លីបង់ បិទព្រំដែន មិនឲ្យជនភៀសខ្លួនស៊ីរី ចូលតទៅទៀត
ប្រទេសលីបង់ សម្រេចបិទព្រំដែននៅថ្ងៃនេះ មិនអនុញ្ញាតឲ្យជនភៀសខ្លួនស៊ីរី ចូលទៀតទេ។ លោករដ្ឋមន្ត្រីកិច្ចការសង្គមលីបង់ បានសម្រេចយ៉ាងដូច្នេះ គឺបន្ទាប់ពីមានជនភៀសខ្លួនស៊ីរី កាន់តែច្រើនឡើងៗទៅកាន់ទឹកដីលីបង់។ នៅពេលនេះ មានរហូតដល់១លាន២សែននាក់ហើយ។ លីបង់កំពុងប្រឈមនឹងវិបត្តិសេដ្ឋកិច្ចដោយសារជួយជនភៀសខ្លួនស៊ីរី ខណៈដែលប្រទេសដទៃជាច្រើនទៀត ដែលបានសន្យាផ្តល់ជំនួយ តែមិនបានអនុវត្តតាមសម្តីរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៤១
ក្នុងមួយថ្ងៃៗ មានប្រជាជនស៊ីរីជាង៩ពាន់នាក់ បានរត់ចោលផ្ទះសម្បែងដោយសារ គេចចេញពីសង្គ្រាមរបស់សហព័ន្ធអន្តរជាតិប្រឆាំងនឹងអង្គការរដ្ឋអ៊ីស្លាមជីហាត នៅប្រទេសស៊ីរី និងអ៊ីរ៉ាក់។
លីបង់ ជាប្រទេសដែលទទួលជនភៀសខ្លួនស៊ីរីច្រើនជាងគេនៅលើពិភពលោក។ ដង់ស៊ីតេប្រជាជន បានកើតឡើងដល់៥៤០នាក់ ក្នុង១គីឡូម៉ែត្រការ៉េ។ ចំនួនជនភៀសខ្លួននៅពេលនេះ គឺស្មើនឹង១ភាគ៣នៃប្រជាជនសរុប ដែលជាការប្រឈមមុខនឹងបញ្ហា និងជាបន្ទុកដ៏ធ្ងន់របស់រដ្ឋាភិបាលលីបង់។
សាលាធារណៈរបស់រដ្ឋ បានទទួលកូនសិស្សស៊ីរីជាង១០ម៉ឺននាក់ ឲ្យចូលរៀនដោយឥតគិតថ្លៃ និងទទួលទំនុកបម្រុងដូចកូនសិស្សលីបង់ដែរ។ វត្តមានជនភៀសខ្លួនស៊ីរីកាន់ច្រើនឡើងៗ បានធ្វើឲ្យលីបង់ប្រឈមមុខនឹងវិបត្តិសេដ្ឋកិច្ច ព្រោះប្រទេសអន្តរជាតិជាច្រើនទៀត ដែលបានសន្យាថានឹងផ្តល់ជំនួយ តែបែរជាមិនបានអនុវត្តកាតព្វកិច្ចខ្លួនទៅវិញ។
នៅក្នុងនោះ មានប្រទេសបារាំង ដែលបានសន្យាកាលពីខែកក្កដាថា នឹងទទួលជនភៀសខ្លួនស៊ីរី៥០០នាក់។ រហូតមកដល់ពេលនេះ មនុស្ស៥០០នាក់ដែលបានចុះឈ្មោះទាំងនោះ កំពុងរង់ចាំយ៉ាងអន្ទះសានៅក្នុងជំរុំនៃប្រទេសជិតខាងស៊ីរី ដែលស្ថិតក្នុងស្ថានភាពជីវិតយ៉ាងលំបាកវេទនា។ អង្គការ Amnesty International ក៏បានស្នើសុំឲ្យបារាំងអនុវត្តកិច្ចសន្យារបស់ខ្លួនផងដែរ។
តាមរយៈកិច្ចប្រជុំ២សប្តាហ៍ កន្លងទៅនេះ នៅក្រុង Berlin ស្តីពីបញ្ហាជនភៀសខ្លួនស៊ីរី គេសម្គាល់ឃើញថា ប្រទេសភាគច្រើននៅសហភាពអឺរ៉ុប មិនសូវបានសាមគ្គីកៀកស្មាគ្នាជួយជនភៀសខ្លួននោះទេ។ មានជនភៀសខ្លួនស៊ីរីតែ៤ភាគរយប៉ុណ្ណោះ ដែលបានទទួលសិទ្ធស្នាក់នៅជាជនភៀសស្របច្បាប់នៅអឺរ៉ុប។ ក្នុងនោះ ជាងពាក់កណ្តាល បានទៅស្នាក់នៅប្រទេសស៊ុយអែត និងអាល្លឺម៉ង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ