កម្ពុជា -

អត្ថបទចុះផ្សាយនៅថ្ងៃ អាទិត្យ 14 តុលា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 16 តុលា 2012

សាលាក្តីខ្មែរក្រហមតែងតាំងអ្នកជំនាញឲ្យវាយតម្លៃសុខភាព អៀង សារី

អៀង សារី អតីតឧបនាយករដ្ឋមន្រ្តី ទទួលបន្ទុកកិច្ចការបរទេស នៃរបបខ្មែរក្រហម

©Reuters

ដោយ ប៉ែន បូណា

អង្គជំនុំជម្រះសាលាដំបូងនៃសាលាក្តីខ្មែរក្រហមបានសម្រេចតែងតាំងគ្រូពេទ្យជំនាញពីររូបគឺជនបរទេសមួយរូប និងខ្មែរមួយរូបដើម្បីត្រួតពិនិត្យស្ថានភាពសុខភាពជនជាប់ចោទ អៀង សារី។ គ្រូពេទ្យជំនាញទាំងពីររូបនឹងផ្តើមការងាររបស់ខ្លួននៅក្រោយបុណ្យភ្ជុំបិណ្ឌនេះដើម្បីវាយតម្លៃថា តើត្រូវចាត់វិធានការយ៉ាងណាចំពោះលោកអៀង សារី។ ការចាត់តាំងគ្រូពេទ្យជំនាញដើម្បីវាយតម្លៃខុសភាពរបស់អៀង សារីបានធ្វើឡើងបន្ទាប់ពីជនជាប់ចោទរូបនេះបានចូលសម្រាកក្នុងមន្ទីរពេទ្យជាងមួយខែមកហើយ តែនៅមិនទាន់ធូរស្បើយនៅឡើយ។

សេចក្តីរាយការណ៍របស់ ប៉ែន បូណា ពីភ្នំពេញ

ស្តាប់ (02:12)

14/10/2012

គ្រូពេទ្យជំនាញជនជាតិនូវែលហ្សេឡង់ លោក John Cambell ដែលធ្លាប់ពិនិត្យសុខភាពលោកស្រី អៀង ធីរិទ្ធ និងគ្រូពេទ្យជំនាញជនជាតិខ្មែរមួយរូបទៀត ត្រូវបានអង្គជំនុំជម្រះសាលាដំបូងនៃសាលាក្តីខ្មែរក្រហមតែងតាំងម្តងទៀត ដើម្បីវាយតម្លៃសុខភាពរបស់ជនជាប់ចោទអៀង សារី។

គ្រូពេទ្យជំនាញទាំងពីររូបនឹងផ្តើមបំពេញការងាររបស់ខ្លួននៅក្រោយបុណ្យភ្ជុំបិណ្ឌនេះហើយ។ នេះបើយោងតាមការឲ្យដឹងរបស់លោក នេត្រ ភក្ត្រា អ្នកនាំពាក្យសលាក្តីខ្មែរក្រហម។ ការវាយតម្លៃសុខភាពរបស់លោក អៀង សារី បានធ្វើឡើងបន្ទាប់ពីជនជាប់ចោទរូបនេះបានចូលសម្រាកមន្ទីរពេទ្យរយៈពេលជាងមួយខែមកហើយ តែនៅតែមិនបានធូរស្បើយនៅឡើយទេ ពោលគឺលោកអៀង សារី សម្រាកក្នុងបន្ទប់សង្គ្រោះបន្ទាន់តែរហូតមក។

លោកអៀងសារីអាយុ៨៧ឆ្នាំ ត្រូវបានគេដឹកទៅមន្ទីរពេទ្យមិត្តភាពខ្មែរសូវៀត ឬហៅថាពេទ្យរុស្ស៊ី កាលពីថ្ងៃទី៧កញ្ញា។ លោកមានសភាពហេវហត់ និងចុះខ្សោយកម្លាំងដោយសារតែជំងឺបេះដូង។ ចុងក្រោយនេះក្រុមគ្រូពេទ្យជំនាញបានរកឃើញថាជនជាប់ចោទរូបនេះមានបញ្ហាឆ្អឹងកង ក ដែលធ្វើឲ្យស្ពៀតសរសៃឈាម។ ស្ថានភាពនេះបានធ្វើឲ្យលោកអៀងសារី ត្រូវអវត្តមានពីក្នុងអង្គសវនាការដោយគ្មានកាលកំណត់។ អតីតរដ្ឋមន្ត្រីការបរទេសខ្មែរក្រហមដែលជាជនជាប់ចោទក្នុងសំណុំរឿង០០២ ក៏បានសម្រេចចិត្តធ្វើលិខិតបោះបង់សិទ្ធិចូលរួមសវនាការដោយសារតែបញ្ហាសុខភាព។

ការដោះលែងលោកស្រី អៀង ធីរិទ្ធ និងការចូលសម្រាកមន្ទីរពេទ្យរបស់អៀង សារី បានធ្វើឲ្យជនជាប់ចោទសំណុំរឿង ០០២ នៅសល់តែពីរនាក់ប៉ុណ្ណោះគឺ អតីតបងធំទី២ នួន ជា អាយុ ៨៦ ឆ្នាំ និង អតីតប្រមុខរដ្ឋ ខៀវ សំផន អាយុ ៨១ឆ្នាំ។ ជនជាប់ចោទទាំងពីររូបត្រូវបានមន្ទីរឃុំឃាំងនៃសាលាក្តីខ្មែរក្រហមអនុញ្ញាតឲ្យធ្វើបុណ្យកាន់បិណ្ឌដូចពលរដ្ឋខ្មែរជាទូទៅដែរ។ នេះបើយោងតាមលោក នេត្រ ភក្ត្រា ដែលបានប្រាប់វិទ្យុបារាំងអន្តរជាតិនៅថ្ងៃអាទិត្យនេះ។

លោកបន្តថា សាលាក្តីខ្មែរក្រហមមិនអាចបន្តទុកឲ្យជនជាប់ចោទអៀង សារី ស្ថិតក្នុងបន្ទប់សង្គ្រោះបន្ទាន់យូរតទៅទៀតបានទេ។ ការវាយតម្លៃសុខភាពពីក្រុមគ្រូពេទ្យជំនាញនឹងអាចអនុញ្ញាតឲ្យសាលាក្តីចាត់វិធានការបន្ត ដើម្បីជួយសង្គ្រោះជនជាប់ចោទតាមការដែលអាចធ្វើទៅបាន៕