ប្រអប់ខ្មៅនៃយន្តហោះម៉ាឡេស៊ី MH17 ត្រូវបានបញ្ជូនទៅឲ្យអង់គ្លេសធ្វើការវិភាគ
ប្រអប់ខ្មៅនៃយន្តហោះម៉ាឡេស៊ី ជើងហោះហើរលេខ MH17 ដែលត្រូវធ្លាក់ នៅតំបន់ខាងកើតប្រទេសអ៊ុយក្រែន ត្រូវបានបញ្ជូនទៅដល់ប្រទេសអង់គ្លេសហើយ នៅថ្ងៃពុធនេះ។ នេះបើយោងតាមការប្រកាសរបស់រដ្ឋាភិបាលអង់គ្លេស។ ក្រុមអ្នកជំនាញខាងស៊ើបអង្កេតករណីធ្លាក់យន្តហោះរបស់អង់គ្លេសនឹងទាញយករាល់ទិន្នន័យនៅក្នុងប្រអប់ខ្មៅនេះ រួចហើយបញ្ជូនទៅឲ្យហូឡង់ ដែលជាអ្នកទទួលបន្ទុកស៊ើបអង្កេតករណីធ្លាក់យន្តហោះម៉ាឡេស៊ីនេះ។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍នៅថ្ងៃពុធ រដ្ឋាភិបាលអ៊ុយក្រែនបានអះអាងថា ប្រអប់ខ្មៅដែលអាជ្ញាធរម៉ាឡេស៊ីចរចាយកពីក្រុមឧទ្ទាម “ត្រូវបានគេយកទៅឲ្យអាជ្ញាធរអ៊ុយក្រែន ស្របទៅតាមវិធានអន្តរជាតិ ក៏ប៉ុន្តែ អាជ្ញាធរអ៊ុយក្រែនបានបដិសេធមិនទទួលយកប្រអប់ខ្មៅនេះមកកាន់កាប់សូម្បីតែមួយនាទី”។
រដ្ឋាភិបាលអ៊ុយក្រែនក៏បានបញ្ជាក់ដែរថា ប្រអប់ខ្មៅទាំងពីរនេះ ដែលមួយថតសំឡេងនៅក្នុងបន្ទប់បើកបរ និងមួយទៀតថតទិន្នន័យនៃការហោះហើររបស់យន្តហោះម៉ាឡេស៊ី MH17 ត្រូវបានបញ្ជូនចេញពីអ៊ុយក្រែនទៅឲ្យអង់គ្លេស ដោយមានការព្រមព្រៀងគ្នា រវាងអ៊ុយក្រែន ម៉ាឡេស៊ី និងហូឡង់ និងដោយមានការសង្កេតតាមដានពីសំណាក់អង្គការអាកាសចរណ៍ស៊ីវិលអន្តរជាតិ (International Civil Aviation Organization)។
គេរំពឹងថា អ្នកជំនាញអង់គ្លេសនឹងធ្វើការវិភាគទៅលើទិន្នន័យនៃប្រអប់ខ្មៅទាំងពីរនេះ ចប់សព្វគ្រប់ក្នុងរយៈពេល ២៤ម៉ោង រួចហើយបញ្ជូនទិន្នន័យទាំងនេះទៅឲ្យអាជ្ញាធរហូឡង់ ដែលជាអ្នកទទួលបន្ទុកដឹកនាំការស៊ើបអង្កេត។
គួរបញ្ជាក់ថា យោងតាមវិធានអន្តរជាតិ នៅក្នុងករណីគ្រោះថ្នាក់ធ្លាក់យន្តហោះ គឺប្រទេសដែលជាទីតាំងកើតហេតុ ដែលជាអ្នកទទួលបន្ទុកដឹកនាំការស៊ើបអង្កេត ដោយមានការចូលរួមពីសំណាក់ប្រទេសពាក់ព័ន្ធផ្សេងទៀត រួមមាន ប្រទេសដែលជាម្ចាស់ក្រុមហ៊ុនអាកាសចរណ៍ និងប្រទេសដែលជាម្ចាស់ក្រុមហ៊ុនផលិតយន្តហោះដែលជួបគ្រោះថ្នាក់។
ក្នុងករណីធ្លាក់យន្តហោះម៉ាឡេស៊ី MH17 គឺអាជ្ញាធរអ៊ុយក្រែន ដែលត្រូវទទួលបន្ទុកដឹកនាំការស៊ើបអង្កេត ដោយមានការចូលរួមពីអាជ្ញាធរម៉ាឡេស៊ី ដែលជាម្ចាស់ក្រុមហ៊ុនអាកាសចរណ៍ និងអ្នកជំនាញមកពីសហរដ្ឋអាមេរិក ដោយសារតែយន្តហោះដែលជួបនឹងគ្រោះថ្នាក់នេះ ជាយន្តហោះធុនប៊ូអ៊ីង ផលិតនៅសហរដ្ឋអាមេរិក។ ក៏ប៉ុន្តែ ដោយសារតែអ៊ុយក្រែនផ្ទាល់ត្រូវរងការចោទប្រកាន់ពីរុស្ស៊ីថាជាអ្នកទទួលខុសត្រូវក្នុងការធ្លាក់យន្តហោះនេះ ទើបរដ្ឋាភិបាលអ៊ុយក្រែនប្រគល់ភារៈដឹកនាំការស៊ើបអង្កេតនេះទៅឲ្យហូឡង់ ដែលជាប្រទេសមានពលរដ្ឋស្លាប់ច្រើនជាងគេ នៅក្នុងគ្រោះថ្នាក់ធ្លាក់យន្តហោះនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ