ដំណើរមកកាន់អាស៊ីអាគ្នេយ៍របស់ មីកាអែល ហ្សង់ (Michaëlle Jean) គឺ ដើម្បីប្រមូលសន្លឹកឆ្នោតបន្ថែម
ក្នុងចំណោមបេក្ខជន៥នាក់ លោកស្រី មីកាអែល ហ្សង់ (Michaëlle Jean) ជាបេក្ខភាព នារីតែមួយគត់ សម្រាប់ការបោះឆ្នោតជ្រើសតាំង អគ្គលេខាធិការ របស់អង្គការអន្តរជាតិនៃប្រទេសនិយាយភាសាបារាំង។ ទោះបីជារដូវឃោសនាបោះឆ្នោតបានបិទបញ្ចប់ទៅហើយក្តី តែដំណើរទស្សនកិច្ចនៅអាស៊ីអាគ្នេយ៍ ១សប្តាហ៍នេះអាចឲ្យ លោកស្រីមានសង្ឃឹមច្រើនបន្ថែមទៀត ដើម្បីប្រមូលការគាំទ្រពីរដ្ឋសមាជិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
លោកស្រី Michaëlle Jean បានមកជាន់ទឹកដីអាស៊ីអាគ្នេយ៍ តាំងពីថ្ងៃទី១៣ វិច្ឆិកា ដោយផ្តើមទស្សនកិច្ចជាដំបូង នៅប្រទេសវៀតណាម បន្ទាប់មកប្រទេសឡាវ និងបញ្ចប់នៅកម្ពុជា មុននឹងធ្វើដំណើរទៅ ប្រទេសសេណេហ្គាល នៅថ្ងៃទី១៨ ខែវិច្ឆិកា។ ក្រុងដាការ(Dakar) ចុងខែវិច្ឆិកានេះ ត្រូវរៀបកិច្ចប្រជុំកំពូល លើកទី១៥ របស់អង្គការអន្តរជាតិនៃប្រទេសនិយាយភាសាបារាំង (l’Organisation internationale de la francophonie - OIF)។ វេលានោះហើយ ដែលរដ្ឋសមាជិក ត្រូវបោះឆ្នោតជ្រើសតាំង អគ្គលេខាធិការថ្មី។
សូមជម្រាបថា មានមនុស្សជាង២៧៤លាននាក់ទូទាំងប្រាំទ្វីប នៅលើពិភពលោក ដែលនិយាយ និងប្រើប្រាស់ភាសាបារាំង។ នៅឆ្នាំ១៩៩៣ ប្រទេសកម្ពុជាបានចុះឈ្មោះចូលជារដ្ឋសមាជិក របស់អង្គការអន្តរជាតិនៃប្រទេសនិយាយភាសាបារាំង, ប្រទេសឡាវចូលនៅឆ្នាំ១៩៩១ ហើយ វៀតណាម បានចុះឈ្មោះចូល តាំងពីទសវត្សរ៍ឆ្នាំ១៩៧០ មកម៉្លេះ។
សម្រាប់ការបោះឆ្នោតជ្រើសតាំង អគ្គលេខាធិការថ្មី របស់អង្គការអន្តរជាតិនៃប្រទេសនិយាយភាសាបារាំង លោកស្រី Michaëlle Jean គឺជាបេក្ខភាព នារីតែមួយគត់។ មានឈ្មោះដើម Marie Michaëlle Eden Jean លោកស្រីគឺជាអតីតអភិបាលទូទៅជំនាន់ទី២៧ និងជាមេបញ្ជាការរបស់រដ្ឋសហព័ន្ធកាណាដា។ លោកស្រីក៏ធ្លាប់ធ្វើជាប្រេសិតពិសេសរបស់អង្គការយូណេស្កូ នៅប្រទេសហៃទី (Haïti) នៅឆ្នាំ២០១០ ហើយ តាំងពីឆ្នាំ២០១១ លោកស្រី ជាអធិការបតីរបស់សាកលវិទ្យាល័យ អូតាវ៉ា ដែលជាសកលវិទ្យាល័យដ៏ល្បីនៅលើពិភពលោក។
ក្នុងដំណើរទស្សនកិច្ចក្នុងតំបន់អាស៊ីអាគ្នេយ៍ដែលជាអតីតអាណានិគមបារាំង លើកនេះ លោកស្រី Michaëlle Jean នឹងជួបពិភាក្សាជាមួយថ្នាក់ដឹកនាំជាន់ខ្ពស់របស់ប្រទេសវៀតណាម ឡាវ និងកម្ពុជា។ ពីរថ្ងៃកន្លងមកទៅ លោកស្រី បានជួបជាមួយអនុប្រធានាធិបតី និងរដ្ឋមន្ត្រីការបរទេសវៀតណាម ហើយនៅសាកលវិទ្យាល័យជាតិហាណូយ ដែលជាមជ្ឈមណ្ឌលសិក្សាវិទ្យាសាស្ត្រដ៏សំខាន់របស់វៀតណាម លោកស្រី Michaëlle Jean បានជួបសំណេះសំណាលជាមួយនឹងនិស្សិត ដែលនិយាយភាសាបារាំង ស្តីពី ការប្រឈមយុវជននិងការសិក្សា។
តាមសេចក្តីប្រកាសព័ត៌មាន ក្នុងពេលបន្តដំណើរពីប្រទេសវៀតណាមទៅឡាវ លោកស្រីនឹងទៅទស្សនា «វិទ្យាស្ថានបារាំងសម្រាប់ការសិក្សាវេជ្ជសាស្ត្រនៅតំបន់ត្រូពិក» ដែលជាស្ថាប័នជំនាញមួយ និងជាសមាជិករបស់ទីភ្នាក់ងារសាកលវិទ្យាល័យនៃអ្នកនិយាយភាសាបារាំង (AUF)។
គួរកត់សម្គាល់ដែរថា រហូតមកទល់ពេលនេះ មិនមានថ្នាក់ដឹកនាំជាន់ខ្ពស់របស់អង្គការអន្តរជាតិនៃប្រទេសនិយាយភាសាបារាំង ដែលបានធ្វើដំណើរពេញទូទាំងប្រទេសក្នុងតំបន់អាស៊ីអាគ្នេយ៍ ដូចលោកស្រី Michaëlle Jean នោះឡើយ។ ពេលកន្លងទៅ លោកស្រីបានធ្វើទស្សនកិច្ចគ្រប់ទ្វីបទាំងអស់ ដើម្បីការឃោសនាបោះឆ្នោតនៅអាណត្តិទី១៥នេះ។ ការមកកាន់ទឹកដីអាណានិគមបារាំងរបស់លោកស្រីពេលនេះ ត្រូវបានគេមើលឃើញថា អាចនឹងនាំឲ្យលោកស្រីបានទទួលការគាំទ្រកាន់តែច្រើនក្នុងការបោះឆ្នោត ជ្រើសរើសអគ្គលេខាធិការ ក្នុងចុងខែនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ