កម្ពុជា -

អត្ថបទចុះផ្សាយនៅថ្ងៃ ចន្ទ 20 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 20 សីហា 2012

តុលាការសាលាឧទ្ធរណ៍ បើកសវនាការលោក ម៉ឹកដារ៉ា

ដោយ លី ម៉េងហួរ

នៅព្រឹកថ្ងៃពុធនេះ តុលាការសាលាឧទ្ធរណ៍ បានបើកសវនាការលើករណីរបស់លោក ម៉ឹក ដារ៉ា អតីតឧត្តមសេនីយ៍ ដែលជាប់ចោទក្នុងរឿងពុករលួយ និងជួញដូរគ្រឿងញៀន។ លោក ម៉ឹក ដារ៉ា ត្រូវបានតុលាការខេត្តបន្ទាយមានជ័យ កាលពីដើមឆ្នាំនេះ ផ្តន្ទាទោស ដាក់ពន្ធនាគារអស់មួយជីវិត ជាមួយនឹងបក្ខពួក ២ នាក់ផ្សេងទៀត។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (02:01)

20/08/2012 by លី ម៉េងហួរ

ក្នុងសវនាការ នៅតុលាការសាលាឧទ្ធរណ៍ នៅទីក្រុងភ្នំពេញ នៅព្រឹកមិញ លោក ម៉ឹក ដារ៉ា និងលោក ជាឡេង បានបង្ហាញខ្លួន ក្នុងអង្គសវនាការ និងបានបដិសេធចំពោះរាល់ការចោទប្រកាន់។ ក្នុងសវនាការចៅក្រម បានប្រកាសថា លោក ម៉ឹកដារ៉ា និងកូនចៅរបស់លោកពីរនាក់ទៀត គឺលោកជាឡេង និងលោក ម៉ន ឌឿន ជាអ្នកផ្តើមផ្សំគំនិត និងប្រព្រឹត្តទទួលសំណូកដោយចេតនា យកមុខនាទី និងកន្លែងធ្វើការ នៅមន្ទីរប្រឆាំងគ្រឿងញៀន របស់ប៉ូលិសក្រសួងមហាផ្ទៃ ធ្វើជាកន្លែងជួញដូរគ្រឿងញៀនខុសច្បាប់។ សវនាការនៅសាលាឧទ្ធរណ៍ លើករណីលោក ម៉ឹក ដារ៉ា នឹងត្រូវបន្ត ធ្វើនៅព្រឹកថ្ងៃអង្គារ ទី២១ ខែសីហា
ឆ្នាំ២០១២។

តុលាការខេត្តបន្ទាយមានជ័យ កាលពីថ្ងៃទី៥មករា ឆ្នាំ២០១២ បានសម្រេចផ្តន្ទាទោសដាក់ពន្ធនាគារលោក ម៉ឹក ដារ៉ា អតីតឧត្តមសេនីយ៍ឯក និងជាអតីតប្រធានមន្ទីរប្រឆាំងគ្រឿងញៀន ព្រមទាំងជាអតីតអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿង ញៀន ដាក់ពន្ធនាគារមួយជីវិត និងរឹបអូសដីធ្លី ព្រមទាំងរឹបអូសប្រាក់ជាច្រើនទៀត។ ចំណែកលោក ជា ឡេង ដែលជាមន្ត្រីប៉ូលិសក្រោមឱវាទរបស់លោក ម៉ឹក ដារ៉ា ក៏ត្រូវបានតុលាការខេត្តបន្ទាយមានជ័យ ផ្តន្ទាទោសដាក់ពន្ធនាគារអស់មួយជីវិត។ រីឯប៉ូលិសម្នាក់ទៀត ឈ្មោះ ម៉ន ឌឿន ដែលកំពុងគេចខ្លួន ត្រូវផ្តន្ទាទោសដាក់ពន្ធនាគារ ២៥ ឆ្នាំ។ ការផ្តន្ទាទោសនោះ ធ្វើឡើង ក្រោយពីបើកសវនាការអស់រយៈពេល ១២ ថ្ងៃ កាលពីចុងឆ្នាំ២០១១។

អតីតប្រធានមន្ទីរប្រឆាំងគ្រឿង លោកឧត្តមសេនីយ៍ឯក ម៉ឹក ដារ៉ា អតីតអគ្គលេខាធិការអាជ្ញាធរជាតិប្រឆាំងគ្រឿងញៀន ព្រមទាំងកូនចៅ លោកជាឡេង ត្រូវបានចាប់ខ្លួន កាលពីថ្ងៃទី១២ ខែមករា ឆ្នាំ២០១១ ជាប់ពាក់ព័ន្ធករណីអំពើពុករលួយស៊ីសំណូក និងបទជួញដូរគ្រឿងញៀន ដែលមានការចាត់តាំង៕