អ្នកតវ៉ារឿងដីធ្លីបិទផ្លូវជាតិ៤៨ទៅកាន់កោះកុង ក្រោមតំណក់ទឹកភ្លៀងច្រើនម៉ោង
ប្រជាពលរដ្ឋច្រើនរយនាក់បានបិទផ្លូវជាតិលេខ៤៨ឆ្ពោះទៅកាន់ខេត្តកោះកុង តាំងពីម៉ោងជាង១០ព្រឹករហូតមកដល់ល្ងាចថ្ងៃសៅរ៍នេះ។ រថយន្តរាប់រយគ្រឿងបានជាប់គាំងនៅលើទ្រូងផ្លូវក្នុងស្រុកស្រែអំបិលខេត្តកោះកុង។ មូលហេតុគឺដោយសារ ប្រជាពលរដ្ឋមានជម្លោះជាមួយក្រុមហ៊ុន លោក ឧកញ៉ា លី យ៉ុងផាត់ ពីរឿងដីសម្បទានសេដ្ឋកិច្ចដាំអំពៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
មួយថ្ងៃក្រោយការបញ្ចប់ទស្សនកិច្ចរបស់លោក សុរិយា ប្រាសាទ ស៊ូប៊ែឌី អ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា ប្រជាពលរដ្ឋនៅស្រុកស្រែអំបិលខេត្តកោះកុងច្រើនរយនាក់បាននាំគ្នាតវ៉ាបិទផ្លូវជាតិលេខ៤៨ឆ្ពោះទៅកាន់ខេត្តកោះកុងក្រោមតំណក់ទឹកភ្លៀងជាច្រើនម៉ោង។
ការតវ៉ារបស់ប្រជាពលរដ្ឋច្រើនរយនាក់នៅថ្ងៃទី១២ខែឧសភានេះគឺធ្វើឡើងតាមរបៀបស្រាក់ដៃគ្នាឈរកាត់ទទឹងផ្លូវតែម្តង។ ការតវ៉ាបានចាប់ផ្តើមឡើងនៅម៉ោងជាង១០កាលពីព្រឹកមិញ ហើយប៉ុន្មានម៉ោងក្រោយមក រថយន្តរាប់រយគ្រឿងបានកកស្ទះទាំងសងខាងផ្លូវ ពីភ្នំពេញទៅកោះកុងនិងពីកោះកុងមកភ្នំពេញ។ រថយន្តភាគច្រើនគឺជារថយន្តទេសចរណ៍។ នេះបើយោងតាមសាក្សីនៅកន្លែងកើតហេតុបញ្ជាក់ប្រាប់កាលពីព្រឹកមិញ។
ការបិទផ្លូវនេះគឺជាការតវ៉ាប្រឆាំងនឹងក្រុមហ៊ុនដាំអំពៅរបស់លោកឧកញ៉ា លី យ៉ុងផាត់ ដែលទទួលបានដីសម្បទានពីរដ្ឋាភិបាល។ ប្រជាជនបានចោទថា ក្រុមហ៊ុនបានរំលោភយកដីរបស់ពួកគាត់តាមរយៈដីសម្បទានសេដ្ឋកិច្ចនេះ។ ជម្លោះនេះបានកើតឡើងអស់រយៈពេលជាច្រើនឆ្នាំមកហើយប៉ុន្តែគ្មានដំណោះស្រាយ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាដែលមានវត្តមាននៅកន្លែងកើតហេតុ ហើយបានតាមដានការតវ៉ារបស់ប្រជាជននៅក្នុងស្រុកស្រែ អំបិលខេត្តកោះកុងយ៉ាងយកចិត្តទុកដាក់នោះ បាននិយាយប្រាប់តាមទូរស័ព្ទមកថា៖«ប្រជាពលរដ្ឋធ្វើយ៉ាងនេះគឺដោយសារពួកគេគ្មានជម្រើសអ្វីផ្សេងទៀត។ ការបិទផ្លូវនេះវាប៉ះពាល់អ្នកធ្វើដំណើរខ្លះហើយ ប៉ុន្តែពួកគាត់មិនអាចធ្វើអ្វីក្រៅពីនេះទេ»។
ក្នុងរយៈពេលចុងក្រោយនេះ ប្រជាពលរដ្ឋដែលមានជម្លោះដីធ្លីបានជ្រើសរើសយកមធ្យោបាយបិទផ្លូវជាតិដើម្បីស្វែងរកដំណោះស្រាយ។ ការបិទផ្លូវគឺជាវិធានការមួយរបស់ប្រជាពលរដ្ឋដើម្បីដាក់សម្ពាធទៅលើរដ្ឋាភិបាលអោយរកដំណោះស្រាយជូនពួកគេប៉ុន្តែទង្វើនេះទទួលបានការរិះគន់ពីសំណាក់អ្នកជំនាញសង្គមមួយចំនួនផងដែរ។ រងការរិះគន់ពីព្រោះសកម្មភាពនេះបង្កផលប៉ះពាល់ដល់ក្រុមមនុស្សផ្សេងទៀតដែលមិនពាក់ព័ន្ធក្នុងជម្លោះ។
លោក សុរិយា ប្រាសាទ ស៊ូប៊ែឌី អ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជាបាននិយាយកាលពីម្សិលមិញនៅក្នុងសេចក្តីប្រកាសព័ត៌មានថា ប្រភេទនៃការតវ៉ាមានច្រើនបែប ជាឧទាហរណ៍ ដូចជា ការបិទផ្លូវរបស់សហគមន៍ជាដើម តែទង្វើនេះអាចប៉ះពាល់ខ្លាំងដល់អ្នកដទៃដែលមិនពាក់ព័ន្ធនឹងវិវាទ។
របាយការណ៍របស់អង្គការ អាដហុក បានបង្ហាញកាលពីពេលថ្មីកន្លងមកនេះថា រដ្ឋាភិបាលនៃប្រទេសកម្ពុជាបានផ្តល់ដីសម្បទានសេដ្ឋកិច្ចចំនួនជាង២លានហិកតាដល់ក្រុមហ៊ុនឯកជន។ រឿងដីសម្បទាននេះគឺជាប្រធានបទចម្បងក្នុងដំណើរទស្សនកិច្ចរបស់អ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជាក្នុងសប្តាហ៍នេះ។
លោកនាយករដ្ឋមន្ត្រី ហ៊ុន សែន ក្នុងសប្តាហ៍នេះបានប្រកាសថា រដ្ឋាភិបាលសម្រេចផ្អាកការផ្តល់ដីសម្បទានសេដ្ឋកិច្ចដល់ក្រុមហ៊ុនឯកជន។ រីឯកាលពីប៉ុន្មានខែមុន ដោយសារមានជម្លោះដីធ្លីកើតឡើងច្រើនតាមរយៈការផ្តល់ដីសម្បទាននោះ លោកប្រមុខរាជរដ្ឋាភិបាល ហ៊ុន សែន បានព្រមានដកយកដីសម្បទានសេដ្ឋកិច្ចណាដែលម្ចាស់ដីមិនបានដោះស្រាយជាមួយប្រជាពលរដ្ឋពាក់ព័ន្ធអោយបានជ្រះស្រឡះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ