តំបន់ទន្លេមេគង្គ -

អត្ថបទចុះផ្សាយនៅថ្ងៃ ព្រហស្បតិ៍ 08 ធ្នូ 2011 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 08 ធ្នូ 2011

ប្រទេសមេគង្គក្រោមជួបគ្នាជជែកអំពីទំនប់សាយ៉ាបុរីរបស់ឡាវ

បណ្តាប្រទេសប៉ែកខាងក្រោមទន្លមេគង្គបារម្ភពីផលប៉ះពាល់នៃទំនប់សាយ៉ាបុរី

RFI/Channa Siv

ដោយ លាង ដឺលុច

ប្រទេស៤ដែលស្ថិតតាមអមទន្លេមេគង្គក្រោម បានជួបប្រជុំគ្នា នៅក្នុងក្រុងសៀមរាប ប្រទេសកម្ពុជា នៅព្រឹកថ្ងៃព្រហស្បតិ៍នេះ ដើម្បីពិភាក្សាគ្នាអំពីអនាគតនៃទំនប់វារីអគ្គីសនីដ៏ធំសម្បើម និងដ៏ចម្រូងចម្រាសមួយរបស់ប្រទេសឡាវ។ ទំនប់សាយ៉ាបូរីតម្លៃជិត៤ពាន់លានដុល្លារត្រូវបានក្រុមអ្នកបរិស្ថានសម្តែងការព្រួយបារម្ភថា វានឹងបង្កអោយមានការប៉ះពាល់ដល់ប្រជាជនប្រមាណ៦០លាននាក់ ដែលរស់នៅអាស្រ័យទន្លេមេគង្គនេះ។

សេចក្តីរាយការណ៍របស់លាង ដឺលុច ពីភ្នំពេញ

ស្តាប់ (01:30)

08/12/2011

អ្នកជំនាញរបស់កម្ពុជា ឡាវ វៀតណាម និងថៃបានផ្តើមជួបគ្នា នៅថ្ងៃព្រហស្បតិ៍ទី៨ធ្នូនេះ ដើម្បីជជែកអំពីអនាគតនៃទំនប់សាយ៉ាបូរីរបស់ប្រទេសឡាវដ៏ចម្រូងចម្រាស។ កិច្ចប្រជុំដែលបានប្រព្រឹត្តទៅ នៅក្នុងក្រុងសៀមរាបប្រទេសកម្ពុជា។

ទំនប់សាយ៉ាបូរីកំពុងក្លាយជាប្រធានបទដ៏តឹងតែងរវាងប្រទេសជិតខាងក្នុងអាងទន្លេមេគង្គ នៅពេលដែលទំនប់នឹងផ្តល់ភាពអនុគ្រោះចំពោះប្រទេសខ្លះ ហើយនឹងផ្តល់ផលវិបាកសម្រាប់ប្រទេសខ្លះទៅវិញ។ ទំនប់សាយ៉ាបូរី ដែលមានតម្លៃរហូតដល់៣៨០០លានដុល្លារ គឺជាទំនប់ធំមួយនៅក្នុងចំណោមគម្រោងទំនប់១១ ដែលគេគ្រោងសង់នៅតាមបណ្តោយអាងទន្លេមេគង្គ។

អ្នកជំនាញបរិស្ថានបានអះអាងថា គម្រោងទំនប់សាយ៉ាបូរី ដែលផ្តល់ថាមពល១២៦០មេហ្កាវ៉ាត់នឹងផ្តល់ផលប៉ះពាល់ដល់មនុស្ស៦០លាននាក់ ដែលរស់នៅតាមដងទន្លេមេគង្គ។

រដ្ឋាភិបាលថៃដែលមានប្រយោជន៍ច្រើនពីទំនប់សាយ៉ាបូរីនេះ ដោយត្រូវទិញអគ្គីសនីប្រមាណ៩៥ភាគរយទៅហើយពីទំនប់សាយ៉ាបូរី មិនបានបង្ហាញការប្រឆាំងទៅនឹងគម្រោងនេះទេ។ ចំណែកឯកម្ពុជានិងវៀតណាមវិញបានបង្ហាញការរារែក និងព្រួយបារម្ភខ្លាំង។ ប្រទេសវៀតណាម ដែលជាប្រទេសស្ថិតនៅក្រោមគេ បានទាមទារអោយផ្អាកគម្រោងនេះក្នុងរយៈ១០ឆ្នាំឯណោះ។ ក្រោយពីមានការពិភាក្សាគ្នាជាលក្ខណៈតំបន់កាលពីខែឧសភានោះ គម្រោងទំនប់វារីអគ្គីសនីសាយ៉ាបូរីត្រូវបានផ្អាក។ ប៉ុន្តែកាលពីសប្តាហ៍កន្លងទៅនេះ អនុរដ្ឋមន្ត្រីក្រសួងឧស្សាហកម្មឡាវ លោកវីរ៉ាផន វីរ៉ាវង់បានថ្លែងថា គម្រោងនេះនឹងត្រូវចាប់ផ្តើមឡើងវិញ៕