វិមានក្រេមឡាំង៖ វាយប្រហារមកលើពូទីន គឺវាយប្រហារមកលើប្រទេសរុស្ស៊ី
ចុះផ្សាយនៅថ្ងៃ៖
ស្តាប់ - ០៤:៣៤
នេះជាខ្លឹមសារនិក្ខេបបទមួយលើកឡើងដោយអ្នកដឹកនាំម្នាក់នៃខុទ្ទកាល័យវិមានក្រេមឡាំង ក្នុងជំនួបលើកទី១១ នៃ “ក្លឹបសាកច្ឆាអន្តរជាតិ” ក្រោមឈ្មោះ ថា ” Valdai “ ដែលធ្វើការងារខ្លួនរយៈពេល៣ថ្ងៃតាំងពីថ្ងៃពុធទី២២តុលាមក ដោយមានការចូលរួមនៃ ពួក អ្នកជំនាញនិងពួកនយោបាយវិទូ មកពី២៥ប្រទេសក្នុងលោក។ ថ្ងៃ២៤តុលានេះ ដែលជាថ្ងៃបិទ បញ្ចប់ គឺដល់វេនលោកប្រធានាធិបតីរុស្ស៊ីពូទីនឡើងថ្លែងសុន្ទរកថា បូកសរុបតុល្យាការជំនួប។
ឈ្មោះ Valdai ដែលសម្គាល់ជំនួបគឺមានប្រភពចេញមក ពីបឹងឈ្មោះយ៉ាងនេះ ស្ថិត នៅជិតទីរួមខេត្ត Viliky Novgorod ចម្ងាយ៥៣០គ.ម. ឦសានពីរដ្ឋធានីម៉ូស្គូ ដែលកាលពីខែកញ្ញាឆ្នាំ២០០៤ មានប្រព្រឹត្តទៅសន្និសីទលើកទី១ បង្កើតឡើងជា “ក្លឹបសាកច្ឆាអន្តរជាតិ”។ហើយតាំងពីពេលនោះមក ក្លឹបនេះឯង តែងរួមប្រជុំជាជំនួបមួយឆ្នាំម្តងមិនដែលអាក់ខានទេ។
ក្នុងជំនួបលើកនេះ ដែលតាមលេខរៀងជាលើកទី១១ ប្រព្រឹត្តទៅ គឹនៅក្រុងរមណីយដ្ឋាន Sochi មាត់សមុទ្រខ្មៅចម្ងាយប្រមាណ១.៧០០គ.ម. ខាងត្បូងពីម៉ូស្គូ។ ចូលរួម គឺ អ្នកជំនាញការនយោបាយវិទូ១០៩នាក់ពីក្នុងនោះ ៦៥នាក់ មកពី២៥ប្រទេស បែបយ៉ាង ប្រទេសចិនសង្ហបុរី ជប៉ុន អ៊ីស្រាអែល តួកគី អ៊ីរ៉ង់និងថែមទាំងពីអ៊ុយក្រែនផង។ ទោះបី រុស្ស៊ីស្ថិតនៅក្រោមទណ្ឌកម្មក្តី ក៏ប្រតិភូបរទេសទាំងនោះ នៅតែវត្តមានដដែលក្នុងជំនួប។ គេទាំងនោះ មានឯកទេសកម្ម ខាងស្រាវជ្រាវក្នុងវិស័យសេដ្ឋកិច្ច វប្បធម៌ មនុស្សធម៌ ប្រទេស រុស្ស៊ី។ លើកនេះ គឺបញ្ហាផ្ទៃក្នុងរុស្ស៊ី ដែលក្លាយទៅជាប្រធានបទចម្បង។
ការពិភាក្សានេះ ចាប់ផ្តើមឡើង ដោយសំនួរអ្នកនយោបាយវិទូ ដែលដឹកនាំ”វិជ្ជាស្ថានសន្តិសុខ ពិភពលោក” នៅក្រុងវ៉ាស៊ីនតោន គឺលោក Nicolai Zlobin ៖ តើទណ្ឌកម្មបស្ចិមលោកបានជះឥទ្ធិពលយ៉ាងណា មកលើស្ថានការណ៍ផ្ទៃក្នុងប្រទេសរុស្ស៊ី? តបនឹងសំនួរនេះ នាយករងទី១ នៃខុទ្ទកាល័យប្រធានាធិបតីរុស្ស៊ី លោក Vyacheslav Volodin ឆ្លើយបំភ្លឺថា៖ជាកំហុសធ្ងន់តែម្ដង របស់រាល់អ្នកណា ដែលគិតថា ទណ្ឌកម្មនេះ នឹងធ្វើឲ្យប្រទេសរុស្ស៊ីប្រេះឆា។ ប៉ុន្តែតាមពិតទៅ ទណ្ឌកម្មនេះ បែរទៅជាញ៉ាំង ប្រជាពលរដ្ឋរុស្ស៊ី ឲ្យកាន់តែរួមសម្បាច់គ្នា ជុំវិញប្រមុខរដ្ឋខ្លួន។ គេនាំគ្នាយល់ថា ការវាយប្រហារមកលើរូបលោកប្រធានាធិបតីពូទីន គឺជាការវាយប្រហារមកលើប្រទេសរុស្ស៊ីតែម្តង។
តំណាងផ្លូវការរបស់វិមានក្រេមឡាំង បានលើកយកតួលេខ នៃការស្ទង់មតិ មកសំអាង គឺថា មានប្រជាពលរដ្ឋរុស្ស៊ីដល់ទៅ៨៥%គាំទ្រដល់សកម្មភាពលោកពូទីន ជាប្រធានាធិបតីខ្លួន ចំណែកមតិ៦៦%ទៀត មិនមើលឃើញបេក្ខជនណាផ្សេងឡើយ ក្រៅពីលោកពូទីន សម្រាប់ឈរឈ្មោះចូលប្រឡូកក្នុងការបោះឆ្នោតប្រធានាធិបតី នៅឆ្នាំ២០១៨ ហើយគេចង់ឲ្យ រូបគាត់ជាប់ឆ្នោត សាជាថ្មី។ សម្រេចសម្រួចទៅលោក Volodin បានបន្ឡឺឡើងនូវ និក្ខេបបទគន្លឹះ ដែលឆ្លុះឲ្យឃើញ ជាក់ច្បាស់មែន ពីសភាពការណ៍បច្ចុប្បន្ននៃប្រទេសរុស្ស៊ីនិង ប្រជាជនរុស្ស៊ី គឺថា ៖ “ដរាបណាមានពូទីនដរាបនោះប្រទេសរុស្ស៊ីនៅតែសណ្ឋិតនៅ គែបើគ្មានពូទីន នោះមុខជា គ្មានអត្ថិភាពប្រទេសរុស្ស៊ីឡើយ”។
អ្វីជាការកត់សម្គាល់គឺថាក្នុងទស្សនាទានជំនួប មានការផ្លាស់ប្តូរកើតឡើង ៖ បើលើកមុនៗ “ក្លឹប Valdai “ តែងបានដើរតួជា វេទិកាសាកច្ឆា ជាទីដែល ពួកអ្នកជំនាញអន្តរជាតិ ដោយរួម ជាមួយដៃគូរុស្ស៊ី តែងបានជជែកពិភាក្សាអំពី តួនាទីនិងកន្លែងរបស់រុស្ស៊ីនៅក្នុងលោក នោះ ឥឡូវ វាប្រែក្លាយទៅជា វេទិកា ដែលភាគីរុស្ស៊ី លើកយកទៅពិភាក្សាជាមួយដៃគូបរទេសខ្លួន គឺបញ្ហា ៖ តើអ្វីទៅដែលកំពុងប្រព្រឹត្តទៅនៅក្នុងលោក?ម៉្លោះហើយបានជា ជំនួបលើកទី១១ នៃ “ក្លឹប Valdai “ បន្លឺឡើងនូវបាវចនាដែលថា៖សណ្តាប់ធ្នាប់នៅក្នុងលោកតើមានក្បួនខ្នាតឫទេ?
ទោះយ៉ាងណាក្តី ក៏ប្រធានបទទាក់ទងនឹងប្រទេសរុស្ស៊ី ស្ថិតនៅជាអាទិភាពដដែល។លោកប្រធានាធិបតីពូទីនថ្ងៃសុក្រនេះ ឡើងថ្លែងសុន្ទរកថា បូកសរុបតុល្យាការជំនួប លើកទី១១ នៃ “ក្លឹបសាកច្ឆាអន្តរជាតិ” ក្រោមឈ្មោះថា ” Valdai “ ដែលបានធ្វើការងារខ្លួន អស់រយៈពេល៣ថ្ងៃ។
គឺតាំងពីឆ្នាំ២០០៦មកដែលលោកពូទីនតែងជួបដោយផ្ទាល់ ជាមួយ រាល់តែ ប្រតិភូ ទាំងបរទេសទាំងរុស្ស៊ី ដែលចូលរួមក្នុងជំនួបនេះ។ ករណីពិសេស គឺក្នុងឆ្នាំ២០០៨ កាលដែលគេ ជួបទាំងជាមួយលោកពូទីន កាលណោះជានាយករដ្ឋមន្ត្រី ទាំងជាមួយលោក មេដវេដេវ កាលណោះជាប្រធានាធិបតីរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ