លោកចន ឃេរីធ្វើដំណើរទៅដោះស្រាយវិបត្តិនយោបាយនៅអាហ្វហ្កានីស្ថាន
នៅថ្ងៃសុក្រទី ១១កក្កដា នេះ ប្រមុខការបរទេសអាមេរិកកំពុងមានវត្តមាន នៅទីក្រុងកាប៊ូល ដើម្បីជួយដោះស្រាយវិបត្តិនយោបាយនៅអាហ្វហ្កានីស្ថាន ដែលកំពុងជួបគាំង នៅក្រោយការបោះឆ្នោតប្រធានាធិបតី។ បេក្ខជនប្រធានាធិបតីអាហ្វហ្កានីស្ថានបានប្រកាសជ័យជំនះរៀងៗខ្លួន នៅពេលដែលការបន្លំសន្លឹកឆ្នោតត្រូវបានគេបកអាក្រាតថាបានកើតមានយ៉ាងសកម្ម នៅក្នុងថ្ងៃបោះឆ្នោត ១៤មិថុនាកន្លងទៅ។
ចុះផ្សាយនៅថ្ងៃ៖
ស្តាប់ - ០២:៣២
នៅអាហ្វហ្កានីស្ថាន រដ្ឋមន្រ្តីការបរទេសអាមេរិកព្យាយាមដើតួនាទីជាអ្នកសម្របសម្រួល បន្ធូបន្ថយភាពតានតឹង ដើម្បីធ្វើយ៉ាងណាកុំឲ្យអាហ្វហ្កានីស្ថានធ្លាក់ ផុងខ្លួនជ្រៅចូលទៅក្នុងគ្រោះវឹកវរ នៅក្រោយការបោះឆ្នោត។ វិបត្តិនយោបាយនៅអាហ្វហ្កានីស្ថានបានលេចឡើង បន្ទាប់ពីបេក្ខជនទាំងពីររូបប្រកាសជ័យជំនះរៀងៗខ្លួន។ លោកអាប់ឌុលឡា អាប់ឌុលឡា បានប្រកាសថា ខ្លួនឈ្នះឆ្នោត ធ្វើជាប្រធានាធិបតី និងប្រកែកមិនទទួលស្គាល់លទ្ធផលបោះឆ្នោតបណ្តោះអាសន្ន ដែលបានផ្តល់ជ័យជំនះដល់គូបដិបក្ខ គឺលោកអាស្រាហ្វ ហ្កានី។
លទ្ធផលបោះឆ្នោតបណ្តោះអាសន្នបានបង្ហាញថា លោកអាស្រាហ្វ ហ្កានីបានទទួលសំឡេងឆ្នោតដល់ទៅ ៥៦,៤ភាគរយ ប៉ុន្តែ គូប្រជែងរបស់លោក គឺលោកអាប់ឌុលឡា អាប់ឌុលឡាបានរុញច្រានចោលលទ្ធផលបោះឆ្នោត និងទាមទារឲ្យគេពិនិត្យឡើងវិញពីបណ្តឹងស្តីពីការបន្លំសន្លឹកឆ្នោត ដែលលោកបានបរិហារថាបានកើតមានយ៉ាងសកម្ម នៅក្នុងពេលបោះឆ្នោត។
ក្នុងនាមជាប្រទេសដែលផ្តល់ទ្រព្យធន និងកងទ័ពគាំទ្រអាហ្វហ្កានីស្ថាន អស់១៣ឆ្នាំមកហើយ អាមេរិកបារម្ភថា ជម្លោះនៅក្រោយការបោះឆ្នោតអាចនឹងរុញច្រានអាហ្វហ្កានីស្ថានឲ្យធ្លាក់ចូលក្នុងសង្រ្គាម ប្រយុទ្ធគ្នា រវាងក្រុមកុលសម្ព័ន្ធ ដែលគាំទ្របេក្ខជនប្រធានាធិបតីទាំងពីរ។ អាមេរិកយកចិត្តទុកដាក់ ចង់ជួយដោះស្រាយវិបត្តិអាហ្វហ្កានីស្ថាន ព្រោះអាមេរិកមិនចង់ឲ្យអាហ្វហ្កានីស្ថានជួបស្ថានភាពវឹកវរ ដូចនៅអ៊ីរ៉ាក់ នៅក្រោយការដកទ័ពរបស់អាមេរិក។ បទពិសោធន៍នៅអ៊ីរ៉ាក់ បង្ហាញថា នៅក្រោយកងទ័ពអាមេរិកដក ឆ្នាំ ២០១២ ជម្លោះដណ្តើមអំណាចរវាងបក្សនយោបាយ បានផ្តល់ឱកាសដល់ការរីកធំធាត់របស់ក្រុមជីហាត ដែលពេលនេះកំពុងបង្កអំពើហិង្សា និងប្រយុទ្ធគ្រប់គ្រងទឹកដីភាគខាងជើង នៅអ៊ីរ៉ាក់។
តាមគម្រោង កងទ័ពអាមេរិក និងកងទ័ពសម្ព័ន្ធមិត្តរបស់អូតង់ត្រូវដកចេញពីទឹកដីអាហ្វហ្កានីស្ថាន នៅចុងឆ្នាំ ២០១៤នេះ។ នៅសប្តាហ៍នេះ លោកប្រធានាធិបតីអាមេរិកបានគំរាមផ្តាច់ជំនួយ ប្រសិនបើភាគីជម្លោះមិនអាចដោះស្រាយវិបត្តិដោយសន្តិវិធី ឬរំលោភរដ្ឋធម្មនុញ្ញ ដោយល្មើសបង្កើតរដ្ឋាភិបាលពីរដាច់ពីគ្នា។ ប្រធានអង្គការអូតង់វិញបានអំពាវនាវឲ្យបក្សនយោបាយបញ្ចប់វិបត្តិនយោបាយ និងចុះហត្ថលេខាលើកិច្ចព្រមព្រៀងឲ្យបានមុនជំនួបកំពូលអូតង់ នៅខែកញ្ញា។ បេក្ខជនប្រធានាធិបតីទាំងពីរធ្លាប់បានសន្យាចុះកិច្ចព្រមព្រៀង ដែលនឹងអនុញ្ញាតឲ្យអាមេរិកអាចបន្តទុកកងទ័ព ប្រមាណ មួយម៉ឺននាក់នៅអាហ្វហ្កានីស្ថាន នៅក្រោយការដកកងទ័ព។ វិបត្តិមិនចុះសម្រុងគ្នារវាងគូបដិបក្សនយោបាយ នៅអាហ្វហ្កានីស្ថាននឹងអាចពន្យារ លើកពេលចុះកិច្ចព្រមព្រៀងនេះតទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ