“ជាប់គុកមួយជីវិត”សម្រាប់កាំង ហ្គេចអ៊ាវហៅឌុច
ឌុច មេគុកស២១នៅក្នុងទីក្រុងភ្នំពេញក្រោមរបបខ្មែរក្រហម ដែលនៅទីនោះ មានមនុស្សប្រមាណ១៥ ០០០នាក់ បានត្រូវមេគុកឌុចធ្វើទណ្ឌកម្មនិងសម្លាប់យ៉ាងឃោរឃៅ។ នៅថ្ងៃសុក្រទី៣កុម្ភៈនេះ តុលាការកំពូលឧបត្ថម្ភដោយអង្គការសហប្រជាជាតិបានសម្រេចកាត់ទោសឲ្យឌុចជាប់គុកមួយជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ឌុចដែលជាអតីតមេគុកទួលស្លែងឬស២១ដែលជាពន្ធនាគារដ៏ធំនៅក្នុងទីក្រុងភ្នំពេញ ក្រោមរបបខ្មែរក្រហម (ឆ្នាំ១៩៧៥-១៩៧៩) បានត្រូវគេចាប់ខ្លួននៅឆ្នាំ១៩៩៩ ពោលគឺ២០ឆ្នាំក្រោយពីរបបខ្មែរក្រហមដ៏សាហាវឃោរឃៅបានដួលរលំ។ កាំង ហ្គេចអ៊ាវហៅឌុចក៏បានត្រូវតុលាការឧបត្ថម្ភដោយអង្គការសហប្រជាជាតិកាត់ទោសជាលើកដំបូងឲ្យ “ជាប់គុក៣០ឆ្នាំ” នៅខែកក្កដាឆ្នាំ២០១០ពីបទឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ។
បន្ទាប់មក ឌុចនិងមេធាវីក៏បានប្តឹងតវ៉ាទៅសាលាកំពូលសុំរួចខ្លួនពីពន្ធនាគារ ដោយអះ អាង ថា ខ្លួនពុំមែនជាមេដឹកនាំធំដុំនៅក្នុងរបបខ្មែរក្រហម ហើយគ្មានតួនាទីអ្វីសំខាន់ឡើយ។ ទង្វើអ្វីៗដែលខ្លួនបានប្រព្រឹត្តនៅក្នុងគុកទួលស្លែងគឺធ្វើតាមតែការបញ្ជារបស់ថ្នាក់លើតែ ប៉ុណ្ណោះ។
ក៏ប៉ុន្តែ នៅថ្ងៃសុក្រទី៣កុម្ភៈនេះ តុលាការកំពូលបានសម្រេចកាត់ទោសឲ្យឌុច “ជាប់គុកមួយជីវិត” ទៅវិញ ដោយតុលាការកំពូលយល់ថា ការកាត់ទោសជាលើកដំបូងឲ្យ “ជាប់គុក៣០ឆ្នាំ”ជាទោសមានលក្ខណៈស្រាលពេក ពុំស្មើនឹងកម្រិតឧក្រិដ្ឋកម្មដ៏ធ្ងន់ធ្ងរដែលបានប្រព្រឹត្តដោយ កាំង ហ្គេចអ៊ាវ ហៅឌុច មេគុកទួលស្លែងឬស២១ ដែលនៅទីនោះមានមនុស្សប្រមាណ១៥ ០០០នាក់ បានត្រូវមេគុកឌុចធ្វើទណ្ឌកម្មនិងសម្លាប់យ៉ាងឃោរឃៅ។
ឌុចដែលមានអាយុ៦៩ឆ្នាំ ពាក់អាវស នៅពេលឮតុលាការកំពូលសម្រេចកាត់ទោសឲ្យ"ជាប់គុកមួយជីវិត” ពុំបានចេញស្ដីអ្វីឡើយ។ គួរបញ្ជាក់ថា ការកាត់ទោសជាលើកដំបូងដោយតុលាការឲ្យឌុច “ជាប់គុក៣០ឆ្នាំ” អាចអនុញ្ញាតឲ្យមេគុកទួលស្លែងហៅឌុចរួចខ្លួនចេញពីពន្ធនាគារក្នុងរយៈពេល១៨ឆ្នាំខាងមុខ នៅពេលដែលឌុចមានអាយុ៨៧ឆ្នាំ ដោយហេតុថា ឌុចបានត្រូវគេចាប់ឃុំឃាំងអស់រយៈកាល១២ឆ្នាំរួចមកហើយ។
នេះក៏ជាកត្តាមួយនាំឲ្យតុលាការកំពូលសម្រេចកាត់ទោសឲ្យឌុច “ជាប់គុកមួយជីវិត” ។ ហើយម្យ៉ាងទៀត ការកាត់ទោសជាលើកដំបូងឲ្យឌុច “ជាប់គុក៣០ឆ្នាំ” នៅខែកក្កដាឆ្នាំ២០១០ពីបទឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ ជាការកាត់ទោសមានលក្ខណៈស្រាលពេក ពុំសមស្របនឹងទម្ងន់នៃឧក្រិដ្ឋកម្មដែលបានប្រព្រឹត្តដោយមេគុកទួលស្លែងហៅឌុចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ