កម្ពុជា -

អត្ថបទចុះផ្សាយនៅថ្ងៃ ពុធ 05 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 06 កញ្ញា 2012

អ្នកច្បាប់ជួបប្រជុំដើម្បីបង្កើនល្បឿនតុលាការដោះស្រាយសំណុំរឿងកកស្ទះ

សិក្ខាសាលាស្តីពីការលើកកម្ពស់កិច្ចសហការរវាងស្ថាប័នតុលាការ អយ្យការ និងពន្ធនាគារ ក្រោមការឧបត្ថម្ភពីការិយាល័យឧត្តមស្នងការសិទ្ធិមនុស្សប្រចាំនៅកម្ពុជា

ដោយ លី ម៉េងហួរ

ក្រុមអ្នកច្បាប់មកពីក្រសួងយុត្តិធម៌ ស្ថាប័នតុលាការ មន្ត្រីពន្ធនាគារ និងមន្ត្រីអង្គការសហប្រជាជាតិបានជួបប្រជុំគ្នា នៅព្រឹកថ្ងៃទី៥ ខែកញ្ញានេះ ដើម្បីលើកឡើងពីការបង្កើនល្បឿន ធ្វើយ៉ាងណាឲ្យតុលាការដោះស្រាយសំណុំរឿងដែលកកស្ទះ នាំឲ្យមានការឃុំខ្លួនជនជាប់ចោទរយៈពេលយូរ នៅក្នុងពន្ធនាគារ។ កិច្ចប្រជុំរយៈពេល៣ថ្ងៃនោះ ជាផ្នែកមួយសម្រាប់កែលំអរដំណើរការប្រព័ន្ធយុត្តិធម៌ ជាពិសេសគឺកិច្ចសហប្រតិបត្តិការរវាងតុលាការ ព្រះរាជអាជ្ញា និងពន្ធនាគារ។

សេចក្តីរាយការណ៍របស់លី ម៉េងហួរ

ស្តាប់ (03:02)

05/09/2012 by លី ម៉េងហួរ

សិក្ខាសាលាស្តីពីការលើកកម្ពស់កិច្ចសហការរវាងស្ថាប័នតុលាការ អយ្យការ និងពន្ធនាគារ និងកិច្ចការពារសិទ្ធិកុមារក្នុងនីតិវិធីនៅតុលាការ រៀបចំដោយសាលាឧទ្ធរណ៍ ក្រោមការឧបត្ថម្ភពីការិយាល័យឧត្តមស្នងការសិទ្ធិមនុស្សប្រចាំនៅកម្ពុជា និងអង្គការ យូនីសេហ្វ។

សិក្ខាសាលារយៈពេល៣ថ្ងៃ ចាប់ពីថ្ងៃទី៥កញ្ញា នៅទីក្រុងភ្នំពេញ ជាផ្នែកមួយ ដើម្បីកែលំអរដំណើរការប្រព័ន្ធយុត្តិធម៌នៅកម្ពុជា ជាពិសេស គឺបង្កើនកិច្ចសហប្រតិបត្តិការរវាងតុលាការ ព្រះរាជអាជ្ញា និងពន្ធនាគារ។ នោះគឺការរិះរកវិធី ដើម្បីបង្កើនល្បឿននៃការជំនុំជម្រះក្តី ដែលកំពុងតែកកស្ទះ នៅតុលាការ ពិសេសនៅតុលាការសាលាឧទ្ធរណ៍។

ការធ្វើជំរឿននៅតុលាការសាលាឧទ្ធរណ៍ បង្ហាញថា គិតត្រឹមចុងឆ្នាំ២០០៩ មានសំណុំរឿងកកស្ទះ ជិតដល់ ៣.៤០០ សំណុំរឿង ទាំងរឿងរដ្ឋប្បវេណី និងទាំងរឿងក្តីព្រហ្មទណ្ឌ។ ក្នុងនោះ សវនាការរបស់សាលាឧទ្ធរណ៍ ក្នុងល្បឿនដូចសព្វថ្ងៃ គឺការជម្រះសំណុំរឿងកកស្ទះ អាចនឹងប្រើពេលរហូតដល់ទៅ ៩ ឆ្នាំ។
បទបង្ហាញរបស់តំណាងការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស បានលើកឡើងថា គិតត្រឹមខែមិថុនា ឆ្នាំ២០១២ អ្នកជាប់ឃុំឃាំង ដែលរង់ចាំសវនាការលើបណ្តឹងឧទ្ធរណ៍ មានចំនួន ១.៤៣៧ នាក់។

បទបង្ហាញដដែល ក៏បានលើកឡើងថា រយៈពេលនៃការកកស្ទះសំណុំរឿង នៅតុលាការសាលាឧទ្ធរណ៍ ដែលមិនទាន់ទទួលបានការជំនុំជម្រះ មានលើសពី ៥ ឆ្នាំ ទៅ ៧ ឆ្នាំ និងមានរឿងខ្លះ រហូតដល់ ១០ ឆ្នាំ។ លោក James Heenan តំណាងស្តីទី នៃការិយាល័យឧត្តមស្នងការ អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា លើកឡើងថា ការកក់ស្ទះសំណុំរឿង មិនទាន់ជំនុំជម្រះ នាំឲ្យមានការឃុំឃាំងជនជាប់ចោទយូរក្នុងពន្ធនាគារ ដែលនាំឲ្យប្រទេសកម្ពុជា កំពុងជួបប្រទះវិបត្តិណែនចង្អៀតក្នុងពន្ធនាគារ។ ចំនួនជនជាប់ឃុំ បានកើនឡើងដល់ ១៥.០០០ នាក់ នៅទូទាំងប្រទេស។

ក៏ប៉ុន្តែប្រធានតុលាការសាលាឧទ្ធរណ៍ លោក យូ ប៊ុនឡេង បានឲ្យដឹងថា ការលើកឡើងថា មានការឃុំខ្លួនអ្នកទោសយូរ ហើយសាលាឧទ្ធរណ៍ មិនបានចាត់ការសំណុំរឿង ឲ្យបានលឿន ជាដើមនោះ គឺកើតចេញពីការខ្វះព័ត៌មាន។

លោក យូ ប៊ុនឡេង លើកឡើងថា នៅពេលនេះ តុលាការសាលាឧទ្ធរណ៍ បានបង្កើនល្បឿន ជំនុំជម្រះសំណុំរឿងក្តី ដោយក្នុងមួយឆ្នាំ បានប្រហែលជា ១.៦០០ សំណុំរឿង។ ពីមុនសាលាឧទ្ធរណ៍ជំនុំជម្រះ បានតែពី ៧០០ ទៅ ៨០០ សំណុំរឿងប៉ុណ្ណោះ។ ប្រសិទ្ធិភាពការងារកាត់ក្តីនេះ មកពីឥឡូវ សាលាឧទ្ធរណ៍ បានផ្ទុកឯកសារសំណុំរឿង ក្នុងប្រព័ន្ធទិន្នន័យ Data Base និងបានបង្កើតបន្ទប់សវនាការចំនួន ៣ ដើម្បីជំនុំជម្រះ។
យ៉ាងណាក៏ដោយ លោក យូ ប៊ុនឡេង បានទទួលស្គាល់ថា តុលាការ ក៏មានចំណុចខ្វះខាត ក្នុងការចាត់ការលើសំណុំរឿង ហើយថា មានចំនួនតិចតួចប៉ុណ្ណោះ នៃការឃុំខ្លួនជនជាប់ចោទយូរ នៅពន្ធនាគារ៕