លោក ខៀវ កាញារីទ្ធ ជំរុញឲ្យអ្នកនាំពាក្យពង្រឹងតួនាទីរបស់ខ្លួន
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននិងជាអ្នកនាំពាក្យរដ្ឋាភិបាលបានជំរុញឲ្យអ្នកនាំពាក្យគ្រប់ស្ថាប័នទាំងថ្នាក់ជាតិនិងថ្នាក់ក្រោមជាតិពង្រឹងតួនាទីរបស់ខ្លួនក្នុងការផ្តល់ព័ត៌មានដល់សាធារណជន។ ការជំរុញបែបនេះបានធ្វើឡើងក្នុងឱកាសបិទសិក្ខាសាលារយៈពេលពីរថ្ងៃស្តីពីតួនាទីរបស់អ្នកនាំពាក្យនៅឯសណ្ឋាគារសាន់វ៉េនៅល្ងាចថ្ងៃអង្គារនេះ។
ចុះផ្សាយនៅថ្ងៃ៖
ស្តាប់ - ០២:០៣
ថ្លែងទៅកាន់អ្នកនាំពាក្យមកពីក្រសួងនានា និងមកពីបណ្តាខេត្ត រាជធានី ខណ្ឌ លោក ខៀវ កាញារីទ្ធ បានជំរុញឲ្យអ្នកនាំពាក្យទាំងអស់ពង្រឹងតួនាទីរបស់ខ្លួន និងត្រូវផ្តល់ព័ត៌មានដល់សាធារណជនឲ្យបានឆាប់រហ័ស និងជាព័ត៌មានពិត។
សេចក្តីថ្លែងការណ៍របស់លោករដ្ឋមន្ត្រីបានធ្វើឡើងក្នុងឱកាសបិទសិក្ខាសាលាស្តីពីតួនាទីរបស់អ្នកនាំពាក្យនៅឯសណ្ឋាគារសាន់វ៉េនៅរសៀលថ្ងៃអង្គារទី១៩សីហានេះ។ សិក្ខាសាលារយៈពេលពីរថ្ងៃដែលគាំទ្រដោយមូលនិធិ Konrad Adenauer របស់អាល្លឺម៉ង់ បានប្រារព្ធធ្វើឡើងក្រោមប្រធានបទ«តើធ្វើដូចម្តេចដើម្បីឲ្យការងាររបស់អ្នកនាំពាក្យមានប្រសិទ្ធភាព?»។ មានអ្នកនាំពាក្យមកពីក្រសួង ខេត្ត រាជធានី និងខណ្ឌ សរុបជាង ៥០ នាក់បានចូលរួមក្រោមការជួយបង្ហាត់បង្ហាញពីអ្នកជំនាញរបស់មូលនិធិ Konrad Adenauer ។
លោក ខៀវ កាញារីទ្ធ បានជំរុញឲ្យអ្នកនាំពាក្យបង្កើនសមត្ថភាពរបស់តាមរយៈការតាមដានព័ត៌មាន និងក្តាប់ព័ត៌មានឲ្យបានគ្រប់ជ្រុងជ្រោយ ព្រមទាំងត្រូវមានទំនាក់ទំនងល្អជាមួយអ្នកសារព័ត៌មានដោយមិនប្រកាន់និន្នាការនយោបាយ។ លោករដ្ឋមន្ត្រីក៏ដូចជាអ្នកជំនាញរបស់មូលនិធិខុនរ៉ាដដែរបានសម្គាល់ឃើញថា អ្នកនាំពាក្យទាំងអស់ដែលជាសិក្ខាកាមសុទ្ធតែមានសមត្ថភាពអាចបំពេញតួនាទីរបស់ខ្លួនបានយ៉ាងល្អ។
ប៉ុន្តែ អ្វីដែលលោករដ្ឋមន្ត្រីក្រសួងព័ត៌មានព្រួយបារម្ភនោះគឺ ប្រធានស្ថាប័នមួយចំនួនមិនបានផ្តល់តួនាទីពិតប្រាកដដល់អ្នកនាំពាក្យរបស់ខ្លួនទេ។ យ៉ាងណាក៏ដោយ លោកខៀវ កាញារីទ្ធ ជំរុញឲ្យអ្នកនាំពាក្យបញ្ចុះបញ្ចូលប្រធានស្ថាប័នរបស់ខ្លួនឲ្យយល់ពីសារសំខាន់ក្នុងការផ្តល់ព័ត៌មានដើម្បីឲ្យពួកគេប្រគល់តួនាទីពិតប្រាកដដល់អ្នកនាំពាក្យ។ លោករដ្ឋមន្ត្រីក៏បានគាំទ្រសំណើរបស់តំណាងមូលនិធិ Konrad Adenauer លោក Demis Schrey ដើម្បីរៀបចំឲ្យមានសន្និសីទកាសែតជាទៀងទាត់របស់អ្នកនាំពាក្យជាមួយអ្នកកាសែតផងដែរ.
សូមបញ្ជាក់ថា មូលនិធិរបស់អាល្លឺម៉ង់ខាងលើនេះបានជួយដល់កម្ពុជាដើម្បីពង្រឹងតួនាទីរបស់អ្នកនាំពាក្យចាប់តាំងពីឆ្នាំ ២០១១ មក។ សិក្ខាសាលានិងវគ្គបណ្តុះបណ្តាលអ្នកនាំពាក្យទាំងថ្នាក់ជាតិនិងថ្នាក់មូលដ្ឋានត្រូវបានបើកធ្វើជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ