ចិន-វៀតណាម -

អត្ថបទចុះផ្សាយនៅថ្ងៃ ពុធ 25 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 25 កក្កដា 2012

គម្រោងការប៉េកាំងនៅ Paracels បាននាំឲ្យកើតមានការប្រឆាំងយ៉ាងខ្លាំងក្លានៅក្នុងតំបន់

បាតុករសម្តែងការប្រឆាំងនៅមុខស្ថានទូតចិននៅទីក្រុងហាណូយ

REUTERS/Nguyen Lan Thang

ដោយ សៀក សារិន

ភាពតានតឹងបានកើនឡើងមួយកម្រិតនៅសមុទ្រចិនខាងត្បូង ក្រោយពីមានគម្រោងការរបស់ទីក្រុងប៉េកាំង ដាក់មូលដ្ឋានយោធានៅលើទីប្រជុំកោះ Paracels ដែលជាទីកន្លែងឈ្លោះដណ្តើមគ្នារវាងប្រទេសមួយចំនួនក្នុងតំបន់អាស៊ីអាគ្នេយ៍។ គម្រោងការប៉េកាំងនៅទីប្រជុំកោះ Paracels នេះ បានធ្វើឲ្យប្រទេសវៀតណាមនិងប្រទេសហ្វីលីពីនខឹងក្រេវក្រោធយ៉ាងខ្លាំង។

សេចក្តីរាយការណ៍របស់សៀក សារិន

ស្តាប់ (01:55)

25/07/2012 by សៀក សារិន

សេចក្តីសម្រេចចិត្តរបស់ប្រទេសចិនដែលគ្រោងដាក់មូលដ្ឋានទ័ពនៅទីប្រជុំកោះ Paracels នេះ បានទទួលរងការថ្កោលទោសយ៉ាងខ្លាំងក្លាពីសំណាក់ប្រទេសវៀតណាម។ ឯកអគ្គរដ្ឋទូតចិនប្រចាំទីក្រុងម៉ានីលវិញ បានត្រូវកោះហៅដោយអាជ្ញាធរហ្វីលីពីន ដើម្បីសម្តែងបង្ហាញឲ្យឃើញនូវការប្រឆាំងដាច់ណាត់របស់គេ។ ការទិតៀនប្រឆាំងមានកាន់តែច្រើនឡើងៗនៅក្នុងបណ្តាប្រទេសអាស៊ីអាគ្នេយ៍ ប្រឆាំងទល់នឹងការដំឡើងបង្ហាញសាច់ដុំរបស់ទីក្រុងប៉េកាំង។

សេចក្តីសម្រេចចិត្តរបស់ប្រទេសចិនក្នុងការដាក់មូលដ្ឋានយោធានៅសានស្ហាឬទីប្រជុំកោះប៉ារ៉ាសែលដែលឋិតនៅប៉ែកខាងជើងនៃសុមុទ្រចិនខាងត្បូង បានបណ្តាលឲ្យកើតមានកំហឹងក្រេវក្រោធយ៉ាងខ្លាំងពីសំណាក់ទីក្រុងហាណូយ ដែលទាមទារចង់បានមួយចំណែកនៃទីប្រជុំកោះទាំងនោះ។ សម្រាប់ប្រទេសវៀតណាម ទង្វើរបស់ប្រទេសចិនគឺជាការរំលោភទៅលើច្បាប់អន្តរជាតិ ដែលធ្វើឲ្យប៉ះពាល់ដល់អធិបតេយ្យរបស់វៀតណាម។

រីឯប្រទេសហ្វីលីពីនវិញបានបរិហារពីគម្រោងការរបស់ទីក្រុងប៉េកាំង ហើយបារម្ភពីផលវិបាកដែលអាចកើតមាននៅក្នុងតំបន់មួយដ៏ “យុទ្ធសាស្ត្រ” ដែលគេសង្កេតឃើញឧប្បត្តិហេតុកើតមានកាន់តែច្រើនឡើងៗនារយៈពេលប៉ុន្មានខែចុងក្រោយនេះ មានដូចជា ការមកដល់កាលពីសប្តាហ៍មុននៃនាវានេសាទចិនមួយក្រុមដែលបានមកដល់ជិតទីប្រជុំកោះ Spratleys ដែលឋិតនៅប៉ែកខាងត្បូងនៃទីប្រជុំកោះប៉ារ៉ាសែល ហើយដែលដណ្តើមចង់បានដោយទីក្រុងម៉ានីល។ គួរបញ្ជាក់ថា ទីប្រជុំកោះ Spratleysនេះឋិតនៅប្រមាណ១២០ miles nautiques ពីជ្រាំងសមុទ្រហ្វីលីពីន។

ចំណែកឯតៃវ៉ាន់វិញ បានប្រកាសឲ្យដឹងថា នៅខែក្រោយ គេនឹងដឹកយកទៅដាក់នៅលើ ទីប្រជុំកោះ Spratleys នូវកាំភ្លើងធំនិងកាំភ្លើងត្បាល ដែលនៅទីនោះ តៃវ៉ាន់មានទាហានប្រមាណ១៣០នាក់រួចស្រេចទៅហើយ។

គួរបញ្ជាក់ថា ទីក្រុងប៉េកាំងបានតាំងខ្លួនជាម្ចាស់ដែនសមុទ្រនៃសមុទ្រចិនខាងត្បូង ក៏ប៉ុន្តែ ការប្រកាសដំឡើងបង្ហាញសាចដុំបែបនេះ គឺពិតជាជួយរុញច្រានឲ្យប្រទេសមួយចំនួននៅអាស៊ីអាគ្នេយ៍ធ្លាក់ទៅក្នុងដៃរបស់សហរដ្ឋអាមេរិកជាពុំខាន៕