តុលាការយុត្តិធម៌បារាំងចោទប្រកាន់ប្រធានអង្គការរូបិយវត្ថុអន្តរជាតិ ជាផ្លូវការ
យោងតាមការចុះផ្សាយរបស់សារព័ត៌មានបារាំង អា អេហ្វ ប៉េ ថ្ងៃពុធនេះ តុលាការយុត្តិធម៌បារាំងបានចោទប្រកាន់ជាផ្លូវការលើលោកស្រី Christine Lagarde ជាប្រធានមូលនិធិរូបិយវត្ថុអន្តរជាតិ FMI ពីបទធ្វេសប្រហែសក្នុងសំណុំរឿងជម្លោះរវាងមហាសេដ្ឋីប៊ែរណា តាពី និងធនាគាររដ្ឋ Credit Lyonnais ធ្វើអោយធនាគាររដ្ឋបារាំងខាតបង់លុយកាក់ច្រើន។ ក្នុងសំណុំរឿងនេះ លោកស្រីធ្លាប់បានសម្រេចចិត្តជ្រើសរើសក្រុមប្រឹក្សាអាជ្ញាកណ្តាលដោយខ្លួនឯង ដើម្បីដោះស្រាយជម្លោះ ដោយមិនបានសុំយោបល់ពីរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
តុលាការយុត្តិធម៌បារាំងបានសម្រេចចោទប្រកាន់ជាផ្លូវការលើប្រធានលោកស្រី Christine Lagarde ប្រធានមូលនិធិរូបិយវត្ថុអន្តរជាតិ FMI ពីបទធ្វេសប្រហែសក្នុងសំណុំរឿងជម្លោះរវាងមហាសេដ្ឋីប៊ែរណា តាពី និងធនាគាររដ្ឋ Credit Lyonnais ។ គួរបញ្ជាក់ថា សេដ្ឋីបារាំង ប៊ែរណា តាពី បានប្តឹងទាមទារជំងឺចិត្តពីធនាគាររដ្ឋ ពីបទទិញក្រុមហ៊ុន Adidas របស់លោកក្នុងតម្លៃបោកប្រាស់។ បណ្តឹងក្តីក្តាំនេះមានរាប់ឆ្នាំ ពិបាកដោះស្រាយរហូតឡើងដល់សាលាឧទ្ធរណ៍។
រឿងរ៉ាវក្តីក្តាំបានពាក់ព័ន្ធទៅដល់លោកស្រី គ្រីស្ទីន ឡាហ្កាដ ក្នុងឆ្នាំ២០០៨ ក្នុងរបបដឹកនាំរបស់អតីតប្រធានាធិបតីនីកូឡា សាកូហ្ស៊ី។ ក្នុងរដ្ឋាភិបាលលោកសាកូហ្ស៊ី លោកស្រីឡាហ្កាដ ជារដ្ឋមន្ត្រីសេដ្ឋកិច្ច ពីឆ្នាំ២០០៧ ដល់ឆ្នាំ២០១១។ លោកស្រីបានសម្រេចចិត្តរើសក្រុមប្រឹក្សាអាជ្ញាកណ្តាលដោះស្រាយជម្លោះរវាងសេដ្ឋី តាពី និងធនាគាររដ្ឋ ក្រេដីត លីយោណេ។ អ្វីដែលធ្វេសប្រហែសតាមការចោទប្រកាន់របស់តុលាការយុត្តិធម៌បារាំងនោះ គឺថាលោកស្រីឡាហ្កាដ ដោះស្រាយជម្លោះដោយជ្រើសរើសក្រុមប្រឹក្សាអាជ្ញាកណ្តាលដោយខ្លួនឯង មិនសួរយោបាល់ពីរដ្ឋាភិបាល ខណៈក្នុងជម្លោះ មានស្ថាប័នធនាគាររបស់រដ្ឋ ដែលត្រូវសងជំងឺចិត្តសេដ្ឋីតាពី រងការខាតបង់ប្រាក់ធ្ងន់ធ្ងររហូតដល់៤០០លានអឺរ៉ូឯណោះ។ ក្នុងក្រុមប្រឹក្សាអាជ្ញាកណ្តាលនេះ គេឃើញមានតំណាងគូភាគីជម្លោះតែប៉ុណ្ណោះ។ អតីតរដ្ឋមន្ត្រីសេដ្ឋកិច្ចបារាំង ធ្លាប់បានប្រាប់ថា លោកស្រីធ្វើដូច្នេះ គឺដើម្បីបិទបញ្ចប់ជម្លោះវែងឆ្ងាយរវាងលោកប៊ែរណា តាពី និងធនាគាររដ្ឋ។ ប៉ុន្តែ ដោយសារតែលោកប៊ែរណា តាពី ជាអ្នកជិតដិតនឹងអតីតប្រធានាធិបតី សាកូហ្ស៊ី នាំអោយគេគិតថា លោកស្រី ឡាហ្កាដ អាចដោះស្រាយជម្លោះនេះ លំអៀងផ្តល់ប្រយោជន៍ទៅរកលោកតាពី។
គួរបញ្ជាក់ថា តុលាការយុត្តិធម៌បារាំង មានទីតាំងនៅក្រុងប៉ារីស ជាតុលាការពិសេសបង្កើតឡើងក្នុងឆ្នាំ១៩៩៣ ដើម្បីកាត់ទោសសមាជិករដ្ឋាភិបាលដែលប្រព្រឹត្តបទល្មើស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ