ផែនការលោកAnnan ជាក្តី​សង្ឃឹម​ចុង​ក្រោយ​មុន​សង្គ្រាម​ស៊ីវិល​ បេសកជន​ពិសេស​របស់​អ.ស.ប.​ ដើម្បី​ស៊ីរី​ត្រូវ​ប្រឈម​មុខ​នឹង​សំនួរ​ចោទ​ឡើង​ពិត​ប្រាកដ​ស្តីពី​ផល​ប្រយោជន៍​នៃ​បេសកកម្ម​សង្កេត​ការណ៍​ដែ​ល​នៅខណៈ​នេះ​ឱ្យ​លទ្ធផល​តែ​បន្តិច​បន្តួច​ប៉ុណ្ណោះ។​

អង្គការ​សហប្រជាជាតិ​បាន​ប្រកាស​ប្រាប់ពី​ការ​បដិសេធ​ដោយ​ប្រទេស​ស៊ីរី​ពុំព្រម​ផ្តល់​ទិដ្ឋាការ​ឲ្យ​អ្នក​សង្កេតការណ៍​អន្តរជាតិ​បីនាក់​ ​ ហើយនិង​បាន​ចោទ​របប​គ្រប់គ្រង​ស៊ីរី​និង​ក្រុមអ្នក​ប្រឆាំង​ថា​ ​ បាន​រំលោភ​លើ​កិច្ចព្រមព្រៀង​ឈប់​បាញ់គ្នា​ដែលបាន​សម្រេចបាន​កាលពី​បី​សប្តាហ៍មុន​។

នៅ​ថ្ងៃ​សៅរ៍ទី ២១ មេសា ២០១២ ក្រុមប្រឹក្សា​សន្តិសុខ​របស់​អង្គការ​សហប្រជាជាតិ​ត្រូវ​បោះឆ្នោត អនុម័ត​លើ​សេចក្តី​សម្រេច​ថ្មី​មួយ​ទៀត​ស្តីពី​ការបញ្ជូន​អ្នកសង្កេតការណ៍​បន្ថែម​ទៀត ទៅប្រទេស​ស៊ីរី។

កាល​ពីថ្ងៃ​អង្គារ ម្សិលមិញ អំពើ​ហិង្សា​នៅ​ស៊ីរី​បាន​បណ្តាល​ឲ្យ​​ស្លាប់​មនុស្ស​យ៉ាងតិច ២០នាក់។ ​នៅថ្ងៃ​ពុធ​នេះ កងកម្លាំង​របស់​លោក​អាសាដ នៅតែ​បន្ត​ធ្វើការ​បាញ់​ផ្លោង​លើ​ទីក្រុង Homs ដែល​ជា​ទីតាំង​របស់​ក្រុមប្រឆាំង ក្នុង​ពេល​ដែល​ក្រុមអ្នកសង្កេតការណ៍​អ.ស.ប. មួយក្រុម​ដំបូង​ត្រូវបាន​គេ​បញ្ជូន​ទៅ​ដល់​ស៊ីរី តាំង​ពីថ្ងៃ​អាទិត្យ។