ស៊ីរី-អាមេរិក -

អត្ថបទចុះផ្សាយនៅថ្ងៃ សុក្រ 30 កញ្ញា 2011 - ព័ត៌មានទើបកែប្រើលើកចុងក្រោយ ថ្ងៃ អង្គារ 25 តុលា 2011

អ្នកគាំទ្ររបបស៊ីរីនៅទីក្រុងហាម៉ាស់រករឿងឯកអគ្គរដ្ឋទូតអាមេរិក

លោក Robert Ford ឯកអគ្គរដ្ឋទូតអាមេរិកប្រចាំប្រទេសស៊ីរី

Bloomberg / getty Images

ដោយ តាន់ ហ្សង់-ហ្វ្រង់ស្វ័រ

បក្សពួករបស់ប្រធានាធិបតីស៊ីរី Bachar el-Assad បាននាំគ្នាគប់ដុំថ្មនិងផ្លែប៉េងប៉ោះ ទៅលើរថយន្តដឹកឯកអគ្គរដ្ឋទូតអាមេរិក កាលពីថ្ងៃព្រហស្បតិ៍ទី២៩កញ្ញាម្សិលមិញ នៅទីក្រុងដាម៉ាស(Damas)។ ឧប្បត្តិហេតុនេះ បានកើតឡើង នៅពេលដែលអ្នកការទូតអាមេរិករូបនេះ កំពុងធ្វើដំណើរទៅសួរសុខទុក្ខអ្នកប្រឆាំងម្នាក់។ ក្រោយមកទៀត អាជ្ញាធរស៊ីរីបែរជាបានចោទទីក្រុងវ៉ាស៊ីនតោន ថាជាអ្នកបានញុះញង់បណ្តាលឲ្យអំពើហិង្សាផ្ទុះឡើង។

សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ

ស្តាប់ (01:17)

30/09/2011 by តាន់ ហ្សង់-ហ្វ្រង់ស្វ័រ

បក្សពួករបស់ប្រធានាធិបតីស៊ីរីជាង១០០នាក់បាននាំគ្នាចោលដុំថ្មនិងផ្លែប៉េងប៉ោះ នៅពេលដែលក្បួនឡានរបស់ឯកអគ្គរដ្ឋទូតអាមេរិក បានទៅដល់មុខគេហដ្ឋានរបស់អ្នកប្រឆាំង។ ក្រោយមកទៀត ពួកអ្នកគាំទ្ររបបលោកBachar el-Assad បាននាំគ្នារុលចូលទៅក្នុងផ្ទះ ជាទីដែលបុរសទាំងពីរកំពុងជជែកគ្នា ហើយបានវាយកំទេចគ្រឿងសម្ភារៈផ្សេងៗ តែមិនបានប៉ះ ពាល់ឯកអគ្គរដ្ឋទូតទេ។

នេះមិនមែនជាលើកទីមួយទេដែលឯកអគ្គរដ្ឋទូតអាមេរិកប្រចាំនៅទីក្រុងហាម៉ាស បានក្លាយជាតួអង្គសំខាន់នៃបច្ចុប្បន្នភាពប្រទេសស៊ីរី។ កាលពីខែកក្កដា អ្នកការទូតរូបនេះ បានធ្វើដំណើរទៅកាន់ទីក្រុងហាម៉ា នៅប៉ែកខាងលិចនៃប្រទេស ដើម្បីគាំទ្រពួកបាតុករនៅទីនោះ។ មិនតែប៉ុណ្ណោះ កាលពីដើមខែកញ្ញាកន្លងទៅនេះ ឯកអគ្គរដ្ឋទូតអាមេរិក ក៏បានសរសេរតាមប្រព័ន្ធFacebook ចោទរបបលោកBachar el-Assad ថាបានលាក់បាំងចំនួនពិតប្រាកដនៃអ្នកដែលបានស្លាប់ក្នុងប្រតិបត្តិការវាយបង្ក្រាប។

ទង្វើទាំងអស់នេះ មិនមែនជារឿងចៃដន្យទេ។ សហរដ្ឋអាមេរិកដែលបាននិងកំពុងបន្តដាក់គំនាបទៅលើលោកBachar el-Assad ប្រហែលជាបានបញ្ជាឲ្យឯកអគ្គរដ្ឋទូតរបស់ខ្លួនប្រចាំនៅប្រទេសស៊ីរី ចេញមុខគាំទ្រពួកបាតុករប្រឆាំង។ សូមជម្រាបថា កាលពីខែសីហាកន្លងទៅ ប្រធានាធិបតីអាមេរិកអូបាម៉ាបានទាមទារឲ្យលោកBachar el-Assad ចុះចេញពីមុខតំណែង៕