លោកកឹម សុខានឹងបោះឆ្នោតអោយគណបក្សសម រង្ស៊ីក្នុងការបោះឆ្នោតព្រឹទ្ធសភា
គណបក្សសម រង្ស៊ី បានធ្វើសេចក្តីថ្លែងការណ៍មួយចោទប្រកាន់សកម្មជនគណបក្សសិទ្ធិមនុស្ស៥នាក់នៅខេត្តកំពង់ចាម ថាពួកគេកំពុងជួយរកសំឡេងឆ្នោតអោយគណបក្សប្រជាជនកម្ពុជាសម្រាប់ការបោះឆ្នោតព្រឹទ្ធសភាខាងមុខនេះ។ ប្រធានគណបក្សសិទ្ធិមនុស្ស លោក កឹម សុខាមិនបានបញ្ចេញប្រតិកម្មខ្លាំងក្លាប្រឆាំងសេចក្តីថ្លែងការណ៍របស់គណបក្សសម រង្ស៊ីទេ ប៉ុន្តែបានអះអាងថា អ្នកតំណាងរាស្ត្រ ៣រូបរបស់គណបក្សសិទ្ធិមនុស្សដែលក្នុងនោះ មានរូបលោកដែរនោះ នឹងបោះឆ្នោតគាំទ្រគណបក្សសម រង្ស៊ីនៅក្នុងការបោះឆ្នោតព្រឹទ្ធសភាក្នុងខែមករាដើមឆ្នាំក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
មិនមានប្រតិកម្មខ្លាំងក្លាច្រានចោលការចោទប្រកាន់របស់គណបក្ស សម រង្ស៊ីពីលោក កឹម សុខា ប្រធានគណបក្សសិទ្ធិមនុស្សឡើយ។ គណបក្សសម រង្ស៊ី ដែលចោទថាសកម្មជន៥នាក់របស់គណបក្សសិទ្ធិមនុស្ស ក្នុងខេត្តកំពង់ចាម បានយកលុយពីមន្ត្រីគណបក្សប្រជាជនកម្ពុជាដើម្បីទិញទឹកចិត្តសមាជិកក្រុមប្រឹក្សាឃុំសង្កាត់គណបក្សសម រង្ស៊ីអោយបោះឆ្នោតអោយគណបក្សប្រជាជនកម្ពុជានៅក្នុងការបោះឆ្នោតព្រឹទ្ធសភាក្នុងខែមករាខាងមុខនេះ។
លោកកឹម សុខាបែរចាត់ទុកថាការចោទប្រកាន់របស់គណបក្សសម រង្ស៊ីមិនបានបាញ់ឆ្ពោះគណបក្សសិទ្ធិមនុស្សរបស់លោកទេ តែតម្រង់តែលើសកម្មជនគណបក្ស៥នាក់ប៉ុណ្ណោះហើយដែលអ្នកទាំង៥នេះ បើតាមការបញ្ជាក់របស់លោកកឹមសុខា ពួកគេនឹងធ្វើសេចក្តីថ្លែងការណ៍ច្រានចោលការចោទប្រកាន់ពីគណបក្ស សម រង្ស៊ីដោយខ្លួនឯង។
ផ្ទុយទៅវិញ ប្រធានគណបក្សសិទ្ធិមនុស្ស លោកកឹម សុខា បានបង្ហើបអោយដឹងថាលោកនឹងធ្វើសេចក្តីប្រកាសអោយសមាជិករដ្ឋសភា៣រូបរបស់គណបក្សសិទ្ធិមនុស្សដែលក្នុងនោះក៏មានរូបលោកដែរនោះ បោះឆ្នោតគាំទ្រគណបក្សសម រង្ស៊ីនៅក្នុងការបោះឆ្នោតជ្រើសរើសសមាជិកព្រឹទ្ធសភា។
កម្ពុជានឹងរៀបចំការបោះឆ្នោតជ្រើសរើសសមាជិកព្រឹទ្ធសភានីតិកាលទី៣នៅថ្ងៃទី ២៩ ខែមករាឆ្នាំ២០១២។ ការបោះឆ្នោតនេះ ប្រព្រឹត្តទៅដោយប្រព័ន្ធ អសកលដែលមាន អង្គបោះឆ្នោត ជាសមាជិកឃុំ សង្កាត់និងអ្នកតំណាងរាស្ត្រ។ នៅក្នុងការបោះឆ្នោតព្រឹទ្ធសភាខាងមុខនេះ មានតែគណបក្ស ២ ប៉ុណ្ណោះដែលចូលរួមគឺ គណបក្សប្រជាជនកម្ពុជា និងគណបក្សសម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ