ប្រធានគណបក្សសិទ្ធិមនុស្សលោក កឹម សុខាផ្តើមយុទ្ធនាការ ឆ្ពោះទៅមូលដ្ឋាន
នៅថ្ងៃចន្ទទី១៦មេសានេះ គណបក្សសិទ្ធិមនុស្សរបស់លោក កឹម សុខា បានចាប់ផ្តើមអនុវត្តយុទ្ធសាស្ត្រ "ដំណើរឆ្ពោះទៅមូលដ្ឋាន ដើម្បីសិទ្ធិមនុស្សនិងការផ្លាស់ប្តូរ"។ នោះគឺលោក កឹម សុខា ប្រធានគណបក្សសិទ្ធិមនុស្សនិងជាអ្នកតំណាងរាស្ត្រមណ្ឌលកំពង់ចាម បានចុះជួបសកម្មជន អ្នកគាំទ្រគណបក្សសិទ្ធិមនុស្សនៅតាមបណ្តាខេត្តជុំវិញបឹងទន្លេសាប និងខេត្តមួយចំនួនទៀតចាប់ពីថ្ងៃទី១៦មេសា រហូតដល់ថ្ងៃទី៣០មេសាឆ្នាំ២០១២។ ផ្តើមដំបូងនៅខេត្តកំពង់ឆ្នាំងនៅថ្ងៃចន្ទនេះ លោកកឹមសុខា បានផ្ញើសារនយោបាយទៅកាន់សកម្មជនមូលដ្ឋានឲ្យ "ដូរមេឃុំ ដែលរើសអើងបក្ស និងដាក់មេឃុំដែលបម្រើខ្មែរ។ ដូរមេឃុំ បម្រើថៅកែ ដាក់មេឃុំបម្រើរាស្ត្រ"។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
គណបក្សសិទ្ធិមនុស្ស បានបង្ហាញពីកាលបរិច្ឆេទ នៃដំណើរទៅកាន់មូលដ្ឋានរបស់លោក កឹមសុខា ដោយចាប់ផ្តើមនៅថ្ងៃទី១៦ ខែមេសា ឆ្នាំ២០១២ នៅខេត្តកំពង់ឆ្នាំង និងថ្ងៃបន្តបន្ទាប់នៅខេត្តពោធិ៍សាត់ បាត់ដំបង បន្ទាយមានជ័យ ឧត្តរមានជ័យ សៀមរាប ព្រះវិហារ កំពង់ធំ កំពង់ចាម ព្រៃវែង ស្វាយរៀង រាជធានីភ្នំពេញ និងចុងក្រោយ គឺនៅថ្ងៃទី៣០ ខែមេសា ឆ្នាំ២០១២ នៅខេត្តកណ្តាល។
វត្តមានរបស់ប្រធានគណបក្សសិទ្ធិមនុស្ស លោក កឹមសុខា តាមបណ្តាខេត្តជុំវិញបឹងទន្លេសាប និងខេត្តមួយចំនួនទៀត នៅមុនថ្ងៃបោះឆ្នោតឃុំសង្កាត់ នាពេលនេះ ដើម្បីឲ្យសកម្មជនអ្នកគាំទ្រគណបក្សសិទ្ធិមនុស្ស ត្រៀមខ្លួន ទាញយកការគាំទ្រពីប្រជាពលរដ្ឋម្ចាស់ឆ្នោត និងដើម្បីបង្ហាញមុខថ្នាក់ដឹកនាំមូលដ្ឋាន មុនយុទ្ធនាការឃោសនាបោះឆ្នោត ឃុំសង្កាត់ ដែលនឹងចូលមកដល់នៅថ្ងៃទី១៨ឧសភា។
នៅខេត្តកំពង់ឆ្នាំង នាថ្ងៃផ្តើមយុទ្ធនាការ ថ្ងៃដំបូង នៅថ្ងៃទី១៦មេសា ឆ្នាំ២០១២ លោក កឹម សុខា បានជួបសកម្មជន នៅទីស្នាក់ការគណបក្សសិទ្ធិមនុស្ស នៅទីរួមខេត្ត ចុះទៅជួបតាមស្រុក និងតាមឃុំមួយចំនួន ដែលគណបក្សសិទ្ធិមនុស្ស ត្រៀម ដើម្បីយកឈ្នះ ជាមេឃុំ។
"ដំណើរឆ្ពោះទៅមូលដ្ឋាន ដើម្បីសិទ្ធិមនុស្ស និងការផ្លាស់ប្តូរ" ជាប្រធានបទសំខាន់របស់លោកកឹមសុខា នៅពេលចុះ ទៅកាន់មូលដ្ឋាន នាពេលនេះ។
តាមលោកកឹមសុខា អ្នកដឹកនាំគណបក្សសិទ្ធិមនុស្ស ត្រូវសម្លឹងទៅបញ្ហាមូលដ្ឋាន ពីព្រោះគណបក្សប្រឆាំងមួយនេះ ចង់ប្រាប់ប្រជាពលរដ្ឋថា ការបោះឆ្នោតឃុំសង្កាត់ នៅថ្ងៃទី៣មិថុនា មានសារៈសំខាន់ណាស់។នោះគឺការផ្លាស់ប្តូរថ្នាក់ដឹកនាំនៅមូលដ្ឋានទើបលទ្ធិប្រជាធិបតេយ្យ មានអាយុវែងបាន។
សារនយោបាយរបស់លោកកឹមសុខាសម្រាប់សកម្មជនអ្នកគាំទ្រគណបក្សសិទ្ធិមនុស្ស គឺ "ដូរមេឃុំ ដែលរើសអើងបក្ស ដាក់មេឃុំបម្រើខ្មែរ ដូរមេឃុំបម្រើថៅកែ ដាក់មេឃុំបម្រើរាស្ត្រ"។ ដូច្នេះឆ្នាំ២០១២នេះ ដល់ពេលវេលា ដែលត្រូវផ្លាស់ប្តូរមូលដ្ឋានគ្រឹះនៃលទ្ធិប្រជាធិបតេយ្យ តាមរយៈការដូរមេឃុំ។
ក្នុងដំណើរទៅកាន់ខេត្តកំពង់ឆ្នាំងនៅថ្ងៃទី១៦មេសា ឆ្នាំ២០១២ លោក កឹម សុខា មិនត្រូវបានគេរារាំង ឬរំខានការជួបជុំជាមួយសកម្មជនឡើយ។ គណបក្សសិទ្ធិមនុស្សរបស់លោក កឹមសុខា ស្ថិតក្នុងចំណោមគណបក្សនយោបាយ ចំនួន ១០ ដែលបានចុះឈ្មោះ ចូលរួមប្រកួតប្រជែងក្នុងការបោះឆ្នោតឃុំសង្កាត់ នៅថ្ងៃទី៣មិថុនា ឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ