ពលរដ្ឋរុស្ស៊ីនៅគ្រីមេទឹកដីថ្មីរុស្ស៊ីពិបាកទទួលទិដ្ឋាការចូលសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៤:៣១
មូលហេតុមកពីសហភាពអឺរ៉ុប មិនទទួលស្គាល់គ្រីមេជាដែនដីឧបសម្ព័ន្ធរបស់ រុស្ស៊ីហើយបន្តចាត់ទុកគ្រីមេ ជាដែនដីអ៊ុយក្រែនដដែល។ ដើម្បីទទួលទិដ្ឋាការចូលបណ្តា ប្រទេស សមាជិកសហភាពអឺរ៉ុប អ្នកស្រុកដែលរស់នៅគ្រីមេ ត្រូវទៅដាក់ពាក្យសុំ គឺនៅតាម ស្ថានកុងស៊ុលនៃប្រទេសទាំងនោះដែលស្ថិតនៅក្រុងគៀវ រដ្ឋធានីអ៊ុយក្រែន។
ជាការកត់សម្គាល់ការដាក់ពាក្យនេះមិនមែនមានន័យថា ពិតជានឹងទទួលបានទិដ្ឋាការ ដូចបំណងឡើយ។ ម៉្លោះហើយបានជាតាំងពីឥឡូវទៅហើយ ក្នុងសភាឌូម៉ារុស្ស៊ី មានបន្លឺឡើង នូវមតិដែលថាពលរដ្ឋថ្មីនៃសហព័ន្ធរុស្ស៊ី ដែលរស់នៅគ្រីមេ មិនចាំបាច់ធ្វើដំណើរ តែទៅកាន់ប្រទេសខាងលិចឡើយដ្បិតមានមិនខ្វះទេប្រទេសផ្សេងទៀតសម្រាប់ធ្វើដំណើរទៅ។
មតិនេះបន្លឺឡើងក្រោយពីអ្នកនាំពាក្យផ្លូវការនៃស្ថានតំណាងរបស់សហភាពអឺរ៉ុប ប្រចាំនៅ រុស្ស៊ីលោក Soren Liborius បានប្រកាសថាស្ថានកុងស៊ុល រាល់តែប្រទេសសហភាពនេះ ដែលស្ថិតក្នុងប្រទេសរុស្ស៊ីមិនទទួលឡើយពាក្យសុំទិដ្ឋាការពីអ្នកស្រុកគ្រីមេ ពីព្រោះ គោលជំហររបស់សហភាពអឺរ៉ុបចំពោះគ្រីមេស្ថិតនៅឥតប្រែប្រួលទេ ៖ គ្រីមេជាដែនដីអ៊ុយក្រែនដូច្នេះបើគេចង់បានទិដ្ឋាការចូលសហភាពអឺរ៉ុបគេត្រូវធ្វើដំណើរទៅសុំ នៅឯស្ថានកុងស៊ុលទាំងនោះនៅលើដែនដីអ៊ុយក្រែនដែលភាគច្រើនស្ថិតនៅក្នុងក្រុងគៀវ។ ឧទាហរណ៍ស្ថានកុងស៊ុលប៉ូឡូញស្ថិតនៅឯក្រុងផែ Odessa របស់អ៊ុយក្រែន។
តាមតួលេខស្ថាប័នអន្តោប្រវេសន៍រុស្ស៊ីពីក្នុងចំណោមអ្នកស្រុក២លាននាក់នៅគ្រីមេ មាន ១លាន៨សែននាក់ បានទទួលអត្តសញ្ញាណបណ្ណជាពលរដ្ឋសហព័ន្ធរុស្ស៊ី។ នៅរុស្ស៊ គេហៅ បណ្ណសម្គាល់ខ្លួននេះ ថាជា passeport ក្នុងប្រទេសដែលមាន១៩ទំព័រ។ ក្នុងការអនុវត្តន៍ វា ជាក្រដាសស្នាមសំខាន់ណាស់សម្រាប់ពលរដ្ឋ ដ្បិតវា វ៉ៃទៅដោយត្រា ស្តីអំពីអាស័យដ្ឋាន លំនៅរបស់សាមីជនស្តីអំពីអាពាហ៍ពិពាហ៍ ស្តីអំពីការលែងលះគ្នា ស្តីអំពីការបរិច្ចាគកិច្ច យោធា ជាកាតព្វកិច្ចចែងក្នុងរដ្ឋធម្មនុញ្ញ។ល។ យ៉ាងណាមិញ ដើម្បីបើកលុយនៅធនាគារ លុះណាតែមាន passeport ក្នុងប្រទេសទើបបើកបាន។
ប៉ុន្តែដើម្បីធ្វើដំណើរទៅបរទេស ពលរដ្ឋត្រូវមានលិខិតឆ្លងដែនហៅថា passeport ក្រៅប្រទេសដែលមាន ៣៨ទំព័រ។ ពិតជា passeport នេះឯងដែលកាលពីចុងខែមុន សាខារបស់ស្ថាប័នអន្តោប្រវេសន៍រុស្ស៊ីប្រចាំនៅក្រុង Simferopol ធានីគ្រីមេ បានចាប់ផ្តើមចេញឲ្យអ្នកស្រុកគ្រីមេ ប៉ុន្តែលុះណាតែសាមីជន មាននៅក្នុងដៃខ្លួនទៅហើយ គឺ passeport ក្នុងប្រទេស។
ហេតុដូចម្តេច បានជាអ្នកស្រុកគ្រីមេ ដែលមាន passeport ក្រៅប្រទេសជាក្រដាសស្នាម ផ្លូវការរបស់សហព័ន្ធរុស្ស៊ីបែរទៅជាពិបាកទទួលទិដ្ឋាការរបស់ប្រទេសខាងលិច? ពីព្រោះ ពេលបំពេញបែបបទដើម្បីសុំទិដ្ឋាការស្ថានកុងស៊ុលប្រទេសទាំងនោះ តម្រូវឲ្យភ្ជាប់ខានមិនបានទៅនឹងពាក្យសុំគឺបទចម្លងនៃ passeport ក្នុងប្រទេសជាទីដែលមានជ្រងោង ត្រាស្តីអំពីអាស័យដ្ឋានគេហើយអស័យដ្ឋាននោះគឺបង្ហាញថា គេរស់នៅលើទឹកដីគ្រីមេតែម្តង។
គួរនិយាយថាក្នុងចំណោមអ្នកស្រុកដែលរស់នៅគ្រីមេក៏នៅមានដែរ អ្នកដែលបន្តកាន់ passeport ជាពលរដ្ឋអ៊ុយក្រែន ប៉ុន្តែសម្រាប់គេទាំងនោះក៏មានបញ្ហាដែរ ពីព្រោះគេរស់នៅ លើទឹកដីគ្រីមេទឹកដីដែលជាប់ក្នុងបញ្ជីខ្មៅរបស់គណៈកម្មការអឺរ៉ុប ដើម្បីទទួលទិដ្ឋាការ ចូលសហភាពអឺរ៉ុប។
គ្រីមេ ប្រៀបបានជាឆ្អឹងស្លាក់បំពង់ករុស្ស៊ី ធ្វើឲ្យរុស្ស៊ីជាប់ក្នុងទណ្ឌកម្មរ៉ាំរ៉ៃរបស់បស្ចិមលោក ដែលតាមយោបល់ពួកនយោបាយវិទូរុស្ស៊ី គឺមិនងាយលុបទៅវិញឡើយ។ ទោះយ៉ាងណាក្តី ក៏លោកប្រធានាធិបតីពូទីន ចាត់ទុកជា” ការស្តារឡើងវិញនូវយុត្តិធម៌ប្រវត្តិសាស្ត្រ“ការដែលរុស្ស៊ីភ្ជាប់ទឹកដីនេះមកនឹងមាតុប្រទេសរុស្ស៊ីវិញ។ លោកពូទីន បានលើកយកទឡ្ហីករណ៍មកបង្ហាញថាពេលដែលមេដឹកនាំសូវៀត ឈ្មោះ Khroutchev មានឈាមជ័រជាជាតិអ៊ុយក្រែន ស្រាប់ក្នុងឆ្នាំ១៩៥៤ បានផ្តាច់ទឹកដីនេះ ចេញពីរុស្ស៊ី ហើយប្រគល់វាទៅឲ្យអ៊ុយក្រែនគឺមិនបានគោរពតាមច្បាប់សូវៀតឡើយ។ ដ្បិត ការសម្រេចចិត្តនោះឯង ត្រូវបានអនុម័តតែដោយគណៈប្រធានរដ្ឋសភាប៉ុណ្ណោះ មិនមែនដោយសម័យប្រជុំពេញអង្គនៃរដ្ឋសភាឡើយ។
ចំណែកនាយកខុទ្ទកាល័យវិមានក្រេមឡាំងលោក ស៊ែរហ្គៃ អ៊ីវ៉ាណូវ បានថ្លែងថា ៖ ទោះគេ ចាក់យើងកាប់យើងសម្លាប់យើងក្តីក៏យើងមិនប្រគល់ទឹកដីគ្រីមេ ទៅឲ្យអ៊ុយក្រែន វិញឡើយ។
រីឯលោកប្រធានាធិបតីអ៊ុយក្រែន ប៉ូរ៉ូឆេនកូ ក្នុងកម្មវិធីនយោបាយរបស់គាត់ លើកឡើងថា
“ទៅទល់ឆ្នាំ ២០២០ បង្វែរទឹកដីគ្រីមេមកអ៊ុយក្រែនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ