ស៊ីរី-រុស្ស៊ី -

អត្ថបទចុះផ្សាយនៅថ្ងៃ ពុធ 25 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 26 កក្កដា 2012

មីទ្ទិញប្រឆាំងទល់នឹងរុស្ស៊ីប្រព្រឹត្តទៅនៅរដ្ឋធានីលីបង់

ជនស៊ីវិលស៊ីរីម្នាក់កុំពុងឈរពិនិត្យមើលរថក្រោះកងទ័ពស៊ីរីនៅលើផ្លូវសំខាន់នៅ Azaz ប៉ែកខាងជើងស៊ីរី ថ្ងៃ២៥កក្កដា២០១២

REUTERS/Umit Bektas

ដោយ កែវ ឆាយា

ពេលដែលមីទ្ទិញនេះ ប្រព្រឹត្តទៅនៅពីមុខស្ថានទូតរុស្ស៊ី ក្នុងក្រុង Beyrouth ប្រឆាំងនឹងការគាំទ្ររបស់ម៉ូស្គូ ដល់របបលោកប្រធានាធិបតីស៊ីរី Bachar-al-Assad នាវាចម្បាំងរុស្ស៊ីមួយក្រុម បានបើកចូលដល់សមុទ្រ Méditerranée ទៅហើយ តាមមើលទៅ គឺតម្រង់ទៅកាន់ឆ្នេរប្រទេសស៊ីរីតែម្តង។

សេចក្តីរាយការណ៍របស់ កែវ ឆាយាពីទីក្រុង ម៉ូស្គូ

ស្តាប់ (02:27)

25/07/2012 by កែវ ឆាយា

យុវជនជាតិលីបង់ និងជាតិស៊ីរី រាប់សិបនាក់ ដែលតាមការប្រកូកប្រកាសលើទំព័រ Facebook បានទៅប្រមូលផ្តុំ ជួបជុំគ្នានៅពីមុខស្ថានទូតរុស្ស៊ី ក្នុងក្រុង Beyrouth ហើយនាំគ្នា គប់ ទៅលើអគារស្ថានទូតនោះ គឺយន្តហោះតូចៗធ្វើពីក្រដាស សរសេរទៅដោយឈ្មោះពលរដ្ឋ ស៊ីរីណា ធ្លាក់ខ្លួនស្លាប់ ដោយមកពីការបាញ់បង្ក្រាប ពីខាងកងកម្លាំងអាជ្ញាធរស៊ីរី លើចលនាងើបឡើងបះបោរ របស់ពួកគេ ប្រឆាំងនឹងរបបផ្តាច់ការនៃប្រធានាធិបតីស៊ីរី Bachar-al-Assad របបដែលតែងទទួលការគាំទ្រពីសម្ព័ន្ធមិត្តរុស្ស៊ីរបស់ខ្លួន។

មកពីមូលហេតុនេះ បានជា លើផ្ទាំងបដា ជ្រោងលើកឡើងដោយបាតុករទាំងនោះ មានរំលេច ចេញមកនូវឃ្លា ទាមទារពីរុស្ស៊ី ៖” ឲ្យឈប់បំពាក់អាវុធដល់របបស៊ីរីនោះ “,”ឲ្យឈប់ជួយចូកចែវ ដល់ឃាតកម្មរង្គាលនៅស៊ីរី “។ បដាមួយថែមទាំងមានន័យផ្គើនឲ្យរុស្ស៊ីទៅផង ថា៖
“ រដូវធ្លាក់ទឹកកកនៅរុស្ស៊ី មិនអាចបញ្ឈប់ដំណើរទៅមុខ នៃរដូវស្លឹកឈើលាស់នៅស៊ីរីឡើយ”។

សេចក្តីសម្រេចអនុម័តយក ដោយមីទ្ទិញនោះ អំពាវនាវរដ្ឋាភិបាលរុស្ស៊ី ឲ្យឈប់ផ្តល់ រាល់ជំនួយផ្លូវនយោបាយ ផ្លូវការទូត ផ្លូវយោធា ដល់របបគ្រប់គ្រងនៅស៊ីរី។

គួររំលឹកថា ប៉ុន្មានថ្ងៃមុន ដោយរួមជាមួយចិន រុស្ស៊ី ក្នុងឋានៈជាបង្អែកយូរឆ្នាំមកហើយ ខាង ផ្តល់អាវុធដល់ស៊ីរី បានប្រើជាលើកទី៣សិទ្ធិវេតូ ខ្ទប់មិនឲ្យក្រុមប្រឹក្សាសន្តិសុខអ.ស.ប. ចេញទៅកើតសេចក្តីសម្រេចដែលគម្រាមមួលខ្ចៅបន្តឹងទណ្ឌកម្ម
ទល់នឹងក្រុងដាម៉ាស។

ក្នុងពេលជាមួយគ្នានេះ តាមដែលក្រសួងការពារជាតិរុស្ស៊ី ប្រកាសឲ្យដឹង ថ្ងៃ២៤កក្កដា មាននាវាចម្បាំងរុស្ស៊ីមួយក្រុម បានបើកឆ្លងកាត់ដៃសមុទ្រ Gibraltar រួចចូលដល់ផ្ទៃទឹកសមុទ្រ Méditerranée ទៅហើយ។ ស្របនឹងប្រភពយោធា-ការទូតមិនបញ្ចេញឈ្មោះ នាវារុស្ស៊ីទាំងនេះ ដែលចេញពីសមាសភាព នៃកងនាវារុស្ស៊ីប្រចាំសមុទ្រឧត្តរ សមុទ្របាល់ទិក និង សមុទ្រខ្មៅក្នុងក្របខ័ណ្ឌនៃលំហាត់សឹកដែលមានគ្រោងទុក ក្នុងខែនេះតែម្តង ត្រូវបើកទៅដល់ផែស៊ីរី Tartous ជាមូលដ្ឋានតែមួយគត់របស់រុស្ស៊ី នៅមាត់សមុទ្រ Méditerranée ដើម្បី បំពេញបន្ថែម នូវ ស្បៀងឥន្ធនៈ ស្បៀងទឹក ស្បៀងអាហារជាដើម។

ជាការកត់សម្គាល់ គឺក្នុងឆ្នាំ១៩៧១ ដែលរវាងស៊ីរីនិងសហភាពសូវៀត មានចុះជា សន្ធិសញ្ញា អនុញ្ញាត ឲ្យនាវារុស្ស៊ីចូលទៅសំចត នៅផែTartous ជាថ្នូរនឹង ការផ្គត់ផ្គង់ឲ្យទៅស៊ីរី គឺ ប្រព័ន្ធការពារដែនអាកាស និង យន្តហោះប្រដេញធុន Mig-21 ៕