សង្គ្រាមដើមសាប៉ាំងណូអែលធ្វើពីដែកបិទបញ្ចប់ហើយរវាងកូរ៉េទាំងពីរ
កូរ៉េខាងត្បូងទើបជូនបានជូនដំណឹងនៅថ្ងៃពុធ២២តុលានេះ ថាខ្លួនបំផ្លាញចោលដើមសាប៉ាំងណូអែលដ៏ធំមួយធ្វើពីដែកដែលកូរ៉េខាងត្បូងបានសាងសង់នៅជិតព្រំដែនកូរ៉េខាងជើង។ ដើមសាប៉ាំងណូអែលនេះ ក៏ជាប្រធានបទមួយដ៏ក្តៅគគុកនិងរឹតតែបង្កើនភាពតានតឹងជាមួយក្រុងព្យុងយ៉ាងដែរ។ សាប៉ាំងណូអែលនេះមានរំលេចលំអទៅដោយពន្លឺភ្លើងអំពូលយ៉ាងចិញ្ចាចចិញ្ចែង ហើយនៅចុងកំពូលសំណង់ដែកនេះវិញ ក៏មានដាក់តាំងនូវឈើឆ្កាងដែលជានិមិត្តរូបគ្រិះស្តសាសនា។ នៅកូរ៉េខាងជើងអ្នកកាន់សាសនាគ្រិស្ត ត្រូវទទួលរងទុក្ខបុកម្នេញយ៉ាងច្រើនពីសំណាក់ពួកកុម្មុយនិស្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កូរ៉េខាងជើងបានទាមទារជាច្រើនលើកច្រើនសាមកហើយ ឲ្យកូរ៉េខាងត្បូង បំផ្លាញចោលសំណង់ដែកដើមណូអែលនេះ។ មានកំពស់២០ម៉ែត្រ និងមានចំណាស់៤៣ឆ្នំា ដើមណូអែលធ្វើពីដែករបស់កូរ៉េខាងត្បូងនេះ ត្រូវបានសាងសង់នៅលើកំពូលកូនភ្នំមួយដែលស្ថិតនៅចម្ងាយប្រមាណជា៣គីឡូម៉ែត្រ ពីតំបន់ព្រំដែនខ័ណ្ឌចែកកូរ៉េទាំងពីរ ។ មិនតែប៉ុណ្ណោះ កូរ៉េខាងជើងថែមទាំងបានគំរាមថានឹងដាក់គ្រាប់បែកបំផ្លាញសំណង់ដែកនេះចោលទៀតផង។
ក្រសួងការពារជាតិកូរ៉េខាងត្បូងបានពន្យល់ថា មូលហេតុដែលកូរ៉េខាងត្បូងសំរេចចិត្តបំផ្លាញចោលសំណង់ដែកនេះ ដោយសារហេតុផលចម្បងមួយ គឺបញ្ហាសន្តិសុខ ប៉ុន្តែមិនជាប់ទាក់ទងនឹងបញ្ហាទំនាក់ទំនងរវាងកូរ៉េទាំងពីរនោះទេ។ប្រភពដដែល បានបញ្ជាក់ទៀតថា” ការងារបំផ្លាញចោលដើមណូអែលនេះ បានចាប់ផ្តើមតាំងពីខែសីហាមុន ហើយកូរ៉េខាងត្បូងក៏នៅពុំទាន់មានគម្រោងបង្កើតសំណង់ណាមួយមកដាក់ជំនួសកន្លែងនេះនៅឡើយដែរ”។
ការបំផ្លាញចោលដើមណូអែលដែកនេះ ត្រូវបានប្រព្រឹត្តទៅនៅខណៈដែលកូរ៉េទាំងពីរ បានចាប់មានទំនាក់ទំនងជាមួយគ្នាឡើងវិញជាអាទិ៍ ការចុះកិច្ចព្រមព្រៀងមួយនាពេលថ្មីៗកន្លងទៅ។ កិច្ចព្រមព្រៀងដែលមានគោលដៅ ចាប់ផ្តើមកិច្ចចរចារវាងថ្នាក់ដឹកនាំជាន់ខ្ពស់របស់កូរ៉េទាំងពីរ ដែលធ្វើឡើងនៅនាឱកាសដំណើរទស្សនកិច្ចដ៏គួរអោយភ្ញាក់ផ្អើលមួយរបស់គណៈប្រតិភូ កូរ៉េខាងជើងនៅកូរ៉េខាងត្បូង។
គួររំលឹកថានៅឆ្នាំ ២០០៤ កូរ៉េទាំងពីរ បានចុះកិច្ចព្រមព្រៀងមួយក្នុងគោលដៅបញ្ចប់រាល់ការឃោសនាញុះញង់នានានៅជិតតំបន់ខ្សែបន្ទាត់ព្រំដែន ។ ក្រុងសេអ៊ូលវិញ បានយល់ព្រមបិទភ្លើងតុបតែងលំអដើមណូអែលដ៏ធំមហិមា។ នៅឆ្នាំ២០១០ ក្រុងសេអ៊ូល បានឈប់គោរពកិច្ចព្រមព្រៀងនេះដោយសារមានភាពតានតឹងជាមួយកូរ៉េខាងជើង។ ប៉ុន្តែ ក្រោយពីមរណភាពរបស់ប្រមុខដឹកនាំកូរ៉េខាងជើងគឹមជុងអ៊ីលនៅឆ្នាំ ២០១១ អាជ្ញាធរកូរ៉េខាងត្បូងនៅតែបន្តបិទភ្លើងដើមណូអែល រហូតមកដល់ឆ្នាំ២០១៣ទៀត បើទោះបីជាទំនាក់ទំនងរវាងកូរ៉េទាំងពីរ បានធ្លាក់ចុះដុនដាបយ៉ាងណាក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ