រឿងបក្សពួកនិយម៖ លិខិតលោកសុន ឆ័យបានចូលដល់ដៃអគ្គលេខាធិការដ្ឋានសភា
លោកសុន ឆ័យអនុប្រធានគណៈកម្មការហិរញ្ញវត្ថុសភា កាលពីថ្ងៃម្សិលមិញបានលាតត្រដាងអំពីអំពើបក្សពួកនិយមខ្សែសាឡាយក្នុងរដ្ឋសភាជាតិ។ ជាលិខិតផ្ញើជូនទៅអគ្គលេខារដ្ឋសភា និងចោទត្រង់ៗតែម្តងទៅលើលោក មិត្តការ៉េនថាបានប្រើប្រាស់ឥទ្ធិពលតែងតាំងបក្សពួកក្រុមគ្រួសារឱ្យកាន់តំណែងទាក់ទងនឹងបញ្ហាថវិការរដ្ឋសភា។ ប៉ុន្តែលោក មិត្តការ៉េន បានច្រានចោលការចោទប្រកាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
លិខិតទាមទារការស៊ើបអង្កេតរឿងបក្សពួកនិយមនៃគ្រួសាររបស់អគ្គលេខាធិការរងរដ្ឋសភាលោកមិត្ត ការ៉េន បានទៅដល់ដៃអគ្គលេខាធិការនៃរដ្ឋសភាជាតិហើយ។ តាមរយៈផ្ញើរជូនលោកឡេង ប៉េងឡុង អគ្គលេខាធិការរដ្ឋសភាកាលពីថ្ងៃទី២១តុលា លោកសុន ឆ័យ អនុប្រធានគណៈកម្មការហិរញ្ញវត្ថុរបស់រដ្ឋសភាកូតាគណបក្សសង្គ្រោះជាតិ បានលើកឡើងថាលោក មិត្តការរ៉េនគឺប្រើប្រាស់អំណាចផ្ទាល់ខ្លួនតែងតាំងគ្រួសារខ្លួនឯងចូលកាន់តំណែងក្នុងសភាជាច្រើននាក់។
គ្រួសារដែលលោកសុន ឆ័យបានលើកឡើងថាយ៉ាងហោចណាស់ក៏មាន៧រូបដែរ ដែលសុទ្ធសឹងតែជាកូនបង្កើត កូនប្រសារ ប្អូនបង្កើត ប្អូនថ្លៃ និងក្មូយជាដើមហើយអ្នកទាំងនេះ ជាអ្នកកាន់កាប់អគ្គនាយកដ្ឋានរដ្ឋបាល និងហិរញ្ញវត្ថុសភា នាយកដ្ឋានសវនកម្មផ្ទៃក្នុងសភា និងជាអ្នកកាន់កាប់ការប្រាក់បៀវត្សតំណាងរាស្ត្រក្នុងសភាជាដើម។
ប៉ុន្តែការចោទប្រកាន់នេះត្រូវបានលោកមិត្តការ៉េនផ្ទាល់ទាត់ចោទ ហើយថាជាការចោទប្រកាន់គ្មានមូលដ្ឋានពិតប្រាកដនោះទេ។ លោកមិត្តការ៉េន៖ “ការចោទប្រកាន់នេះអត់ត្រឹមត្រូវនោះទេ ព្រោះថាការតែងតាំងមន្ត្រីរាជការនៅទីនេះគឺមានការវាយតំលៃ ហើយមិនមែនជាបក្សពួកនិយមនិងគ្រួសារអីនោះទេ។ ហើយអ្នកទាំងនោះ គឺត្រូវបានតែងតាំងតាំងពីសម័យសម្តេចក្រុមព្រះមក។ ចឹងរឿងនេះមិនដឹងថាគេយល់យ៉ាងម៉េចដែរ ហើយឯកសារដែលដាក់មកនេះសុទ្ធតែមិនពិត។
យ៉ាងណាក៏ដោយ លិខិតដែលមានចម្លងជូនប្រធានរដ្ឋសភា អនុប្រធាន និងគណៈកម្មការទាំង៩នោះ បានហៅការតែងតាំងនៃគ្រួសារអគ្គលេខាធិការរងនេះថា អាចនាំឱ្យបាត់បង់ថវិការដ្ឋសភាជាច្រើន និងអាចជាអំពើពុករលួយមានលក្ខណៈជាប្រព័ន្ធទ្រង់ទ្រាយធំ។ ដូចនេះលោកសុន ឆ័យបានស្នើឱ្យរដ្ឋសភាបើកការស៊ើបអង្កេតឯករាជ្យមួយដើម្បីចាត់វិធានការបញ្ឈប់ជាបន្ទាន់ និងស្នើឱ្យចាត់វិធានការតាមផ្លូវច្បាប់លើករណីបក្សពួកនិយមរបស់គ្រួសារលោកមិត្តការ៉េននេះផងដែរ។
អគ្គលេខាធិការរដ្ឋសភា លោកឡេងប៉េងឡុង មិនអាចទំនាក់ទំនងដើម្បីឆ្លើយបំភ្លឺចំពោះលិខិតរបស់លោកសុន ឆ័យស្តីពីបញ្ហាបក្សពួកនិយមក្នុងសភាបាននោះទេ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ