ប្រជាសហគមន៍រងការប៉ះពាល់ពីការអភិវឌ្ឍផ្លូវដែកតវ៉ាដោយគ្មានលទ្ធផល
ប្រជាពលរដ្ឋដែលរងការប៉ះពាល់ពីការអភិវឌ្ឍផ្លូវដែក ក្រោមជំនួយពីធនាគារអភិវឌ្ឃន៍អាស៊ី(ADB) បានតវ៉ានៅពីមុខទីស្នាក់ការរបស់ធនាគារនេះដើម្បីសុំឲ្យមានការបញ្ជាក់ឲ្យបានច្បាស់លាស់ពីគម្រោងអភិវឌ្ឍន៍ផ្លូវរថភ្លើងដែលពួកគេទទួលរងគ្រោះ។ ខាងភាគីធនាគារ ADB បានអញ្ជើញតំណាងអ្នកភូមិ៤នាក់ឲ្យចូលជួបពិភាក្សាអំពីបញ្ហាដែលអ្នកភូមិបានលើកឡើង។ ប៉ុន្តែ ការតវ៉ាដែលមានការចូលរួមពីសហគមន៍ចំនួន១៥ នៅព្រឹកថ្ងៃចន្ទនេះ មិនទទួលបានលទ្ធផលអ្វីនោះទេ។
ចុះផ្សាយនៅថ្ងៃ៖
ស្តាប់ - ០១:៥០
ដោយមានការតវ៉ាពីអ្នករងការប៉ះពាល់ក្នុងគម្រោងអភិវឌ្ឍន៍ផ្លូវដែកប្រមាណ២០០នាក់នៅពីមុខទីស្នាក់ការរបស់ខ្លួន ធនាគារអភិវឌ្ឍន៍អាស៊ី(ADB) បានអញ្ជើញតំណាងប្រជាពលរដ្ឋបួននាក់ មកពីសហគមន៍ផ្សេងគ្នាឲ្យចូលជួបដើម្បីពិភាក្សាពីអ្វីដែលពួកគេចង់បាន។ អ្នកស្រី នី សន្តោស បានឲ្យដឹងបន្ទាប់ពីជំនួបនោះថា កន្លងមកខាងសហគមន៍បានលេចលឺព័ត៌មានចចាមអារាមជាច្រើនជុំវិញការអភិវឌ្ឍផ្លូវដែកដែលហួសពីគម្រោងរបស់ ADB។
អ្វីដែលសហគមន៍ពលរដ្ឋនៅតាមបណ្តោយផ្លូវរថភ្លើងមិនអស់ចិត្តគឺដោយសារពួកគេបានលឺពីដំបូងថា គម្រោងនេះប៉ះពាល់ដីចម្ងាយពីអ័ក្សផ្លូវរថភ្លើងប្រវែង ៣.៥ម តែក្រោយមកមានព័ត៌មានថា ដីដែលប៉ះពាល់នោះមានប្រវែងលើសពីនេះទៅទៀត។ ដោយយល់ថា ក្នុងឋានៈជាម្ចាស់ជំនួយ ភាគីធនាគារ ADB អាចមានព័ត៌មានលម្អិតអំពីគម្រោងអភិវឌ្ឍន៍ផ្លួវដែកនៅកម្ពុជានោះ ទើបប្រជាសហគមន៍នៅតែទទូចចង់ទទួលបានព័ត៌មានអំពីគម្រោងលំអិតនោះពីធនាគារអភិវឌ្ឍន៍អាស៊ី។
ទោះជាយ៉ាងនេះក្តី ជំនួបរវាងប្រជាសហគមន៍និងតំណាង ADB នៅព្រឹកថ្ងៃចន្ទនេះ មិនទទួលបានលទ្ធផលអ្វីនោះទេដោយសារគ្មានវត្តមានរបស់តំណាងរដ្ឋាភិបាល។ ភាគីទាំងពីរបានសម្រេចឲ្យមានការប្រជុំលើកក្រោយដោយមានការចូលរួមពីអន្តរក្រសួង។ ភាគីធនាគារ ADB បានបញ្ជាក់ថា ផលប៉ះពាល់ចម្ងាយពីអ័ក្សផ្លូវរថភ្លើងប្រវែង ៣.៥ម ដែលជាគំរោងរបស់ខ្លួននោះបានដោះស្រាយរួចរាល់ហើយ។ ដូច្នេះ គម្រោងក្រៅពីនេះគឺជាសមត្ថកិច្ចរបស់អន្តក្រសួង។ ចំណែកឯភាគីធនាគារនឹងធ្វើជាអ្នកសម្របសម្រួលក្នុងការចរចាគ្នានាពេលខាងមុខនេះ។
គួរបញ្ជាក់ថានេះ គឺជាការតវាលើកទី៤ហើយរបស់សហគមន៍ដែលរងការប៉ះពាល់ពីការអភិវឌ្ឍផ្លួវរថភ្លើង។ នេះបើតាមការលើកឡើងរបស់ប្រជាសហគមន៍។ ប៉ុន្តែ ពួកគេនៅតែមិនទាន់ទទួលបានចម្លើយច្បាស់លាស់ពីអាជ្ញាធរនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ