កម្ពុជា -

អត្ថបទចុះផ្សាយនៅថ្ងៃ អាទិត្យ 21 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 21 តុលា 2012

ការគោរពព្រះវិញ្ញាណក្ខន្ធសម្តេចឳកាន់តែមានសភាពធំធេងឡើង

ដោយ ប៉ែន បូណា

ថ្ងៃអាទិត្យនេះ គឺជាថ្ងៃទី៥ហើយនៃការកាន់ទុក្ខចំពោះការសោយទិវង្គតរបស់ព្រះមហាវីរក្សត្រសម្តេចព្រះនរោត្តមសីហនុ។ ការគោរពព្រះវិញ្ញាណក្ខន្ធរបស់ព្រះអង្គមានសភាពគគ្រឹកគគ្រេងយ៉ាងខ្លាំង ទាំងនៅក្នុងព្រះបរមរាជវាំង ទាំងនៅខាងក្រៅ។ កាលពីល្ងាចថ្ងៃសៅរ៍ម្សិលមិញ ព្រះសង្ឃជិត ៧០០០ អង្គដែលនិមន្តមកពីវត្តនានាក្នុងរាជធានីភ្នំពេញបានជួបជុំសូត្រមន្តនៅពីមុខព្រះបរមរាជវាំងដើម្បីឧទ្ទិសកុសលដល់ព្រះវិញ្ញាណក្ខន្ធសម្តេចឳ។ នេះជាពិធីសូត្រធម៌រួមគ្នាដ៏ធំបំផុតមួយចាប់តាំងពីសម្តេចឳបានសោយទិវង្គតកាលពីថ្ងៃទី១៥ តុលាមក។

សេចក្តីរាយការណ៍របស់ ប៉ែន បូណា ពីទីក្រុងភ្នំពេញ

ស្តាប់ (02:50)

21/10/2012 by ប៉ែន បូណា

ពិធីសូត្រមន្តបង្សុកូលដ៏ធំបំផុតមួយត្រូវបានរៀបចំឡើងកាលពីល្ងាចថ្ងៃសៅរ៍ម្សិលមិញនៅពីមុខព្រះបរមារាជវាំងដោយមានព្រះសង្ឃជិត ៧០០០ អង្គចូលរួម។ ពិធីនេះរៀបចំឡើងដោយសម្តេចព្រះសង្ឃរាជទាំងពីរគណៈដើម្បីឧទ្ទិសមហាកុសលដល់ព្រះវិញ្ញាណក្ខន្ធរបស់ព្រះមហាវីរក្សត្រសម្តេចព្រះ នរោត្តម សីហនុ។ ពិធីសាសនាដ៏ធំនេះក៏មានការចូលរួមពីសំណាក់ពុទ្ធបរស័ទចាស់ក្មេងយ៉ាងច្រើនកុះករ ដោយមានទាំងការតាំងសម្មាធិទៀតផង។
នេះជាពិធីសូត្រធម៌ដ៏ធំបំផុតមួយចាប់តាំងពីការសោយទិវង្គតរបស់អង្គសម្តេចឳកាលពីថ្ងៃទី១៥ តុលាមក។ ក្រៅពីនោះ ពិធីសូត្រមន្តបង្សុកូលត្រូវបានធ្វើឡើងនៅគ្រប់ទីវត្តអារាម និងតាមមន្ទីរស្ថាប័នរដ្ឋនានានៅក្នុងឱកាសនៃការកាន់ទុក្ខថ្នាក់ជាតិរយៈពេល៧ថ្ងៃ ចាប់ពីថ្ងៃទី ១៧ ដល់ ២៣ តុលា។ ថ្ងៃអាទិត្យនេះ គឺជាថ្ងៃទី៥ហើយនៃការកាន់មរណទុក្ខសម្រាប់ការយាងចូលទិវង្គតរបស់អតីតព្រះមហាក្សត្រដ៏មានប្រជាប្រិយភាពរបស់ពលរដ្ឋខ្មែរ។

នៅក្នុងព្រះបរមរាជវាំងថ្ងៃនេះ មានមេដឹកនាំបរទេសជាច្រើនចូលគោរពព្រះវិញ្ញាណក្ខន្ធរបស់ព្រះអង្គ។ មេដឹកនាំបរទេសទាំងនោះមាន នាយករដ្ឋមន្ត្រីសិង្ហបុរី លោក លី ស៊ានលុង និងភរិយា ប្រធានសភាហ្វីលីពីន លោក ហ្វេលីស៊ីអាណូ ប៊ែលម៉ុងតេ និងលោក យ៉ាង ហៀង ស៊ើប អនុប្រធានសភាប្រជាជនជាន់ខ្ពស់នៃប្រទេសកូរ៉េខាងត្បូង។ ក្រៅពីនោះ មន្ត្រីរាជការមកពីស្ថាប័ននានានៅតែបន្តចូលគោរពព្រះវិញ្ញាណក្ខន្ធសម្តេចឳជាបន្តបន្ទាប់មិនដាច់។

នៅថ្ងៃចន្ទស្អែកនេះ រដ្ឋមន្ត្រីការបរទេសឥណ្ឌូនេស៊ី លោក ម៉ាកទី ណាតាឡេហ្គាវ៉ា និងអនុប្រធានាធិបតីនៃសហភាពមីយ៉ាន់ម៉ារ លោក សៃ ម៉ូក ខាំ ក៏នឹងមកគោរពព្រះវិញ្ញាណក្ខន្ធព្រះមហាវីរក្សត្រផងដែរ។ នេះបើយោងតាមសេចក្តីជូនដំណឹងរបស់ក្រសួងការបរទេសកម្ពុជា។ នេះនៅមិនទាន់រាប់សារលិខិតរម្លែកទុក្ខដែលផ្ញើមកពីគ្រប់ជ្រុងជ្រោយនៃពិភពលោកផងទេ។ ព្រះបរមសពរបស់អង្គសម្តេចឳត្រូវគេគ្រោងនឹងតម្កល់ក្នុងព្រះបរមរាជវាំងរហូតដល់ទៅ៣ខែដើម្បីឲ្យពលរដ្ឋខ្មែរ និងភ្ញៀវបរទេសចូលគោរពព្រះវិញ្ញាណក្ខន្ធ។

គួរកត់សម្គាល់ថា ការសោយទិវង្គតរបស់អតីតព្រះមហាក្សត្រសម្តេចព្រះ នរោត្តម សីហនុ គឺជាព្រឹត្តិការណ៍ដែលទទួលបានការចូលរួមមរណៈទុក្ខដ៏ធំបំផុតមួយក្នុងប្រវត្តិសាស្ត្រមេដឹកនាំកម្ពុជារយៈពេល៧០ឆ្នាំចុងក្រោយនេះ។ ប្រជាពលរដ្ឋកម្ពុជាទូទាំងប្រទេស រួមទាំងព្រះសង្ឃគ្រប់ទីវត្តអារាមដែលមានសរុបជាង ៥ម៉ឺនអង្គនៅទូទាំងប្រទេស សុទ្ធតែបានសូត្រធម៌ឧទ្ទិសកុសលដល់ព្រះអង្គ។ ពិធីសូត្រមន្តនៅមុខព្រះបរមរាជវាំងកាលពីល្ងាចមិញ គឺជាព្រឹត្តិការណ៍រួមដ៏ធំមួយនៅក្នុងរាជធានីភ្នំពេញ។ សាលារាជធានីភ្នំពេញក៏បានដាក់កម្លាំងការពារសន្តិសុខ និងបោសសម្អាតទីធ្លាមុខព្រះបរមរាជវាំងជាប្រចាំ ដើម្បីឲ្យស័ក្តិសមជាទីគោរពសក្ការៈរបស់ពលរដ្ឋ និងព្រះសង្ឃកម្ពុជា៕