Delicious
Digg
Facebook
Twitter
Yahoo!
Technorati
កីឡាអូឡាំពិក -
អត្ថបទចុះផ្សាយនៅថ្ងៃ សុក្រ 27 កក្កដា 2012 -
ព័ត៌មានទើបកែប្រើលើកចុងក្រោយ ថ្ងៃ សុក្រ 27 កក្កដា 2012
ទីក្រុងឡុងដ៍ចំណាយលុយសន្ធឹកសន្ធាប់ដើម្បីទទួលកីឡាអូឡាំពិក
ទីក្រុងឡុងដ៍ទទួលរៀបចំកីឡាអូឡាំពិកជាលើកទីបី
© REUTERS
ពិធីបើកសម្ពោធកីឡាអូឡាំពិកលើកទី ៣០ នឹងចាប់ផ្តើម នៅយប់នេះ ក្នុងទីក្រុងឡុងដ៍ ក្រោមអធិបតីភាពរបស់ព្រះមហាក្សត្រិយានីElisabethe ទីពីរ។ នៅក្នុងការប្រកួតកីឡាអូឡាំពិកដែលមានលក្ខណៈប្រវត្តិសាស្រ្តសម្រាប់ប្រទេសអង់គ្លេស មានកីឡាករ១០៤០០នាក់មកពីប្រទេសចំនួន ២០៤ចូលរួមប្រកួតដើម្បីដណ្តើមមេដាយ។ មនុស្សជាង ៦ម៉ឺននាក់នឹងចូលទៅទស្សនាកម្មវិធីបើកដោយផ្ទាល់ នៅស្តាតអូឡាំពិក។ រដ្ឋាភិបាលបានចំណាយថវិកាប្រមាណ ១១ពាន់លានអឺរ៉ូ សម្រាប់ទទួលកីឡាអូឡាំពិក ដែលចាប់ប្រព្រឹត្តទៅ ពីថ្ងៃសុក្រទី ២៧ កក្កដា ដល់ថ្ងៃទី ១២សីហា ឆ្នាំ ២០១២។
ជាផ្លូវការរដ្ឋាភិបាលអង់គ្លេសបានចំណាយលុយ ជាង ១១ពាន់លានអឺរ៉ូ សម្រាប់រៀបចំការប្រកួតកីឡាអូឡាំពិកលើកនេះ។ ចំណាយមានកាន់តែច្រើន គឺច្រើនដល់ ទៅបីដង បើប្រៀបធៀបនឹងថវិកាដែលគេគ្រោង កាលពីឆ្នាំ ២០០៥ ដែលថា នឹងចាយវាយត្រឹមតែ៤,៥ពាន់លានអឺរ៉ូប៉ុណ្ណោះ។ លោកនាយករដ្ឋមន្រ្តីអង់គ្លេសទើបនឹងចុះហត្ថលេខាបង្កើនទ្វេលុយដល់ទៅ ៩១លានអឺរ៉ូ សម្រាប់រៀបចំកម្មវិធីបើក និងបិទ ការប្រកួតកីឡាអូឡាំពិកឲ្យបានល្អឥតខ្ចោះ។ លោកនាយករដ្ឋមន្រ្តី David Camerounដោយពិតទៅល្បីខាងកាត់បន្ថយចំណាយសាធារណៈ លើគ្រប់វិស័យ។ នៅក្នុងត្រីមាសទីពីរឆ្នាំនេះ កំណើនសេដ្ឋកិច្ចអង់គ្លេស កំពុងដើរថយក្រោយ ប្រជាជនអង់គ្លេសត្រូវរដ្ឋប្រាប់ឲ្យរឹតខ្សែក្រវ៉ាត់ សន្សំសំចៃ។ ប៉ុន្តែ សម្រាប់កីឡាអូឡាំពិក នាយករដ្ឋមន្រ្តីអង់គ្លេសមិនខ្លាចនឹងចំណាយប្រាក់សន្ធឹកសន្ធាប់ទេ។ សម្រាប់លោកDavid Cameroun វាជាឱកាសមាស ដើម្បីបង្ហាញថា អង់គ្លេសជាព្រះរាជាណាចក្ររុងរឿងក្នុងអតីតកាល ហើយអនាគតរបស់ប្រទេសនេះក៏កំពុងត្រចះត្រចង់ដែរ។ ដូច្នេះ ប្រជាជនអង់គ្លេសត្រូវចាប់យកឱកាសនេះឲ្យបាន។
ថវិកាជាង ១១ពាន់លានអឺរ៉ូ ដែលរដ្ឋបានចំណាយលើការរៀបចំកីឡាអូឡាំពិកក៏បានផ្តល់ប្រយោជន៍ខ្លះដែរ តាមរយៈ ការសាងសង់អគារហេដ្ឋារចនាសម្ព័ន្ធ សម្រាប់ការប្រកួត។ ការដ្ឋានសំណង់បានផ្តល់ការងាររាប់ម៉ឺន រាប់ពាន់ដល់ប្រជាជនអង់គ្លេស។ លើសពីនោះ ទីក្រុងអង់គ្លេសឆ្លៀត រៀបចំការប្រកួតកីឡាអូឡាំពិក ដើម្បីបង្កើតបានសំណង់ថ្មី ដូចជាផ្លូវថ្នល់ និងអគារផ្សេងៗ។ លោកនាយករដ្ឋមន្រ្តីអង់គ្លេសវិញរំពឹងថា សមិទ្ធិផលក្រោយកីឡាអូឡាំពិក នឹងអាចឲ្យរដ្ឋរកប្រាក់ចំណេញបាន១៣ពាន់លានអឺរ៉ូ ពីពេលនេះ រហូតដល់ឆ្នាំ ២០១៦។
ប៉ុន្តែ សម្រាប់អ្នកសេដ្ឋកិច្ចជាច្រើន ផលប្រយោជន៍ពីការប្រកួតកីឡាអូឡាំពិកនឹងមិនធ្លាក់ដល់ដៃរដ្ឋដោយផ្ទាល់ទេ។ គឺផ្នែកឯកជន ដូចជាក្រុមហ៊ុនសណា្ឋគារ និងក្រុមហ៊ុនផលិតសម្ភារៈ ដែលរកប្រាក់ចំណេញដោយផ្ទាល់ នៅក្នុងឱកាសការប្រកួតកីឡាអូឡាំពិក។ ជាញឹកញាប់ ប្រទេសម្ចាស់ផ្ទះ មិនងាយនឹងសង្ឃឹមរកប្រាក់ចំណេញ ពីកីឡាអូឡាំពិកទេ។ ផ្ទុយទេ គេរង់ចាំតែខាត ប៉ុណ្ណោះ។ ជាក់ស្តែង ប្រទេសចិន (៤២លានអឺរ៉ូ) និងក្រិក ដែលទើបរៀបចំកីឡាអូឡាំពិក ប៉ុន្មានឆ្នាំ ចុងក្រោយនេះ ក៏ខាតធ្ងន់ខ្លួនដែរ។ ឧទាហរណ៍ នៅក្រិក ការចំណាយលុយច្រើនសន្ធឹកសន្ធាប់ ប្រមាណ ៩ពាន់លានអឺរ៉ូ គឺច្រើនជាងសមត្ថភាពរបស់ខ្លួន បានធ្វើរដ្ឋក្រិកខាតបង់ និងជំពាក់គេវណ្ឌក។ ប៉ុន្តែ ក្នុងករណីអង់គ្លេស ក្រសួងសេដ្ឋកិច្ចបានអះអាងថា គេនៅសន្សំសំចៃលុយបាន គឺគេនៅមានជាង ៥០០លានអឺរ៉ូសម្រាប់ទប់ទល់ក្រែងមានការខ្វះខាត។
ការខាតបង់ច្រើន បានធ្វើឲ្យប្រទេសមួយចំនួនរុញរាលែងចង់ទទួលកីឡាអូឡាំពិក។ ប្រទេសអ៊ីតាលីដែលពេលនេះកំពុងជួបបញ្ហាសេដ្ឋកិច្ចបានបោះបង់បេក្ខភាពរបស់ខ្លួន សម្រាប់ការរៀបចំកីឡាអូឡាំពិកឆ្នាំ ២០២០ បន្ទាប់ពីទីក្រុងRio របស់ប្រទេសប្រេស៊ីល។
ទីក្រុងRio នឹងអាចសង្ឃឹមប្រើកីឡាអូឡាំពិកដើម្បីទាក់ទាញទេសចរណ៍ ប៉ុន្តែ ទីក្រុងឡុងដ៍ ជាទីក្រុងដែលទាក់ទាញក្រុមទេសចរណ៍ច្រើនជាងគេក្នុងពិភពលោករួចទៅហើយ។ ដូច្នេះ ឡុងដ៍មិនចាំបាច់ប្រើកីឡាអូឡាំពិកនេះដើម្បីផលប្រយោជន៍ទេសចរណ៍ទេ។ តាម នាយករដ្ឋមន្រ្តីអង់គ្លេស កីឡាអូឡាំពិកលើកនេះមានបំណងទាក់ទាញ ក្រុមវិនិយោគទៅវិញទេ។ ទីក្រុងឡុងដ៍ចង់បង្ហាញថា ខ្លួនមានសមត្ថភាពរៀបចំកីឡាអូឡាំពិក បានដោយល្អបំផុត ជាពិសេស នៅក្នុងកាលៈទេសៈដែលសេដ្ឋកិច្ចរបស់អង់គ្លេសក៏មិនសូវល្អផង។ រូបភាព ទីក្រុងឡុងដ៍ ដែលមានសមត្ថភាពរៀបចំសណ្តាប់ធ្នាប់ ការពារសន្តិសុខអាចបង្ហាញថា ទីក្រុងឡុងដ៍មានសក្តានុពលដើម្បីទទួលក្រុមវិនិយោគ។ នេះហើយជាគោលដៅយុទ្ធសាស្រ្តរបស់រដ្ឋាភិបាលអង់គ្លេស។
|
ទាហានជាង មួយម៉ឺននាក់នឹងត្រូវរក្សាសន្តិសុខ
បេក្ខជនប្រធានាធិបតីអាមេរិក លោកMitt Rumney បានលើកឡើងពីការសង្ស័យទៅលើសមត្ថភាពរៀបចំរបស់ប្រទេសអង់គ្លេស។ កាលពេលថ្មីៗនេះ អង់គ្លេសមានបញ្ហាចោទពីរឿងខ្វះអ្នករក្សាសន្តិសុខ។ ក្រុមហ៊ុនឯកជនG4Sដែលជាក្រុមហ៊ុនសន្តិសុខធំជាងគេក្នុងពិភពលោក និងដែលបានទទួលកិច្ចសន្យាពីរដ្ឋាភិបាលដើម្បីធានាសន្តិសុខ នៅក្នុងការប្រកួតកីឡាអូឡាំពិក បានទទួលស្គាល់ កាលពីដើមខែកក្កដានេះថា ខ្លួនអាចផ្តល់បុគ្គលិករក្សាសន្តិសុខតែជាង៤ពាន់នាក់ គឺតិចជាងចំនួនដែលក្រុមហ៊ុនបានសន្យា ជាមួយរដ្ឋាភិបាល ដែលមានប្រមាណជាង មួយម៉ឺននាក់។ ក្នុងស្ថានភាពប្រថុចញ៉ុចបែបនេះ រដ្ឋាភិបាលបានសម្រេចប្រើទាហានជាងម៉ឺននាក់ ដើម្បីរក្សាសន្តិសុខ នៅកន្លែងប្រកួតដែលមានប្រមាណ ១៥០កន្លែង។
សម្រាប់ថ្ងៃប្រកួតធំ ដែលមានមនុស្សចូលទស្សនាច្រើន រដ្ឋាភិបាលគ្រោងនឹងប្រើប៉ូលិសជាងមួយម៉ឺននាក់ និងមន្រ្តីរាជការផ្សេងទៀត ដើម្បីទៅជួយបន្ថែមពីលើកម្លាំងទាហាន និងកងរក្សាសន្តិសុខឯកជនដែលមានជាង ពីរម៉ឺននាក់រួចហើយ។
ក្រសួងការពារជាតិអង់គ្លេសបានបញ្ជាក់ថា គេបានបោះទីតាំងមីស៊ីលនៅជិតស្តាត។ ចំណែកនាវាផ្ទុកឧទ្ធម្ភាគចក្រ នឹងចតនៅក្នុងទឹកទន្លេ ទីក្រុងឡុងដ៍ នៅពេលដែលនាវាចម្បាំងមួយគ្រឿងផ្សេងទៀតនឹងបោះទីតាំងនៅភាគនិរតីអង់គ្លេស ដើម្បីការពារ ក្រែងមានឧប្បត្តិហេតុ កើតមាននៅក្នុងការប្រកួត ផ្នែកទូកប្រណាំង។ នៅក្នុងការប្រកួតកីឡាអូឡាំពិកលើកនេះ អង់គ្លេសបានប្រើទាហានរបស់ខ្លួន ដល់ទៅ ១៣ ៥០០នាក់ គឺច្រើនជាងចំនួនទ័ពអង់គ្លេស នៅក្នុងប្រទេសអាហ្វហ្កានីស្ថានទៅទៀត។
សន្តិសុខក្នុងការប្រកួតកីឡាអូឡាំពិក គឺជារឿងអាទិភាពរបស់រដ្ឋាភិបាលអង់គ្លេស។
នាយករដ្ឋមន្រ្តីលោកDavid Cameroun បាននិយាយថា លោកគ្រប់គ្រងកាន់កិច្ចការសន្តិសុខដោយដៃរបស់លោកផ្ទាល់ ពីព្រោះថា មនុស្សច្រើនលាននាក់ត្រូវគេរំពឹងថា នឹងធ្វើដំណើរទៅទស្សនាការប្រកួតកីឡាអូឡាំពិក នៅទីក្រុងឡុងដ៍។ ម្យ៉ាងទៀត ទីក្រុងឡុងដ៍ឧស្សាហ៍ទទួលបានការគំរាមកំហែងធ្វើភេរវកម្ម ញឹកញាប់ណាស់។ កាលពី ២០០៥ គឺនៅក្រោយថ្ងៃ គណៈកម្មាធិការអូឡាំពិកបានបោះឆ្នោតជ្រើសរើសទីក្រុងឡុងដ៍ឲ្យទទួលរៀបចំកីឡាអូឡាំពិក អំពើភេរវកម្មបានផ្ទុះកណ្តាលទីក្រុងដែលបានសម្លាប់មនុស្ស៥២នាក់។
ប្រភពសុំមិនបញ្ចេញឈ្មោះខ្លះ បាននិយាយថា អាមេរិក អ៊ីស្រាអែលវិញ បានបញ្ជូនភ្នាក់ងារសម្ងាត់ និងក្រុមការពារពូកែៗទៅការពារក្រុមកីឡាករ និងគណៈប្រតិភូរបស់ខ្លួន នៅក្នុងទីក្រុងឡុងដ៍។ គួរដឹងថា រហូតមកដល់ពេលនេះ អ៊ីស្រាអែលនៅតែរំលឹកមិនឈប់ ថ្ងៃភេរវកម្មឆ្នាំ ១៩៧២ ដែលកាលណោះកីឡាករ និងគ្រូបង្វឹកអ៊ីស្រាអែល ១១នាក់ត្រូវពួកចលនាប៉ាឡេស្ទីនចាប់ជំរិត និងបាញ់សម្លាប់ នៅក្នុងឱកាសប្រកួតកីឡាអូឡាំពិក ក្នុងទីក្រុងMunich ប្រទេសអាល្លឺម៉ង់៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ