ទស្សនកិច្ចនៅក្រៅប្រទេសលើកទីមួយរបស់លោកស្រីអ៊ុងសានស៊ូជី
ចុះផ្សាយនៅថ្ងៃ៖
ស្តាប់ - ០៤:៣១
លោកស្រីអ៊ុងសានស៊ូជីដែលជាអ្នកតំណាងរាស្ត្រនិងជាប្រមុខបក្សប្រឆាំងភូមានឹងអញ្ជើញទៅទីក្រុងបាងកកនៅសប្តាហ៍ក្រោយ។ នេះជាដំណើរទស្សនកិច្ចអន្តរជាតិជាលើកទីមួយហើយរបស់លោកស្រីសម្រាប់រយៈកាល២៤ឆ្នាំចុងក្រោយនេះ មុននឹងលោកស្រីអញ្ជើញទៅទ្វីបអឺរ៉ុប។
ជ័យលាភីរង្វាន់ណូបែលសន្តិភាព លោកស្រីអ៊ុងសានស៊ូជីមានអាយុ៦៦ឆ្នាំ ហើយបានជាប់ឃុំឃាំងអស់រយៈពេល១៥ឆ្នាំ នឹងអញ្ជើញទៅចូលរួម “ជំនួបហ្វ័ររូមសេដ្ឋកិច្ចពិភពលោកសម្រាប់អាស៊ីបូព៌ា” នៅប្រទេសថៃ។ នេះជាការប្រកាសឲ្យដឹងនៅថ្ងៃព្រហស្បតិ៍ម្សិលមិញដោយលោក Nyan Win អ្នកនាំពាក្យនៃសម្ព័ន្ធជាតិដើម្បីប្រជាធិបតេយ្យ( LND )។
នេះជាដំណើរទស្សនកិច្ចនៅក្រៅប្រទេសលើកទីមួយហើយរបស់លោកស្រីអ៊ុងសានស៊ូជី តាំងពីលោកស្រីបានអញ្ជើញចូលមកប្រទេសភូមានៅឆ្នាំ១៩៨៨មក។
គួរបញ្ជាក់ថា សន្និសីទនេះនឹងត្រូវប្រព្រឹត្តទៅពីថ្ងៃទី៣០ឧសភាដល់ថ្ងៃទី១ខែមិថុនាឆ្នាំ២០១២។ អ្នកនាំពាក្យបានថ្លែងឲ្យដឹងថា លោកស្រីអ៊ុងសានស៊ូជីនឹងអញ្ជើញទៅដល់ទីក្រុងបាងកកនៅថ្ងៃទី២៨ឧសភាខាងមុខនេះ។ ប៉ុន្តែអាជ្ញាធរថៃនៅពុំទាន់បានបញ្ជាក់ប្រាប់ពីវត្តមានរបស់លោកស្រីនេះនៅឡើយ។
ចំណែកឯលោកប្រធានាធិបតីភូមា ថេន សេន ដែលបានធ្វើឲ្យគេភ្ញាក់ផ្អើលពីកំណែទម្រង់នយោបាយកាលពីឆ្នាំទៅ នឹងត្រូវចាកចេញពីទីក្រុងណៃភីដ័រនៅថ្ងៃទី២៩ឧសភាខាងមុខ ហើយត្រូវឋិតនៅទីក្រុងបាងកកចំនួនបីថ្ងៃដើម្បីចូលរួម“ជំនួបហ្វ័ររូមសេដ្ឋកិច្ចពិភពលោកសម្រាប់អាស៊ីបូព៌ា” នៅប្រទេសថៃ។ នេះបើយោងតាមអ្នកទទួលខុសត្រូវភូមាម្នាក់ដែលពុំបញ្ចេញឈ្មោះ។
គួរកត់សម្គាល់ថា លោកស្រីអ៊ុងសានស៊ូជីបានត្រូវអាជ្ញាធរភូមាឃុំឃាំងជាលើកទី១នៅឆ្នាំ១៩៨៩។ លោកស្រីជ័យលាភីរង្វាន់ណូបែលសន្តិភាព ប្រមុខបក្សប្រឆាំងភូមាបានបាត់បង់សេរីភាពអស់រយៈពេល១៥ឆ្នាំ មុននឹងត្រូវគេដោះលែងឲ្យមានសេរីភាពឡើងវិញនៅខែវិច្ឆិកាឆ្នាំ២០១០។ លោកស្រីស៊ូជីពុំដែលហ៊ានចាកចេញពីប្រទេសភូមាឡើយ ដោយខ្លាងក្រែងរបបសឹកភូមាពុំអនុញ្ញាតឲ្យលោកស្រីវិលត្រឡប់ចូលប្រទេសភូមាវិញ។ ទោះបីជានៅពេលដែលស្វាមីរបស់លោកស្រីដែលឈឺធ្ងន់ដោយជំងឺមហារីករហូតដល់ស្លាប់នៅប្រទេសអង់គ្លេស ក៏លោកស្រីអ៊ុងសានស៊ូជីនៅតែឋិតនៅទីក្រុងរ៉ង់ហ្គូននៅឆ្នាំ១៩៩៩។
ក៏ប៉ុន្តែអតីតឧត្តមសេនីយ៍ ថេនសេន ដែលបានធ្វើឲ្យគេកើតមានការភ្ញាក់ផ្អើលដោយហេតុតែកំណែទម្រង់នយោបាយរបស់លោកកាលពីឆ្នាំទៅ បានរំលាយរបបគ្រប់គ្រងយោធាភូមាដោយខ្លួនឯងនៅខែមីនាឆ្នាំ២០១១ ហើយលោកស្រីអ៊ុងសានស៊ូជីក៏ទទួលបាននូវលិខិតឆ្លងដែនជាលើកទីមួយរបស់លោកស្រីនៅដើមខែឧសភាឆ្នាំ២០១២។ លិខិតឆ្លងដែននេះនឹងអនុញ្ញាតឲ្យលោកស្រីអ៊ុងសានស៊ូជីមានសិទ្ធិសេរីភាពក្នុងការធ្វើដំណើរឡើងវិញ។
លោកស្រីអ៊ុងសានស៊ូជីត្រូវឡើងថ្លែងសុន្ទរកថាមួយនៅថ្ងៃទី១៤មិថុនាឆ្នាំ២០១២នៅទីក្រុងហ្សឺណែវនៅមុខអង្គការអន្តរជាតិខាងការងារ (OIT) បន្ទាប់មកទៀត លោកស្រីអ៊ុងសានស៊ូជីត្រូវអញ្ជើញទៅទីក្រុងអូសឡូដែលលោកស្រីត្រូវឡើងថ្លែងសុន្ទរកថាមួយដែលលោកស្រីត្រូវថ្លែងកាលពី២១ឆ្នាំមុន ដែលកាលណោះ លោកស្រីអ៊ុងសានស៊ូជីបានត្រូវគេជ្រើសតែងតាំងជាជ័យលាភីរង្វាន់ណូបែលសន្តិភាពនៅឆ្នាំ១៩៩១។
បន្ទាប់មកទៀត លោកស្រីអ៊ុងសានស៊ូជីត្រូវអញ្ជើញទៅទីក្រុងឡុងដ្រឹ៍នៃប្រទេសអង់គ្លេស ជាទីកន្លែងដែលលោកស្រីធ្លាប់បានធ្វើការសិក្សានិងជាទីកន្លែងដែលលោកស្រីធ្លាប់បានរស់នៅជាមួយស្វាមីនិងបុត្ររបស់លោកស្រី។
រីឯសភាអង់គ្លេសវិញបានថ្លែងឲ្យដឹងនៅថ្ងៃពុធកន្លងទៅថា លោកស្រីអ៊ុងសានស៊ូជីបានយល់ព្រមទទួលការអញ្ជើញឡើងថ្លែងសុន្ទរកថាមួយនៅមុខសមាជិកសភាអង់គ្លេសទាំងពីរនៅថ្ងៃទី២១ខែមិថុនាឆ្នាំ២០១២ខាងមុខនេះ។
ព្រឹត្តិការណ៍ដ៏កម្រនេះបានត្រូវស្វាគមដោយលោកនាយករដ្ឋមន្ត្រីអង់គ្លេស David Cameron ដែលបានជួបលោកស្រីអ៊ុងសានស៊ូជីនៅទីក្រុងរ៉ង់ហ្គូនកាលពីខែមេសាកន្លងទៅ។ ទាំងនេះបានបណ្តាលឲ្យលោកនាយករដ្ឋមន្ត្រីអង់គ្លេសថ្លែងថា “ការដែលលោកស្រីអ៊ុងសានស៊ូជីអាចធ្វើដំណើរដោយសេរីនិងអាចឡើងមកថ្លែងសុន្ទរកថានៅមុខសភាអង់គ្លេសបែបនេះ បញ្ជាក់បង្ហាញឲ្យឃើញថាមានការប្តូរប្រែប្រួលយ៉ាងអស្ចារ្យនៅក្នុងប្រទេសភូមា”។
ដូច្នេះ លោកស្រីអ៊ុងសានស៊ូជីនឹងឆ្លៀតឱកាសនេះថ្លែងពន្យល់ឲ្យគេយល់ដឹងពីយុទ្ធសាស្ត្រនិងសារៈសំខាន់នៃទណ្ឌកម្មអន្តរជាតិដែលបានដាក់ទៅលើរបបគ្រប់គ្រងភូមា។
លោកស្រីអ៊ុងសានស៊ូជីស្នើឲ្យគេដកចេញបន្តិចម្តងៗ នូវទណ្ឌកម្មអន្តរជាតិ ដើម្បីរក្សាទុកឲ្យមាន “មធ្យោបាយ” និង “សម្ពាធ” សម្រាប់ដាក់ទៅលើរបបគ្រប់គ្រងភូមាដែលក្រុមយោធានៅអាចងាកមកធ្វើការខាឃាំងកំណែទម្រង់នយោបាយបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ