បេនអាលីនៅប្រទេសទុយនីស៊ីឬរបបគ្រប់គ្រងផ្តាច់ការរបស់មូអាម៉ារកាដាហ្វ៊ីនៅប្រទេសលីប៊ីដែលការពារតែផលប្រយោជន៍របស់ក្រុមគ្រួសារនិងមិត្តភក្តិរបស់ខ្លួនដោយលួចបន្លំយកទ្រព្យសម្បត្តិរបស់ប្រទេសជាតិមកធ្វើជារបស់ខ្លួនបានឡើយ។
ដូច្នេះ ប្រទេសបារាំងមានមោទនភាពយ៉ាងខ្ពស់ក្នុងការចូលរួបរួមជួយផ្តួលរំលំ របបគ្រប់គ្រងផ្តាច់ការរបស់បេនអាលីនៅប្រទេសទុយនីស៊ីនិងរបបគ្រប់គ្រងផ្តាច់ការរបស់មូអាម៉ារកាដាហ្វ៊ីនៅប្រទេសលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ