សាលាក្តីខ្មែរក្រហមខ្វះថវិកាទាំងស្រុងសម្រាប់ឆ្នាំ២០១៣
នៅសល់តែជាង១ខែទៀតប៉ុណ្ណោះនឹងដាច់ឆ្នាំ ២០១២ នៅមិនទាន់មានម្ចាស់ជំនួយណាសន្យាផ្តល់ថវិកាដល់សាលាក្តីខ្មែរក្រហមសម្រាប់បន្តដំណើរការនៅឡើយទេ។ មិនត្រឹមតែខ្វះថវិកាទាំងស្រុងសម្រាប់ដំណើរការឆ្នាំ ២០១៣ ប៉ុណ្ណោះទេ ប៉ុន្តែ ភាគីអន្តរជាតិនៃសាលាក្តីនេះនៅខ្វះ៤លានដុល្លារទៀតដើម្បីបញ្ចប់ការងារឆ្នាំ ២០១២ ។ នេះជាចំណុចប្រឈមដ៏ធំធេងរបស់សាលាក្តីខ្មែរក្រហម ខណៈដែលសវនាការសំណុំរឿង ០០២ កំពុងដំណើរការ។ អង្គការសហប្រជាជាតិ និងរដ្ឋាភិបាលកម្ពុជាគ្រោងកោះប្រជុំដើម្បីពិភាក្សាឡើងវិញអំពីបញ្ហាថវិកា។
ចុះផ្សាយនៅថ្ងៃ៖
ស្តាប់ - ០២:៤៤
សាលាក្តីខ្មែរក្រហមកំពុងតែប្រឈមមុខយ៉ាងធ្ងន់ធ្ងរទៅនឹងវិបត្តិថវិកាដោះស្រាយមិនចេញ។ ដើម្បីបន្តដំណើរការឆ្នាំ ២០១៣ ដែលនឹងឈានមកដល់ក្នុងរយៈពេលតែជាង១ខែទៀតនេះសាលាក្តីខ្មែរក្រហមបានលើកគម្រោងថវិកាចំណាយជិត ៤៤ លានដុល្លារ ។ ប៉ុន្តែ រហូតមកទល់ថ្ងៃនេះ គ្មានប្រទេសម្ចាស់ជំនួយណាមួយបានសន្យាបន្តផ្តល់ថវិកាដល់សាលាក្តីកូនកាត់នេះនៅឡើយទេ។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហម បានប្រាប់វិទ្យុបារាំងអន្តរជាតិនៅថ្ងៃនេះថា កុំថាឡើយតែថវិកាឆ្នាំ ២០១៣ សូម្បីតែគម្រោងបញ្ចប់ឆ្នាំ ២០១២ នេះ ភាគីអន្តរជាតិនៅខ្វះសាច់ប្រាក់ចំនួន៤លានដុល្លារទៀត ដើម្បីបង្ហើយការងាររបស់ខ្លួន។ ចំណែកភាគីកម្ពុជាអាចមានថវិកាដំណើរការដល់ដំណាច់ឆ្នាំ។ ប្រឈមមុខទៅនឹងការលំបាកកាន់តែខ្លាំងឡើងក្នុងការរៃអង្គាសថវិកា គម្រោងចំណាយឆ្នាំ ២០១៣ អាចនឹងត្រូវកាត់បន្ថយមួយចំនួនទៀត។ នេះបើយោងតាមមន្ត្រីអ្នកនាំពាក្យដដែល។
សូមបញ្ជាក់ថា ចាប់តាំងពីផ្តើមដំណើរការកាលពីឆ្នាំ ២០០៦ រហូតដល់ឆ្នាំ ២០១១ សាលាក្តីកាត់ទោសអតីតមេដឹកនាំខ្មែរក្រហមបានចំណាយថវិកាអស់ជាង ១៤១ លានដុល្លារហើយ។ ក្នុងឆ្នាំ ២០១២ នេះ សាលាក្តីគ្រោងចំណាយជាង ៤៥ លានដុល្លារ ប៉ុន្តែ នៅមិនទាន់មានថវិកាគ្រប់នៅឡើយទេ។ ប្រទេសជប៉ុនបានផ្តល់ថវិកាច្រើនជាងគេដល់សាលាក្តីខ្មែរក្រហមដែលមានទឹកប្រាក់សរុប ៧៥,៩ លានដុល្លារ ឬស្មើនឹង ៤៦ភាគរយនៃចំណាយសរុបរបស់សាលាក្តីទាំងមូល។ បន្ទាប់មកមានប្រទេសអូស្ត្រាលី សហរដ្ឋអាមេរិក អាល្លឺម៉ង់ បារាំង និងអង់គ្លេសជាដើម។
ការផ្តល់ជំនួយដល់សាលាក្តីខ្មែរក្រហមហាក់មានសកម្មភាពរស់រវើកកាលពីដើមដំបូង ប៉ុន្តែ ចុងក្រោយនេះ ប្រទេសម្ចាស់ជំនួយដែលកំពុងរងវិបត្តិថវិកាខ្លួនឯងយ៉ាងខ្លាំងនោះ មិនសូវបានចាប់អារម្មណ៍ដល់សាលាក្តីនេះទៀតទេ។ ដោយសារបញ្ហាថវិកា សវនាការកាត់ក្តីសំណុំរឿង ០០២ ត្រូវបានកាត់បន្ថយពី៤ថ្ងៃមកនៅត្រឹម៣ថ្ងៃប៉ុណ្ណោះក្នុងមួយសប្តាហ៍។ អង្គការសហប្រជាជាតិ និងរដ្ឋាភិបាលកម្ពុជាដែលជាភាគីបង្កើតសាលាក្តីខ្មែរក្រហមបានផ្ញើលិខិតទៅកាន់ប្រទេសម្ចាស់ជំនួយទាំងអស់ ដើម្បីសុំឲ្យពួកគេបន្តគាំទ្រសាលាក្តី ប៉ុន្តែ រហូតដល់ពេលនេះ គ្មានប្រទេសណាមួយឆ្លើយតបនៅឡើយទេ។
បើយោងតាមលោក នេត្រ ភក្ត្រា អង្គការសហប្រជាជាតិ និងរដ្ឋាភិបាលកម្ពុជាគ្រោងបើកកិច្ចប្រជុំមួយក្នុងពេលឆាប់ៗនេះ ដើម្បីពិភាក្សាឡើងវិញអំពីបញ្ហាថវិកាដែលជាចំណុចប្រឈមយ៉ាងធំមួយ ដែលអាចនឹងធ្វើឲ្យតុលាការនេះជាប់គាំងទាំងពាក់កណ្តាលទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ