Delicious
Digg
Facebook
Twitter
Yahoo!
Technorati
កម្ពុជា-ម៉ិកស៊ិក -
អត្ថបទចុះផ្សាយនៅថ្ងៃ ចន្ទ 18 មិថុនា 2012 -
ព័ត៌មានទើបកែប្រើលើកចុងក្រោយ ថ្ងៃ ចន្ទ 18 មិថុនា 2012
ម៉ិកស៊ិកគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខUN
លោកនាយករដ្ឋមន្ត្រីហ៊ុន សែនជាមួយប្រធានាធិបតីម៉ិកស៊ិក លោកហ្វីលីព កាល់ដេរ៉ុន ហ៊ីណូហ្សូសា
RFI/Delux Leang
កម្ពុជាទទួលបានការគាំទ្រពីប្រទេសម៉ិកស៊ិកមួយទៀតចំពោះបេក្ខភាពខ្លួនជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ ការប្រកាសនេះត្រូវបានធ្វើឡើងនៅក្នុងជំនួបទ្វេភាគីរវាងមេដឹកនាំជាន់ខ្ពស់កម្ពុជា និងម៉ិកស៊ិកកាលពីថ្ងៃទី១៧មិថុនាម្សិលមិញ។ ជំនួបនោះក៏បានផ្តល់ឱកាសអោយកម្ពុជានិងម៉ិកស៊ិកពិចារណាអំពីការផ្តើមទំនាក់ទំនងសហប្រតិបត្តិការទ្វេភាគីជាមួយគ្នាផងដែរ។
កម្ពុជានៅបន្តស្វែងរកការគាំទ្រពីបរទេសចំពោះបេក្ខភាពរបស់ខ្លួនជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ ក្នុងឱកាសដែលគណៈប្រតិភូកម្ពុជាកំពុងនៅក្នុងប្រទេសម៉ិកស៊ិកដើម្បីចូលរួមក្នុងកិច្ចប្រជុំកំពូលនៃប្រទេសឧស្សាហកម្មជឿនលឿនទាំង២០នោះ ប្រតិភូជាន់ខ្ពស់កម្ពុជា ក្នុងឋានៈជាប្រធានអាស៊ានផង បានជួបពិភាក្សាទ្វេភាគីជាមួយប្រធានាធិបតីម៉ិកស៊ិក លោកហ្វីលីព កាល់ដេរ៉ុន ហ៊ីណូហ្សូសា។
នៅពេលនោះហើយដែលលោកនាយករដ្ឋមន្ត្រីហ៊ុន សែនបានថ្លែងអរគុណរដ្ឋាភិបាលម៉ិកស៊ិកដែលបានគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ នេះបើយោងតាមការផ្សាយអោយដឹងរបស់ទូរទស្សន៍ជាតិកម្ពុជា។
អ្នកនាំពាក្យក្រសួងការបរទេសកម្ពុជា លោកកុយ គួងបានថ្លែងអោយដឹងថារហូតដល់ពេលនេះមានប្រទេសប្រមាណ១០០ប្រទេសហើយ ក្នុងនោះក៏មានប្រទេសមហាអំណាចធំៗផងដែរ ដែលបានថ្លែងគាំទ្រកម្ពុជាអោយកាន់តំណែងសមាជិកមិនអចិន្ត្រៃយ៍នៅក្នុងអង្គការពិភពលោកមួយនេះ។
គួរបញ្ជាក់ថា មានបេក្ខភាព៣ពីអាស៊ីដែលបានចុះឈ្មោះធ្វើជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិនេះ។ គឺប្រទេសកូរ៉េខាងត្បូង ប៊ូតាន និងកម្ពុជានេះឯង។ គូប្រជែងខ្លាំងរបស់កម្ពុជាគឺប្រទេសកូរ៉េខាងត្បូង នៅក្នុងការបោះឆ្នោតដែលនឹងប្រព្រឹត្តទៅខែតុលាខាងមុខ។
ជំនួបរវាងប្រតិភូថ្នាក់ដឹកនាំកម្ពុជា និងម៉ិកស៊ិកបានផ្តល់ពេលវេលាអោយភាគីទាំងពីរផ្តើមគិតគូរអំពីការផ្លាស់ប្តូរសហប្រតិបត្តិការទ្វេភាគីស៊ីជម្រៅផងដែរ។ គួររំលឹកថា រដ្ឋាភិបាលម៉ិកស៊ិកក្នុងនាមជាម្ចាស់ផ្ទះនៃកិច្ចប្រជុំកំពូលសេដ្ឋកិច្ច G20 បានអញ្ជើញលោកនាយករដ្ឋមន្ត្រីកម្ពុជា ហ៊ុន សែន ក្នុងឋានៈជាប្រធានអាស៊ានដើម្បីថ្លែងសុន្ទរកថាគន្លឹះសេដ្ឋកិច្ចនៅក្នុងកិច្ចប្រជុំកំពូលនោះ៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ