កម្ពុជា -

អត្ថបទចុះផ្សាយនៅថ្ងៃ សុក្រ 21 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 21 កញ្ញា 2012

ប្លង់ដីថ្មីផ្តល់ឲ្យប្រជាពលរដ្ឋលើកដំបូងនៅខេត្តក្រចេះ

លោកនាយករដ្ឋមន្ត្រីហ៊ុនសែន

RFI/Siv Channa

ដោយ លី ម៉េងហួរ

ប្រជាពលរដ្ឋ ៥៦០គ្រួសារនៅក្នុងឃុំស្រែចារ និងឃុំ ២ធ្នូ ស្រុកស្នួល ខេត្តក្រចេះ នៅព្រឹកថ្ងៃសុក្រទី២១ខែកញ្ញានេះ បានទទួលប័ណ្ណកម្មសិទ្ធិដីធ្លី ឬប្លង់រឹង ចំនួន ៨៩០ ក្បាលដីពីលោកនាយករដ្ឋមន្ត្រី។ លោកនាយករដ្ឋមន្ត្រី ហ៊ុន សែននឹងបន្តដំណើរចុះចែកប័ណ្ណកម្មសិទ្ធិដល់ប្រជាជននៅខេត្តបាត់ដំបងនាថ្ងៃទី៣០កញ្ញាហើយទៅបន្តទៅបណ្តាខេត្តមួយចំនួនទៀត។ ប្លង់ដីថ្មីនោះ ត្រូវបានផ្តល់ឲ្យប្រជាជន ក្រោយពីក្រុមយុវជនស្ម័គ្រចិត្តរាប់ពាន់នាក់ ដឹកនាំដោយកូនប្រុសលោកនាយករដ្ឋមន្ត្រី ចុះវាស់វែងដីធ្លី ជូនប្រជាជន ចាប់តាំងពីថ្ងៃទី២៨ ខែមិថុនាឆ្នាំ២០១២។

សេចក្តីរាយការណ៍របស់ លី ម៉េងហូរពីភ្នំពេញ

ស្តាប់ (02:52)

21/09/2012 by លី ម៉េងហួរ

ប័ណ្ណកម្មសិទ្ធិ សម្គាល់ដីធ្លី ៨៩០ ក្បាលដី ដំបូងបង្អស់ ត្រូវបានផ្តល់ឲ្យប្រជាជន ៥៦០ គ្រួសារ ក្នុងឃុំស្រែចារ និងឃុំ២ធ្នូ ស្រុកស្នួល ខេត្តក្រចេះ។ ប្លង់រឹងសម្គាល់កម្មសិទ្ធិដីធ្លីស្របច្បាប់ទាំងនោះ ត្រូវបានលោកនាយករដ្ឋមន្ត្រី ហ៊ុន សែន ចែកជូនប្រជាជន ក្រោយពីក្រុមយុវជនស្ម័គ្រចិត្ត រាប់ពាន់នាក់ ត្រូវបានពង្រាយ ចុះវាស់វាស់ដីធ្លី នៅទូទាំងប្រទេស ចាប់តាំងពីថ្ងៃទី២៨មិថុនា។

លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ការចែកប័ណ្ណកម្មសិទ្ធិដីធ្លី ដល់ប្រជាជន នៅថ្ងៃនេះ គឺជាថ្ងៃគោះជួង នៅឯស្រុកស្នួល ហើយលោកចាប់ផ្តើមការដើរចែកប័ណ្ណកម្មសិទ្ធិ ជាបន្តបន្ទាប់។ នោះគឺនៅថ្ងៃទី៣០កញ្ញា លោកនឹងចែកប័ណ្ណដីធ្លី នៅស្រុកគាស់ក្រឡ ខេត្តបាត់ដំបង និងនៅកន្លែង ដែលវាស់វែងដីធ្លីរួចរាល់ បន្តបន្ទាប់ទៅទៀត។

លោកនាយករដ្ឋមន្ត្រីហ៊ុនសែន បានប្រកាសថា "ដីដែលប្រជាពលរដ្ឋកាន់កាប់មិនទាន់ស្របច្បាប់ គឺរដ្ឋាភិបាលត្រូវធ្វើឲ្យស្របច្បាប់ តាមរយៈការចុះវាស់វែង ធ្វើប្លង់ដីកម្មសិទ្ធិ ដល់ពួកគាត់។

ដី ៣ប្រភេទ ដែលរដ្ឋាភិបាល សម្រេចឲ្យក្រុមយុវជនស្ម័គ្រ វាស់វែង គឺទី១-ដីព្រៃសម្បទានសេដ្ឋកិច្ច ដែលផ្តល់ឲ្យក្រុមហ៊ុន ហើយប៉ះចំដីរបស់ប្រជាពលរដ្ឋ។ ទី២-ដីមានភាពមិនច្បាស់លាស់រវាងប្រជាពលរដ្ឋ និងដីសម្បទានសេដ្ឋកិច្ចរបស់ក្រុមហ៊ុន និងទី៣-ដីរដ្ឋ ដែលប្រជាជនកាន់កាប់។

រីឯដី ២ ប្រភេទ ដែលមិនអាចវាស់វែង ផ្តល់ប័ណ្ណកម្មសិទ្ធិបាននោះ គឺទី១-ដីទំនាស់ រវាងប្រជាពលរដ្ឋ និងប្រជាពលរដ្ឋ ហើយ១ចំណុចទៀត គឺអ្នកទៅកាន់កាប់ទន្ទ្រានដីព្រៃថ្មីៗ ដូចករណីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ គឺលោកនាយករដ្ឋមន្ត្រី បញ្ជាក់ថា រដ្ឋាភិបាល មិនអាចវាស់វែងផ្តល់កម្មសិទ្ធិដល់ប្រជាជនបានឡើយ។

ប័ណ្ណកម្មសិទ្ធិដីធ្លី ឬប្លង់រឹង ដែលផ្តល់ឲ្យប្រជាជន ពេលនេះ ត្រូវបាន លោកនាយករដ្ឋមន្ត្រី បញ្ជាក់ថា មានចំណុចពិសេស ដែលមិនអាចមាននរណា លួចកន្លែងបន្លំបានទេ ព្រោះក្រដាសប័ណ្ណនោះ មានលក្ខណៈពិសេស ដូចក្រដាស់ប្រាក់ ហើយមានលេចចេញរូបព្រះសឹង្ហារ ពណ៌ក្រហម នៅពេលសីតុណ្ហភាពធ្លាក់ដល់ ១៧ អង្សារ ហើយមួយទៀត នៅពេលឆ្លុះពិល គឺឃើញរូបប្រាសាទអង្គរវត្ត នៅកណ្តាលសន្លឹកប័ណ្ណនោះ ថែមទៀតផង។

តាមលោកនាយករដ្ឋមន្ត្រី ឥឡូវនេះ ការបិទផ្សាយបានចំនួន ១៨.១៥១ ក្បាលដីទៅហើយ។ តាមគម្រោង ក្រុមយុវជនស្ម័គ្រចិត្ត ត្រូវចុះវាស់វែង ធ្វើប័ណ្ណកម្មសិទ្ធិ ចែកដីសរុប ទូទាំងប្រទេស ប្រមាណ ១.២០០.០០០ ហិកតា និងមានប្រជាជនប្រមាណ ៣៥០.០០០ គ្រួសារ៕